Matayo 20

Agole me Jotic me Poto me Olok

1“Pien Ajakanut me malo cal bala won poto kame bin odilo yai ot mono jotic pi bino tic i poto mere me olok. 2Ingei winyere kede jotic pi culo gi ngat acelacel denari acel pi ceng acel, en eko cwano gi i poto me olok. 3Tetu esawa adek me odiko en eko yai ot, di eko neno jo mogo da di tie cungo acunga i atale abongo timo tic moro. 4En eko waco ne gi be, ‘Wuda otunu i poto me olok, ango abino mino wu cul aber.’ Gin kiko ot. 5En eko ot timo bobo kamanono esawa kanyape kede doko esawa kanyangon. 6Do tetu esawa tomon kiwie acel, en bin eko ot di eko udo jo ace di tie cungo; en eko penyo gi be, ‘Pinyo komio wun icungunu acunga kan abongo tic piny yuluyul?’ 7Gin kiko waco ne be, ‘Piento likame ngatamoro omio wa tic.’ En eko waco ne gi be, ‘Aso, wuda otunu i poto me olok.’

8 # Jolebi 19.13; Iswilia 24.15 “Di do otieno otuno, won poto oko waco ne ngat kame telo wi jotic be, ‘Lwong jotic iko gelo gi, igei kede jo kame komio tic i cen tuno kede but jo kame kogeo mino tic.’ 9Kakame jo kame oudo komio tic esawa tomon kiwie acel obino kede, oko culo ngat acelacel denari acel. 10Esawa kame jo kame oudo ogeo tic obino kede, oudo kiparo be gin kibino udo gikame kalamo; do oko culo gida ngat acelacel denari acel. 11Do Kakame kigamo kede cul gi, kiko donyo piem kede won poto 12di kiwaco be, ‘Jo kame obino i cen gi otio pi esawa acel kenekene, di in iko culo gi rom aroma kede wan, do di wan otio i dier ceng aliet piny yuluyul.’

13“Do en eko dwoko ne ngat acel kikom gi be, ‘Diera, likame tie gimoro arac kame ango atimo ni; mam oudo awinyere kedi pi tic ceng acel lung di ako culi denari acel? 14In gam cul kame maki di iko ot. Ango ayei pi culo jo kame obino i cen gi di rom aroma kede wu. 15Iparo be oudo ango ali kede akarunikin me tic kede lim na bala kame cunya mito? Arabo nyeko omaki i koma pi bercunya?’ ”

16 # Matayo 19.30; Marako 10.31; Luka 13.30 “Iepone nono jo me ajikini bino bedo me agege, kede jo me agege bino bedo me ajikini.”

Yesu Owaco Kop me To mere Tien me Adek

(Marako 10.32-34; Luka 18.31-34)

17Bin di Yesu tie ot Yerusalem, etero josiao tomon kiwie are kargi ken gi, eko waco ne gi di oudo kitie ot i yongayo be, 18“Winyunu, wan otienu ot Yerusalem, di oko bino mino Wot ka dano i cing jodongo me josaseredoti kede jopwony me Iswil. Gin kibino ngolo ne kop me to, 19kiko mine i cing jo kalikame Iyudayan, kame bino timo ne tim me anywar kede dane, di kiko gure i kom musalaba, do oko bino yaruno en i ceng me adek.”

Gikame Toto me Josiao Are Okwao kibut Yesu

(Marako 10.35-45)

20Di do toto me awobe ka Sebedayo oko ot but Yesu kede awobe mege, di eko riondiko i nyime eko kwane pi mine gimoro.

21Yesu oko penye be, “Nyo en kame in imito?” En eko waco ne Yesu be, “Sikano be kikom awobe na are gi, acel bino bedo i badi tetu cam kede ocelu i badi tetu ngodal i Ajakanut nin.”

22Do Yesu oko dwoko ne gi be, “Wun likame ingeunu gikame itienu kwano. Benyo, itwerunu wuda mato ikopo me can kame ango ayapuno mato?” Gin kiko dwoko ne be, “Wan otwero.”

23Yesu oko waco ne gi be, “Ateteni ibinunu mato ikopo na me can, do ango likame atie kede akarunikin me mino ngatamoro bedo i bada tetu cam kede tetu ngodal. Do kabedo nogi tie pi jo kame Papa na otieko iiko ne gi.”

24Kakame josiao icegun tomon owinyo kede kop noni, kiko lilo kede imiegu are nogo. 25#Luka 22.25-26Do Yesu oko lwongo gin dedede bute, di eko waco ne gi be, “Wun ingeunu be jo kame pugo jo kalikame Iyudayan pugo gi tetek, doko da jodongo gi tie kede akarunikin i kom gi. 26#Matayo 23.11; Marako 9.35; Luka 22.26Man likame epone kame miero ebed kede i diere wu, do ngat kame mito bedo dano kame pire dwong kikom wu, miero ebed ngatic wu. 27Doko ngat kame mito bedo me agege i diere wu, miero ebed epasoit wu, 28bala kite kame Wot ka dano da likame obino kede pi jo timo ne tic, do en ebino pi timo tic ne jo icegun, kede pi jalo kuo mere pi lako jo atot.”

Yesu Ocango Imuduka Are

(Marako 10.46-52; Luka 18.35-43)

29Bin di Yesu kede josiao mege oudo tie yai ki bomba me Jeriko, ekodet me jo oko lube. 30Kikano, imuduka are kame oudo tie bedo i nget yongayo oko winyo be Yesu oudo tie beo kanono, kiko cako ilelem be, “Wot ka Daudi, Okwe mi kisa maki kede wa!”

31Ekodet me jo oko donyo cokocoko gi di waco ne gi be kilingi. Do gin kiko medo ilelem ameda be, “Rwot, Wot ka Daudi, Okwe mi kisa maki kede wa.”

32Yesu oko cungo di eko lwongo gi di ewaco be, “Imitunu be ango atim ne wu nyo?”

33Gin kiko waco ne be, “Rwot, mi wang wa yabere.”

34Kisa oko mako Yesu kede gi, en eko mulo wang gi, cucuto di do wang gi oko cako neno piny, di do kiko lube.

Currently Selected:

Matayo 20: BILKDC13

Highlight

Copy