Marako 1

Kop kame Yokana Ngaibatis Opwonyo

(Matayo 3.1-12; Luka 3.1-18; Yokana 1.19-28)

1Man en agege me ejiri ka Yesu Kirisito Wot ka Rubanga. 2#Malaki 3.1En egere bala kite kame bin enabi Isaya owandiko kede kop kame Rubanga owaco be,

“Neni, atie cwano ngaor na geo ot nin anyim,

kame bino iiko yongayo nin.

3 # Isaya 40.3 Dwan ngatamoro tie ilelem i tim be,

‘Iikunu ne Rwot yongayo,

rieunu ne yote.’ ”

4Yokana Ngaibatis oko neeno i tim di ewaco ne jo be kiswilaro, di oko bino batiso gi pi udo isasir ki dub gi. 5Jo oko yai ki piny me Yudea bekebek kede ki bomba me Yerusalem, kiko ot but Yokana. Gin kiko tuco dub gi, di Yokana oko batiso gi i ecilet me Yorodan.

6 # 2 Abakai 1.8 Yokana oudo ngapo egoe kame kotimo kede yer me aguragura, di etweo piere kede rakoba me lau. En oudo ecamo obonyo kede mokic. 7Bin en ewaco ne jo be, “Tie ngat kame tie bino i cen ngea kame tie kede twer kame loa. Ango likame apoore gungo pi gonyo ausi me amuka mere. 8Ango abatiso wu kede pii, do en ebino batiso wu kede Tipo Kacil.”

Batisimu kede Atama ka Yesu

(Matayo 3.13—4.11; Luka 3.21-22; 4.1-13)

9I kare nono Yesu oko yai ki Nasaret kame tie i piny me Galilaya, en eko bino di Yokana oko batiso en i ecilet me Yorodan. 10Cucuto di Yesu owok ki dud pii, en eko neno malo di oyabere, di Tipo Kacil oko bino i kome bala awele. 11#Ageini 22.2; Sabuli 2.7; Isaya 42.1; Matayo 3.17; 12.18; Marako 9.7; Luka 3.22Dwan oko wok ki malo di waco be, “In en Woda kame amaro, cunya yom i komi.”

12Cucuto Tipo Kacil oko tele ot i tim, 13en eko bedo kuno pi ceng ot ongwon di Sitani tame. En oudo ebedo kuno kede leini me obar, di imalaikan gwoke.

Yesu Olwongo Jocik Ongwon

(Matayo 4.12-22; Luka 4.14-15; 5.1-11)

14Di bin kotieko tweno Yokana i otkol, Yesu oko ot Galilaya di eko tuco ejiri ka Rubanga 15#Matayo 3.2di ewaco be, “Kare do otieko romo, doko Ajakanut ka Rubanga otieko doko iyapiyapi. Swilarunu ki dub wu di ikounu yei kop me ejiri!”

16Di Yesu oudo tie ririto dog nam me Galilaya, en eko neno Simoni kede omin mere Anderia di kitie uco bwoi i nam, pien gin oudo jocik. 17Yesu oko waco ne gi be, “Lubanu di ako bino loko wu idokunu jo kame coko jo buta akaka cik.” 18Cucuto gin kiko weko bwoini gi di kiko lube.

19En eko meede ot anyim anonok, di eko bobo neno Yakobo kede omin mere Yokana, awobe ka Sebedayo, di kitie i yi yee iiko bwoini gi. 20Cucuto di Yesu oko lwongo gi pi bino lube. Gin kiko weko papa gi Sebedayo i yi yee karacel kede jotic kame oudo kopango, gin di kiko lubo Yesu.

Icuo kame tie kede Tipo Arac

(Luka 4.31-37)

21Yesu kede josiao mege oko tuno i bomba me Kaperanaum. Cucuto di Ceng Sabato otuno, en eko ot i sinagoga di eko pwony. 22#Matayo 7.28-29Jo oko uro pwony mere piento en oudo epwonyo kede akarunikin, weko bala bin jopwony me Iswil.

23Cucuto icuo moro kame oudo tie kede tipo arac oko bino i sinagoga gi nono di eko lelemo be, 24“Yesu me Nasaret, nyo kame imito kibut wa? Mam ibino do pi tieko wa? Ango angei, in ibedo Dano Kacil ka Rubanga!”

25Do Yesu oko coke di ewaco be, “Lingi, doko wok tenge ki kome!”

26Tipo arac nono oko mino kom icuo nono odonyo miel teltel, eko dwilao di do eko wok tenge ki kome. 27Gin dedede kiko uro kitek di kiko donyo penyere ken gi ken gi be, “Nyo ine? Man bobo pwony anyen! Kom icuo ni tie kede akarunikin me ciko tipere areco di gin kiko timo gikame en ewaco.”

28Rwonge i kom Yesu oko sarakin awakawaka i adulion dedede kame oluko Galilaya.

Yesu Ocango Jo Atot

(Matayo 8.14-17; Luka 4.38-41)

29Kakame Yesu oyai kede ki sinagoga, cucuto en eko donyo i ot ka Simoni kede Anderia, en karacel kede Yakobo kede Yokana. 30Musuja oudo omako toto me dako ka Simoni tie i apien. Cucuto di Yesu otuno, oko waco ne kop me aramo nono. 31En eko ot but ngatuwo, eko mako cinge di eko kiarao en. Musuja oko weke di eko cako tedo gi.

32Otieno nono di do ceng otieko donyo, jo oko kelo ne Yesu jotuwo dedede kiton jo koudo tie kede jwogi. 33Jo dedede me bomba oko cokere i nyim ot. 34Yesu oko cango jo atot kame oudo tie kede tuwo me iponeso apapat, eko riamo jwogi atot, doko oudo likame eyei ne jwogi yamo, pien gin oudo kingee.

Yesu Opwonyo Jo i Galilaya

(Luka 4.42-44)

35Odiko sek di pwodi piny cocol, Yesu oko dilo yai eko ot kakoling eko donyo ilega. 36Do Simoni karacel kede jo kame oudo tie kede oko wape. 37Di bin kiude, kiko waco ne be, “Jo dedede tie moni.”

38Yesu oko dwoko ne gi be, “Wek ootunu i bomban ace da tetekeny apwony gida kope na, pien kop nono en komio ango abino.”

39 # Matayo 4.23; 9.35 Yesu oko ririmo Galilaya dedede, di epwonyo kop ka Rubanga i sinagoga gi kede di eriamo jwogi.

Yesu Ocango Adobo

(Matayo 8.1-4; Luka 5.12-16)

40Adobo moro oko bino, eko riondiko piny i nyim Yesu di ebako doge be, “Kame cunyi mito, ikaruno canga.”

41Kisa oko mako Yesu i kome eko rieno cinge di eko mule, eko waco ne be, “Amito; cangi.” 42Cucuto dobo oko weke di eko cango. 43Yesu oko cike kede dwan atek di oko mine eoto 44#Jolebi 14.1-32di ewaco ne be, “Miero inen be likame iwaco ne ngatamoro gi kotimere; do ot inyutere but ngasaseredoti, di iko mino giayala me lonyere ni bala kite kame bin Musa ociko kede, pi nyuto ne jo be in do itieko cango.”

45Do icuo nono oko ot, en eko cako yamo kop nono abongo lworo di eko mino kop nono osarakin; man oko mino Yesu likame oko twero bobo donyo i bomba moroni obe, do en gire eko donyo bedo i calo, di jo oko donyo bino bute di kiwok ki adulion dedede.

Currently Selected:

Marako 1: BILKDC13

Highlight

Copy