Marako 12

Agole me Jodar Poto me Olok

(Matayo 21.33-46; Luka 20.9-19)

1 # Isaya 5.1-2 Di Yesu oko cako yamo kede gi i agole be, “Bin icuo moro opuro poto me olok di eko luke kede awas, di en eko kunyo bur iye me bino bwini, eko gero esipet me daro poto. Di do en eko keto jo mogo daro ne poto nono, di en eko ot i piny apat. 2Kakame kare me ngwedo olok otuno kede, won poto oko cwano ngatic mere acel but jodar poto pi ot gamo ne anyakini mogo kowok ki poto mere. 3Gin kiko make kiko bunge, di kiko riame edok kede cinge nono. 4Won poto bobo oko cwano ngatic mere ace, gin kiko daruno mano da kiko tuco wie kede kiko timo ne tim me lewic. 5Di bobo en eko cwano ngatic ace, do mano kiko neko. Kitimo kamanono da ne jotic apat atot, mogo kibungo, kede mogo kiko neko. 6Oudo pwodi edong kede dano acel kobedo wode kame emaro. Me ajikini mere en eko do cwano wode nono di ewaco be, ‘Angeo be kiyaro do bedo kede wor but woda.’ 7Do jodar poto ka oko donyo yamo ken gi ken gi be, ‘Man en musika mere, bia onekenu me wek jame kame en epoore sikao dok megwa.’ 8Gin kiko make, kiko neke di kiko uce ooko me poto me olok.

9“Nyo do kame won poto me olok no bino timo? En eyaro bino di eko neko jodar poto me olok nogo di do eko mino poto mere me olok i cing jodar apat. 10#Sabuli 118.22-23Mam itiekunu somo iwandik kacil kame waco be,

“‘Kidi kame jogedo odagi,

en kame olokere oko doko kidi me esonda kame pire tek;

11man Rwot en kotimo,

doko i wang wa, etie gi me aura?’ ”

12Jotel me Iyudayan oko tamo make, pien gin oudo kitieko niang kiber be Yesu oudo oyamo agole noni i kom gin. Do pien oudo kilworo ekodet, oko mino kioto tenge kiweke.

Peny kame mako kop me Culo Esolo

(Matayo 22.15-22; Luka 20.20-26)

13Jotel me Iyudayan oko cwano Iparisayon mogo kede jo me ekodet ka Erode but Yesu pi ot kino doge. 14Kiko bino but Yesu di kiko waco ne be, “Apwony, wan ongeo be in dano me ateni. Doko in likame ilworo ngatamoro, pien in likame ineno dano kede cal mere me ooko, do in ipwonyo jo yongayo ka Rubanga i ateni. Benyo, Iswil yei ne jo culo esolo but Kaisari arabo li? Ocul gi arabo li?”

15Do kite kame oudo Yesu ngeo kede ecuke gi, omio en eko waco ne gi be, “Pinyo komio itienu tama? Kelanu ber sente akaya acel aneni.”

16Gin kiko kelo ne. En eko penyo gi be, “Cal kede nying ngai ine kame tie iye ni?”

Gin kiko dwoko ne be, “Me ka Kaisari.”

17Yesu oko waco ne gi be, “Aso, miunu Kaisari jame ka Kaisari, ikounu mino me ka Rubanga da but Rubanga.” Gin kiko uro kite kame edwoko kede.

Peny kame mako Iyarun

(Matayo 22.23-33; Luka 20.27-40)

18 # Tice 23.8 Isadukayon, jo kalikame oudo yei kede kop me iyarun, oko bino but Yesu di kiko penye be, 19#Iswilia 25.5“Apwony, Musa bin owandiko ne wan Iswil kame waco be, ka icuo moroni oto eko weko dako mere di likame enywal kede, omin mere miero do mak apuserut kame en eto eweko me wek enywal kede idwe ne omin mere kame oto nono. 20Aso, bin tie imiegu kanyaare, me agege oko nyomo dako, do en eko to eweko dako nono abongo idwe. 21Omin mere me are oko mako apuserut nono eko bedo kede. Manono da bobo oko to oweko dako nono abongo idwe. Gi acel nono oko timere ne omin gi me adek da, 22tuno i me kanyaare. Gin dedede kiko to abongo nywal. Ki cen mere di do dako nono da oko to. 23Nan do i ceng me iyarun en ebino bedo dako ka ngai? Pien cuo kanyaare nogo dedede oudo obedo kede en bala dako gi.”

