Marako 3

Icuo kame Bade Omito

(Matayo 12.9-14; Luka 6.6-11)

1Yesu oko donyo bobo i sinagoga, icuo kame bade omito oudo tie kuno. 2Jo kame oudo tie kuno oko ciko wang gi kitek i kom Yesu, di kimito neno ka eyaro cange i Ceng Sabato tetekeny kiud gikame kiromo pide iye. 3Di Yesu oko waco ne icuo kame bade omito nono be, “Bia kan.” 4En eko penyo jo kame oudo tie kuno be, “Iswil wa yei ne wa timo bero Ceng Sabato arabo timo raco? Marao kuo me dano arabo neko aneka?”

Do likame kiko dwoko kop moro. 5Yesu oko ngoloro gi kede wangcuny, di eko bedo kede cwercuny pi tek wi gi. En eko waco ne icuo nono be, “Riei badi!” Lonono oko rieno bade, di bade oko doko ber bobo. 6Iparisayon oko donyo ooko, awakawaka di kiko cako poro kop kede jo me ekodet ka Erode, pi mito udo epone me neke.

Ekodet me Jo Obino i dog Nam

7Yesu kede josiao mege oko ot i nam me Galilaya, ekodet adwong me jo oko lube kuno. Jo mogo kikom gi oudo oyai ki Galilaya, mogo oyai ki Yudea, 8mogo ki Yerusalem, mogo ki adul me Idumea, kede mogo oudo owok ki adul kame tie tetuca me Yorodan kede ki adulion koluko bomban me Taya kede Sidon; gin dedede oudo kibino but Yesu, pien oudo kiwinyo rwonge me gikame etimo. 9#Marako 4.1; Luka 5.1-3Yesu oko waco ne josiao mege be kimoi ne yee moro cuto wek ebin edony iye, tetekeny kur jo bin dire i kome, pien ekodet oudo dwong adikinicel. 10En oudo ecango jo atot, oko mino jo dedede kame oudo tuwo oko donyo dire kede teko pi mito mule. 11Oudo tek kame jo kame tie kede tipere areco onene, kipopoto piny i nyime kiko donyo dwilao di kiwaco be, “In en Wot ka Rubanga.”

12Do Yesu oko ciko tipere areco nogo be kur kimie engere.

Yesu Oyero Joor Tomon kiwie Are

(Matayo 10.1-4; Luka 6.12-16)

13Yesu oko yito kakimukurur, di eko lwongo jo mogo kame cunye omito, di kiko bino bute. 14Di en eko yero cuo tomon kiwie are kikom gi, kame eko lwongo be joor, pi bedo kede en, 15doko pi oro gi ot pwonyo jo, kede pi mino gi akarunikin me riamo jwogi.

16Cuo tomon kiwie are kame koyero nogo gin ige: Simoni kame oudo Yesu ocako nyinge be Petero, 17Yakobo kede omin mere Yokana, awobe ka Sebedayo kame Yesu oudo ocako nying gi be Boanagis, kame dwong mere be, idwe me mor me kot;#3.17 Idwe me mor me kot dwong mere be ekite gi cal bala mor me kot. 18kede Anderia, Pilipo, Batulumayo, Matayo, Tomasi, Yakobo wot ka Alipayo, Tadeo, kede Simoni kame oudo tie i ekodet kalikame mito apugan me kare nono, 19kede Yuda Isikariot kame oko rupao Yesu.

Yesu kede Belsebul

(Matayo 12.22-32; Luka 11.14-23; 12.10)

20Di do Yesu oko donyo i ot. Do ekodet me jo bobo oko cokere, omio Yesu kede josiao mege likame oko udo kare akadi me cam. 21Kakame jo me paco gi owinyo kede kop noni, gin kiko ot pi make pien oudo jo tie waco be epoi.

22 # Matayo 9.34; 10.25 Jopwony me Iswil kame oudo owok ki Yerusalem oko waco be, “Belsebul odonyo i wie, doko en eriamo jwogi kede twer kowok kibut ngadwong me jwogi.”

23Di Yesu oko lwongo gi bute, eko cako yamo kede gi i agole be, “Sitani twero riamo Sitani wad gi benyo benyo? 24Ka ajakanut moroni opokere di eko donyo yi kene, ajakanut nono likame cungo. 25Doko ot kame jo mege opokere di kiko donyo yi ken gi ken gi, ot nono likame cungo. 26Aso, ka Sitani da odonyo yi kene, udo epokere, man mio likame eromo cungo, do udo etie tuno do i ajikini mere.

27“Doko likame tie ngat kame twero donyo i yi ot me ngat atek di eko yako jame mege, abongo ber kong tweno dano atek nono, en kame mio eko do yako jame mege.

28“Ateteni awaco ne wu be, kobino sasiro jo ki dub gi dedede kede acae da dedede kame kiyamo i kom Rubanga; 29#Luka 12.10do ngat kame waco kop me acae i kom Tipo Kacil, likame kobino sasiro en akadi acel, pien udo etimo dub kame bedo nakanaka.” 30Yesu oyamo kaman pien gin oudo kitie waco be, “En etie kede tipo arac.”

Imiegu ka Yesu kede Toto mere

(Matayo 12.46-50; Luka 8.19-21)

31Di do imiegu ka Yesu kede toto mere oko bino. Kiko cungo ooko di kiko cwano ne kop di kilwonge. 32Ekodet kame oudo obedo di oluko Yesu diere oko waco ne be, “Toto ni kede imiegu ni tie ooko, kimito neni.”

33Yesu oko dwoko di epenyo gi be, “Toto na kede imiegu na en alu?” 34En eko ngoloro jo kame oudo obedo oluke nogo, eko waco ne gi be, “Toto na kede imiegu na gin ige! 35Ngat kame timo gikame Rubanga mito en kame obedo omina, amina kede toto na.”

Currently Selected:

Marako 3: BILKDC13

Highlight

Copy