Marako 4

Agole me Ngacuc

(Matayo 13.1-9; Luka 8.4-8)

1 # Luka 5.1-3 Di Yesu bobo oko cako pwony i dog nam me Galilaya. Ekodet adwong me jo oko cokere oluke, omio en eko donyo i yi yee kame oudo tie i dog nam di eko bedo iye; di jo dedede oko dong ooko kakatek. 2En eko pwonyo gi kope atot i agole di ewaco ne gi be, 3“Winyunu! Oudo tie dano moro kame ooto i poto cuno kodi. 4Kakame oudo etie cuc kede, kodi mogo oko popoto i dier yongayo, winy oko bino di oko camo gi pit. 5Kodi mogo oko popoto i lobo kobedo lela lela, kakame lobo oudo rerep kiye. Kodi nogo oko susunyo tui pien lobo kame oudo oumo gi nonok. 6Kakame ceng orieny kede, eko wango gi di kiko ner, pien aliasin gi oudo likame odonyo piny kiber. 7Kodi mogo oko popoto i dier okuto di okuto oko dongo otwilo gi, omio likame kiko nyak. 8Do kodi mogo oko popoto i lobo aber, kiko tui di kiko dongo, mogo oko lingo wit gi kame tie kede nyige ot adek, mogo ot kanyape, kede mogo tol acel.”

9Yesu oko waco ne gi be, “Ngat kame tie kede yite wek ewinyi.”

Gikame omio Yesu Pwonyo i Agole

(Matayo 13.10-17; Luka 8.9-10)

10Di do bin Yesu odong kene, jo kame oudo ocokere bute, karacel kede josiao mege tomon kiwie are oko penye kop kame mako agole. 11En eko waco ne gi be, “Wun kotieko mino wu ngeno mung me Ajakanut ka Rubanga. Do jo apat kalikame tie i Ajakanut bino winyo kop dedede i agole; 12#Isaya 6.9-10 tetekeny,

“‘Akadi kineni,

do likame kitwero ngeno;

doko akadi kiwinyi,

do likame kitwero niang.

Pien ka koto di li, oudo koto kilokere but Rubanga,

di en eko sasiro gi.’ ”

Yesu Ogonyo Dwong me Agole me Ngacuc

(Matayo 13.18-23; Luka 8.11-15)

13Yesu oko penyo gi be, “Wun likame iniangunu agole ni? Ibinunu do niang agole apat dedede benyo? 14Ngacuc cuo kop ka Rubanga. 15Kodi kopopoto i dier yongayo cungo pi jo kame ka kocuo kop ka Rubanga di kiko winyo, Sitani bino awakawaka di eko kwanyo kop nono tenge ki cuny gi. 16Iepone acel nono da, kodi kopopoto i lobo kobedo lela lela cungo pi jo kame ka kiwinyo kop ka Rubanga, kigamo awakawaka kede kilel; 17kop nono likame ko twero keto aliasin i kuo gi, mio ebedo i kuo gi pi kare acecek. Aso, ka peko moro amoto itidil oko poto pi kop nono, gin kipoto cucuto. 18Jo ace cal bala kodi kopopoto i dier okuto. Gin en jo kame winyo kop, 19do paro kuo me piny kan, mit me abar kede jame ace ko donyo i cuny gi, ko twilo kop nono di likame eko twero nyak. 20Do kodi kame kocuo i lobo aber cungo pi jo kame winyo kop ka Rubanga di kiko gamo, di kop nono ko keto wite kame tie kede nyige ot adek, mogo ot kanyape kede mogo tol acel.”

Etala kame Koumo kede Ebukit

(Luka 8.16-18)

21 # Matayo 5.15; Luka 11.33 Yesu oko penyo gi be, “Tie dano moro kame kelo etala di eko umo kede ebukit, arabo eko kano i dud itanda? Mam ekete kakame idelelei pi mino lero? 22#Matayo 10.26; Luka 12.2Pien gi dedede kokanere kobino woto kakaler, doko gi dedede komungere kobino mino ngere. 23Ngat kame tie kede yite, wek ewinyi!”

24 # Matayo 7.2; Luka 6.38 En eko waco ne gi be, “Ketunu tam wu i kom gikame iwinyunu. Pien epone kame wun ipimunu ne kede jo en kame kobino pimo ne wuda kede, di doko oko medo ne wu kame kalamo da. 25#Matayo 13.12; 25.29; Luka 19.26Pien ngat kame tie kede gimoro kobino medo ne ace, do ngat kame li kede gimoro, akadi atitidi kame etie kede da kobino kwanyo kibute.”

Agole me Kodi kame tie Dongo

26Yesu oko meede di ewaco ne gi be, “Ajakanut ka Rubanga cal bala dano kocuo kodi i lobo mere. 27En eko donyo buto di eyai iwor kede iceng. Kodi mege nogo ko tui di kiko donyo dongo di en ekwia kite kame etimere kede. 28Lobo kene en kame mio kodi tui ko dongo; en egeo keto pote, di eko keto wite, di do eko keto nyige. 29#Yoweri 3.13Kame kal do ocek, oyotoyot dano nono mako pala di eko cako kac, pien udo kare me kac do otuno.”

Agole me Nyige me Karadali

(Matayo 13.31-32, 34; Luka 13.18-19)

30Yesu oko penyere be, “Nyo kame wan otwerunu poro kede Ajakanut ka Rubanga? Arabo oporenu kede agole mene? 31En ecal kede nyige me karadali; ka kotie pite piny i lobo, etitidi kalamo kodere dedede me wi lobo. 32Do ka kotieko pite, etui di eko dongo edoko dwong kalamo yen apita dedede. En eko keto ajange kiyayara, kame mio winy me obar bino ko gedo iye.”

33Yesu bin owaco ne jo kope mege di etio kede agole atot apapat bala magi, bala kame oudo kiromo niang kede. 34En bin emaro waco ne gi kope dedede i agole, do ka oudo edong kene kede josiao mege, en oudo eko donyo niango gi i gi dedede.

Yesu Okweo Yamo atek i Nam

(Matayo 8.23-27; Luka 8.22-25)

35Otieno me cenge nono, Yesu oko waco ne josiao mege be, “Ongolunu ber nam ootunu loka tetuca.” 36Di do gin kiko weko ekodet, kiko donyo i yi yee kiko tero Yesu da karacel kede gi. Yede apat da oko upere kede gi. 37Yamo atek oko cako buko, ebuka oko cako napunapun i kom yee di pii mogo lepar i yi yee, kame oko mino yee oudo tie pong kede pii. 38Yesu oudo tie nino i yi yee cen i ojwiny, di ebuto eteno wie. Josiao oko cene di kiwaco ne be, “Apwony, mam likame itie neno be oyapununu to?”

39Yesu oko cei, en eko coko yamo di eko waco ne nam da be, “Kwei! Cungi!” Yamo oko cungo, nam da oko kwei cuu. 40Yesu oko penyo josiao mege be, “Wun ilworunu kamano pinyo? Mam wun pwodi iliunu kede yei?”

41Do gin kiko bedo kede lworo kede ur atek, di do kiko donyo penyere ken gi ken gi be, “Man do ngai, kame kiton yamo kede nam da winyo dwane?”

Currently Selected:

Marako 4: BILKDC13

Highlight

Copy