24Yesu oko waco ne gi be, “Gini en komio wun ipotunu, pien wun ikwianu iwandik kacil akadi twer ka Rubanga. 25Pien kame jo oyaruno, cuo kede mon likame bobo bino nyomere, do kibino bedo cal bala imalaikan kame tie i malo. 26#Yai 3.6Aso, do i kom kop kame mako yaruno jo oto, mam itiekunu somo kiye itabu ka Musa kop i kom abum, epone kame Rubanga owaco ne kede be, ‘Ango en Rubanga ka Aburaam, Rubanga ka Isaka kede Rubanga ka Yakobo’? 27En likame Rubanga me jo oto, do en Rubanga me jo akuo. Wun kom ipotunu.”

Cik kame Pire Tek Kalamo

(Matayo 22.34-40; Luka 10.25-28)

28 # Luka 10.25-28 Ngat acel kikom jopwony me Iswil oko bino en eko winyo di kitie piem. Kakame eneno kede be Yesu odwoko peny gi kiber, en eko penye be, “Kara ber cik mene en kame pire tek kalamo?”

29 # Iswilia 6.4-5 Yesu oko dwoko ne be, “Cik kame pire tek kalamo en ine be, ‘Winyi in Isirael! Rwot Rubanga wa en Rwot acel. 30Poore imar Rwot Rubanga ni kede cunyi dedede, kede kuo ni dedede kede tam ni dedede, kede teko ni dedede.’ 31#Jolebi 19.18Me are en ine be, ‘Mar ngakio ni bala kite kame imaro kede komi keni.’ Likame doko tie cik moro kame pire tek kalamo magi.”

32 # Iswilia 4.35 Ngapwony me Iswil nono oko waco ne Yesu be, “Apwony, idwoko kop kiber, iwaco be Rwot Rubanga en acel, doko likame tie rubanga moro ace, kwanyo en kene, mano tie kop me ateni; 33#Kosea 6.6kede doko be, mar Rwot Rubanga ni kede cunyi dedede, kede tam ni dedede kede teko ni dedede, di iko maro ngakio ni bala kite kame imaro kede komi keni, man en kame kalamo giamia kame kowango alutu kede giayala.”

34Kakame Yesu oneno kede be icuo nono odwoko peny mere kede rieko, en eko waco ne be, “In kom likame ibor do kede Ajakanut ka Rubanga.”

Ingei mano, likame tie ngatamoro kame oko dino cunye penye kop moro.

Peny i kom Kirisito

(Matayo 22.41-46; Luka 20.41-44)

35Di bin Yesu tie pwony i tempulo, en eko penyo jo be, “Benyo benyo kame jopwony me Iswil waco kede be Kirisito en wot ka Daudi? 36#Sabuli 110.1Daudi da kikome bin Tipo Kacil otelo di en eko waco be,

“‘Rwot Rubanga owaco ne Rwot na be:

Bed i bada tetu cam,

tuno di ango atieko mini inyono jokwor ni piny i tieni.’

37“Ka Daudi da kikome bin olwonge be ‘Rwot’, Kirisito doko twero bedo wot ka Daudi benyo?”

Yesu Okwenyaro Jo i kom Jopwony me Iswil

(Matayo 23.1-36; Luka 20.45-47)

Ekodet adwong oudo tie winyo pwony ka Yesu kede kilel. 38I pwony mere, Yesu owaco ne gi be, “Gwokerenu i kom jopwony me Iswil, kame maro latao di kingapo ikanson aboco di kimito be di jo moto gi kede wor i atalen. 39Doko kimaro bedo i komini abeco i sinagoga, kede kabedo me wor i ibagai. 40Gin kicamo jame me apuserun, di kiko donyo ngangalo lego ilega aboco me ecuke. Kobino ngolo ne gi kop kame kalamo.”

Irabu me Apuserut

(Luka 21.1-4)

41Yesu oko bedo di epimere kede adita me irabu, en eko donyo neno epone kame oudo ekodet me jo tie mino kede irabu gi. Jo kobaro atot oudo mio sente atot twatwal; 42di apuserut moro kame ngacan da oko bino, en eko kwanyo abolai are kenekene. 43En eko lwongo josiao mege di eko waco ne gi be, “Ateteni awaco ne wu be, apuserut kame ngacan ni en komio irabu atot kalamo jo apat go dedede. 44Pien jo kobaro omio gikolamar ki abar gi, do apuserut ni, i can mere, en ekwanyo gi dedede kame oudo etie kede, kame epoore kuo kede.”

Currently Selected:

Marako 12: BILKDC13

Highlight

Copy