KULOVOKA 29

Omu navajilika Alone navana venyi

(Levi 8.1-36)

1Jino eci cikiko cuma naukavalinga nakuvajilika vakanguzacilenga milimo yaupilixitu. Ukakwata ngombe wacikuji walivuvu umwe navizamba jamikoko vakuzeneka katenga vavali,

2nambolo yakuzeneka cimbalwila, najimbolo jakuzeneka cimbalwila vanahingunwina lyehi maji, najimbolo jakuzeneka cimbalwila jajilelu vanawavisa maji. Ukajisunga jawunga watiliku wakusalulula.

3Ukajihaka mumutonga umwe, ukajinehe mumutonga kana, hamwe nayauze ngombe wacikuji navizamba jamikoko vavali.

4Kaha ukapandamisa Alone navana venyi kucikolo cambalaka yakuliwanyina, ukavasanyise meya.

5Ukanona vize vyakuvwala, ukavwike Alone nacikuto nasanya yalifwote nalifwote nacipwiko, ukakase muhya walifwote wakutunga nawino mumbunda yenyi.

6Kaha ukajinga lihina lyakujinga kumutwe wenyi, hikuhaka mucama wajila halihina lyakujinga kumutwe.

7Numba ukambate maji akuwavisa ukawahingunwine hamutwe wenyi, nakumuwavisa.

8Kaha ukapandamisa vana venyi, ukavavwike vikuto.

9Ukavakasa mihya mujimbunda javo, naAlone navana venyi, hikuvavwika matepa, kaha navakatwamanga naupilixitu nacilika cahaya myaka yosena. Ngoco naukavaha-ndunwina kuupilixitu, naAlone navana venyi.

10Ukapandamisa uze ngombe wacikuji kulutwe lwambalaka yakuliwanyina. Kaha Alone navana venyi vakanangike mavoko avo hamutwe wayauze ngombe wacikuji.

11Kaha ukajiha uze ngombe wacikuji kumeso aYehova, kucikolo cambalaka yakuliwanyina.

12Ukambata kumanyinga angombe, ukawahake kujimbinga jalijiko lyakulumbila namunwe wove, hikumwanga manyingosena kuxina yalijiko lyakulumbila.

13Ukambata maji osenaze ali havize vyamujimo, naciwuva camaji cili halisuli, najiyise jivali, namaji aliko, ukavilumbile halijiko lyakulumbila.

14Oloze nyama yangombe nalilambu lyenyi, natuji twenyi, ukavilumbila hakakahya kusali yacilombo. Unapu wana wahaxili.

15Ukakwata cizamba camukoko umwe, kaha Alone navana venyi vakanangike mavoko avo hamutwe wayauze cizamba.

16Ukajihe uze cizamba, hikumbata anyingenyi ukawasapwile halijiko lyakulumbila jingulwixi ndo.

17Cizamba camukoko ukamuteta vipuka vyenyi, ukakose vize vyamujimo lyenyi, namahinji enyi, ukavitumbike havipuka vyenyi nahamutwe wenyi.

18Ukamulumbila cizamba wosena halijiko lyakulumbila. Unapu wana wakulumba wakuhana kuli Yehova, linapu livumba lvalupengopengo, wana wakwoca hakakahya wakuhana kuli Yehova.

19Ukakwata cizamba mukwavo, kaha Alone navana venyi vakanangike mavoko avo hamutwe wacizamba.

20Numba ukajihe uze cizamba, hikumbata kumanyingenyi, ukawahake kusongo yalitwitwi lyaAlone lyacilyo, nakujisongo jamatwitwi avana venyi avilyo, nakuminwe yaxina yamavoko avo avilyo, nakuminwe yaxina yamaninji avo avilyo. Kaha ukasapwila manyinga halijiko lyakulumbila jingulwixi ndo.

21Ukambata kumanyingaze ali halijiko lyakulumbila, nakumaji akuwavisa, ukawasapwile hali Alone, nahavize vyenyi vyakuvwala, nahali vana venyi, nahavize vyavana venyi ali navo vyakuvwala. Kaha ikiye himwapwa wakujilika, navize vyenyi vyakuvwala, navana venyi, navize vyavana venyi ali navo vyakuvwala.

22Kaha kucizamba ukambatako nawa maji, namukila wamaji, namaji aze ali havize vyamujimo, naciwuva camaji cili halisuli, najiyise jivali, namaji aliko, nalihinji lyacilyo (mwomwo napu cizamba wakuhandunwisa, xikaho),

23nambolo yimwe, nambolo vanahingunwina lyehi maji yimwe, nambolo yayilelu yimwe, kumutonga wajimbolo jakuzeneka cimbalwila uze uli kumeso aYehova.

24Kaha ukahaka vyosena hamavoko aAlone, nahamavoko avana venyi, ukavihungise kupwa wana wakuhungisa kumeso aYehova.

