Marako 13

Yesu Owaco Kop me Reto Tempulo

(Matayo 24.1-2; Luka 21.5-6)

1Di bin Yesu tie wok ki tempulo, ngasiao mere acel oko waco ne be, “Apwony, neningo twon kide kede twon gedo go!”

2Yesu oko waco ne be, “Mam ineno twon gedo go? Likame tie kidi acel moro koyaro dong cungo i wi kidi ocelu; kobino rereto gin dedede piny.”

Peko kede Itidil

(Matayo 24.3-14; Luka 21.7-19)

3Di bin Yesu tie bedo i wi moru me Olibeti, kame oudo pimere kede tempulo, Petero, Yakobo, Yokana kede Anderia oko bino bute. Di kiko penye i mung be, 4“Wac ne wa, awene en kame gini bino timere kede, doko gianena nyo kame bino bedo tie pi nyuto be kare do oyapuno tuno me gi nogi dedede timere?”

5Yesu oko cako waco ne gi be, “Gwokerenu me wek kur ngatamoro rweny wu. 6Jo atot oyaro bino i nyinga di kiwaco be, ‘Ango en Kirisito!’ Di gin kiko bino rwenyo jo atot. 7Doko kame iwinyunu kop me yi kame tie timere, kede rwonge me yi, kur cunyu poti, pien manono miero timere, do likame udo ajikini otuno. 8Pien atekerin bino yi, doko ajakanut acel da bino yi kede ajakanut ocelu. Yangere me piny bino bedo tie kabedere atot doko kec bino bedo tie. Do magi dedede tie bala agege me aramo me nywal.

9 # Matayo 10.17-20; Luka 12.11-12 “Do gwokerenu; pien koyaro pido wu i nyim kansulo, kede kobino bungo wu i sinagoga. Ibinunu cungo i nyim jopug kede i nyim abakai pira, pi mino ijura. 10Do me agege miero ber tuc ejiri ne atekerin dedede. 11Do ka komako wu di oko tero wu pido wu i nyim kansulo, kur igeunu bedo kede par pi kop kame iyarunu waco; do kame esawa oromo, wacunu kop kame kobino keto i dogu. Pien kop kame ibinunu yamo likame bino bedo megu do kibino wok kibut Tipo Kacil. 12Dano bino mino kotero omin mere di oko neko, papa me atin da bino timo ne atin mere kamanono, kede idwe bino dagi jonywal gi, di kiko mino koneko gi. 13#Matayo 10.22Jo dedede bino dagi wu pira. Do ngat kame bino kanyakino tuno i ajikini bino udo alako.

Gikame Kelo Lworo Adwong

(Matayo 24.15-28; Luka 21.20-24)

14 # Danieri 9.27; 11.31; 12.11 “Do kame inenunu gikame munao kabedo kacil ka Rubanga di kosipo kakame oudo likame epoore bedo iye (ngat kame tie somo poore niang dwong mere), jo kame tie Yudea miero do ringi i wi mori. 15#Luka 17.31Dano kame tie i wi ot kur doko wok piny amotoko edonyi i ot pi kwanyo gimoro. 16Doko ngat kame tie i poto kur doko dok i paco pi omo egoe. 17Can tin bino bedo dwong benyo ne mon oyac kede kame doto idwe i ceng nogo! 18Kwaunu Rubanga, me wek gigi kur timere i kare me ngico. 19#Danieri 12.1; Gianyuta 7.14I ceng go can adwong bino bedo tie kame epone mere lem pwodi likame otimere cako Rubanga cweno piny tuno nan, doko da likame ebino medo timere. 20Doko koto Rwot likame odwodwoko wel me ceng nogo, koto likame ngatamoro obwot. Do pi jo mege kame en eyero, omio Rwot odwodwoko ceng nogo odoko nonok.

21“I kare nono ka ngatamoro owaco ne wu be, ‘Neni, Kirisito ine!’ arabo be, ‘Neni, en ica!’ kur iyeunu kop mere. 22Pien jo kame cuko be gin kibedo Kirisito, kede inabin me angalo oyaro bino. Kiyaro timo gianena kede gi me isuur pi ngalo jo kame Rubanga oyero, ka twerere. 23Do gwokerenu, ango atieko waco ne wu gigi dedede di pwodi likame kare otuno.

Dwogo ka Wot ka Dano

(Matayo 24.29-31; Luka 21.25-28)

24 # Isaya 13.10; Esekeri 32.7; Yoweri 2.10, 31; 3.15; Gianyuta 6.12 “I kare nono di do peko nono otieko timere, wang ceng bino doko col, duwe likame doko bino rieny, 25#Isaya 34.4; Yoweri 2.10; Gianyuta 6.13acerin da bino popoto ki malo, kede twer kame tie malo bino yayangun. 26#Danieri 7.13; Gianyuta 1.7Di do jo ko bino neno Wot ka dano di bino kede idoun kede twer adwong kede deyo. 27En ebino cwano imalaikan tetu bad ongwon dedede me wi lobo pi coko jo kame Rubanga oyero, cako ki agege me lobo tuno i ajikini me malo.

Pwony kame Yai ki kom Yat Epigi

(Matayo 24.32-35; Luka 21.29-33)

28“Siaonu pwony kame yai ki kom yat epigi; cucuto kame ajange mege odoko yoyom di pote gi oko cako lot, wun ingeunu be kare me iporo do oyapuno tuno. 29Iepone nono da kame inenunu gigi tie timere, ngeunu be en do etieko doko iyapiyapi, kom etuno i erute. 30Ateteni ango awaco ne wu be, gigi dedede bino timere di pwodi jo kame nan tie di kuo likame oto. 31Malo kede lobo bino rwenyo, do kope nango likame bino rwenyo.

Likame tie Ngat kame Ngeo Ceng amoto Esawa nono

(Matayo 24.36-44)

32 # Matayo 24.36 “Do likame tie ngat kame ngeo awene kame ceng amotoko esawa nono bino tuno kede, akadi imalaikan kame tie i malo, akadi Wot ka Rubanga da likame ngeo, do Papa kenekene en kame ngeo. 33Gwokerenu, bedunu di ikiunu piny, pien likame ingeunu awene en kame kare no bino tuno kede. 34#Luka 12.36-38Ebino bedo cal bala dano moro kame tie ot i piny abor. Do di pwodi likame eyai, emio jotic mege tic kame ngat acelacel poore timo, di en eko ciko ngadar ekeko pi bedo di wange bit. 35Pi mano, wuda kiunu piny, pien likame ingeunu awene kame won ot oyaro bino kede, cengemogo eyaro bino otieno, arabo i dier iwor, arabo tetu obai di tongwen tie koko amotoko odiko. 36Aso ka li, en ebino ngoole angola di eko udo wu di ininunu. 37Gikame ango atie waco ne wu en kame atie waco ne jo dedede da be: kiunu piny!”

Currently Selected:

Marako 13: BILKDC13

Highlight

Copy