25Ukavitambula mumavoko avo, ukavilumbile halijiko lyakulumbila kupwa livumba lyalupengopengo kuli Yehova. Unapu wana wakwoca hakakahya wakuhana kuli Yehova.

26Ukambata pambo lyacizamba caAlone wakuhandunwisa, ukalihungise kupwa wana wakuhungisa kumeso aYehova, kaha cikapwe cazano cove.

27Ukajilika pambo lyawana wakuhungisa, nalihinji lyawana wakuzundula olyo vanahungisa nakuzundula, lyacizamba wakuhandunwisa, lyayauze wahali Alone, nalyeli lyayauze wahali vana venyi,

28likiko Ukapwe lyaAlone navana venyi, hicazano cavo cakuli vana vaIsalele haya myaka yosena. Mwomwo unapu wana wakuzundula, kaha ukapwe wana wakuzundula kuli vana vaIsalele wakuvimuna vakuvatula vamawanavo akulweza keke, ukiko wana wavo wakuzundula wakuhana kuli Yehova.

29Kaha vize vyaAlone vyakuvwala vyajila vikapwe vyavana venyi navakamukava, vakavivwale hakuvawavisa, nahakuvahandunwina kuupilixitu.

30Uze mwanenyi mwakapwa kapilixitu wakuxisa muli ikiye akavivwalenga makumbi atanu naavali, omu mwakengila mumbalaka yakuliwanyina nakunguzacila muze mwajila.

31Ukambata cizamba wakuhandunwisa, ukateleke nyama yenyi muma mwajila.

32Kaha Alone navana venyi vakalile nyama yacizamba nambolo yize yili mumutonga kucikolo cambalaka yakuliwanyina.

33Vakalye vyuma vize vanalingi navyo cakufwika haxili, nakuvaha-ndununa nakuvajilika. Oloze mutu weka kanda akalyakoko, mwomwo vinapu vyajila, xikaho.

34Kaci nge kunyama yakuhandunwisa, cipwe kujimbolo, nakukasalaho nahakuca, kaha ukalumba vize vinasaleho hakakahya. Kanda vakayilyako, mwomwo vinapu vyajila, xikaho.

35Mukiko munaukalinga kuli Alone nakuli vana venyi, nge mwaya vyosenevi ngunakulweze, ukavajilikenga makumbi atanu naavali.

36Kaha hakumbi hakumbi ukahana ngombe wawana wahaxili, kupwa wakufwika xili, kaha ukatomesanga lijiko lyakulumbila omu naukalilingilanga cakufwika xili, kaha ukaliwavisa maji nakulijilika.

37Makumbi atanu naavali ukalingila lijiko lyakulumbila cakufwika xili, ukalijilike. Kaha lijiko lyakulumbila nalikapwa lyajila cikuma, #Mateu 29.17.vyexovyo navikakwata halijiko lyakulumbila navikapwa vyajila.

Mawana ahakumbi hakumbi

(Kula. 28.1-8)

38Jino ou ukiko wana uze naukahanyinanga halijiko lyakulumbila, vana vamikoko vamwaka umwe vavali hakumbi hakumbi hamakumbi osena.

39Mwanamukoko umwe ukamuhana hacimene, namwanamukoko mukwavo ukamuhana hacingoloxi.

40Kaha hamwe namwanamukoko umwe ukahana cimbwa cimwe cakusokesa muvimbwa vyalifwa likumi cawunga wamwaza vanahingunwina cimbwa cimwe cakusokesa muvimbwa viwana vyahine camaji akutwa, nacimbwa cimwe cakusokesa muvimbwa viwana vyahine cavinyo kupwa wana wakuhingununa.

41Mwanamukoko mukwavo ukamuhana hacingoloxi, kaha ukamulinga nge kutesa nawana wakulya wacimene, nawana wawo wakuhingununa, kupwa livumba lyalupengopengo, wana wakwoca hakakahya wakuhana kuli Yehova.

42Ukapwenga wana wakulumba hamakumbi osena mukusemunwina cenu cosena, kucikolo cambalaka yakuliwanyina kumeso aYehova, kuze nangukaliwanyinanga nayenu, nakuhanjika kuli ove kuze.

43Nangukaliwanyinanga navana vaIsalele kuze, kaha upahu wami naukayijilika mbalaka.

44Nangukajilika mbalaka yakuliwanyina, nalijiko lyakulumbila. NaAlone nawa navana venyi vamalunga nangukavajilika, mangana vakanguzacilenga milimo yaupilixitu.

45Kaha nangukatwamanga mukaci kavana vaIsalele, nakupwanga nguKalunga kavo.

46Navakangutacikiza, Ami yami Yehova Kalunga kavo, Ami yami ngwavalowele mulifuci lyaEjipitu, mangana ngukatwamenga mukaci kavo. Ami yami Yehova Kalunga kavo.

Currently Selected:

KULOVOKA 29: LUE70

Highlight

Copy