Luka 12

Yesu Omio Ikwenyar i kom Ecuke

(Matayo 10.26-27)

1 # Matayo 16.6; Marako 8.15 I kare no di ekodet me jo kame oudo romo tutumian kede tutumian ocokere karacel, kame oko mino oudo do kitie nyonyono jo icegun; me agege mere, Yesu oko cako waco ne josiao mege be, “Gwokerenu kikom arup me Iparisayon, kame obedo ecuke gi. 2#Marako 4.22; Luka 8.17Likame tie gimoro kame koumo, kalikame kobino nyuto kakaler, doko likame tie gimoro kame kokano kalikame bino ngere. 3Pi mano, gimoroni kame iyamunu i kakacol, kobino winye i lero, doko kope kame iweweunu i mung i agola, kobino tatamo gi ki wi ude.

Ngat kame Poore Alwora

(Matayo 10.28-31)

4“Jowota, awaco ne wu be, kur ibedunu kede lworo i kom jo kame neko kom, di likame kiko twero doko timo gimoro ingei mano. 5Do ango ayaro kwenyaro wu i kom ngat kame poore ilworunu: lworunu Rubanga, ngat kame ingei neko etie kede twer me uco i mac kalikame to. Ebo, awaco ne wu be lworenu!

6“Mam omobilo kany kocato pi siringi are? Do di likame tie acel moro kikom gi kame wi Rubanga wil kede. 7Kiton yer me wi wu da kotieko maro. Kur ibedunu kede lworo moro; pien wun piru tek kalamo omobilo atot.

Tuco Yei i kom Kirisito kede Dage

(Matayo 10.32-33; 12.32; 10.19-20)

8“Aniango wu be, ngat acelacel kame tuco i nyim jo be en ebedo ngat kame luba, Wot ka dano da bino tuco be en engee i nyim imalaikan ka Rubanga; 9do ngat kame bino daga i nyim jo, Wot ka dano da bino dage i nyim imalaikan ka Rubanga.

10 # Matayo 12.32; Marako 3.29 “Doko ngat acelacel kame yamo kop arac i kom Wot ka dano, kobino sasiro en, do ngat kame yamo kop me anywar i kom Tipo Kacil, likame kobino sasiro en.

11 # Matayo 10.19-20; Marako 13.11; Luka 21.14-15 “Doko kame kikelo wu pi pido wu i sinagogan, arabo i nyim jotel, amotoko i nyim wegi twer, kur ibedunu kede par i kom gikame ibinunu dwoko, arabo epone me dwoko, amoto gikame ibinunu waco; 12pien Tipo Kacil bino pwonyo wu iesawa nono gikame ipoorenu waco.”

Agole me Ngabar Aming

13Icuo acel oko waco ki dier ekodet be, “Apwony, wac ne omina pok keda jame kame wan osikao.”

14Do Yesu oko dwoko ne be, “Ngawota, ngai en komia twer me bedo ngangolkop arabo ngat kame poko ne wu jame?” 15Di en eko waco ne gi be, “Gwokerenu ki kom par dedede pi jame; pien likame kuo me dano cungo i kom rom me jame kame en etie kede.”

16Di Yesu oko tatamo ne gi agole moro be, “Lobo me icuo ngabar moro bin oceko ne cam atot adikinicel; 17en eko donyo do paro i cunye kene be, ‘Abino timo benyo? Pien likame tie karamoro kame aromo keto iye cam na gi dedede.’ 18Di do en eko waco be, ‘Ango nan do abino timo kaman, ayaro tuturo dere na gi, di ako gero adongodongo mege, en kame ako do coko iye cam na kede jame na dedede. 19Di do ako waco i cunya kena be, nen atie do kede jame dedede abeco kame amito pi mwakini atot. Wek do aud alakanar, acami, doko amati, di ako bedo kede yomcuny.’ 20Do Rubanga oko waco ne be, ‘Ngamingo, iwor me tin noni komito kwanyo kuo ni; nan do jame kame in idiato go bino bedo me ka ngai?’ ”

21Di do Yesu oko ngetakino yamo mere di ewaco be, “Gi noni en kame bino timere ne dano kame diato abar mere pire kene, do di likame ebaro i nyim Rubanga.”

Bedo kede Gen i kom Rubanga

(Matayo 6.25-34)

22Di Yesu oko waco ne josiao mege be, “Pi mano, ango awaco ne wu be, kur ibedunu kede par pi kuo wu, pi gikame ibinunu camo, arabo pi komu, pi gikame ibinunu ngapo. 23Pien kuo pire tek kalamo cam, doko kom pire tek kalamo giangapa. 24Nenunu ber agak, gin likame kicuo kodi, doko likame kikao da; gin ki li kede ude me kano cam arabo dere, do Rubanga pito gi. Do wun piru tek kalamo winy tien adi! 25Ngai ber kikom wu, pi bedo kede par atot, etwero medo ceng mege me kuo?#12.25 arabo pi bedo kede par atot, etwero medo dongo me kome? 26Ka ber in likame itwero timo gikame titidi no, pinyo kame mio ibedo kede par pi jame ace? 27#1 Abakai 10.4-7; 2 Iyutun 9.3-6Neningo ber kite kame ature me itela dongo kede; gin likame kipuro, doko likame kiwio ausi. Do awaco ne wu be, akadi Abaka Sulumani kede deyo mere dedede oudo likame ngapere bala ature nogo. 28Aso, ka Rubanga ngapo lum kame kuo i itela tin, diki di doko oko wango gi i mac, nan do ebino ngapo wu kalamo gin tien adi. Yei wu tin nok benyo!

29“Pi mano, kur ibedunu mono giacama kede giamata, doko kur ibedunu kede par i cunyu. 30Pien atekerin me piny mo gi nogi, doko Papa wu ngeo be wun imitunu gi nogi. 31Do akaka mano, mounu kong Ajakanut ka Rubanga, di do gigi da ko bino bedo megu.

Abar kame tie i Malo

(Matayo 6.19-21)

32“Kur ibedunu kede lworo, in ekodet atitidi, pien Papa wu tie kede yomcuny pi mino wu Ajakanut. 33Catunu jame wu di ikounu konyo kede jocan; bedunu kede isaun kalikame twero ti me sente, di ikounu kano abar wu malo kakame kei li kiye, kakame ngakuwo likame twero tuno iye, akadi ajekel da likame twero dubo gi kiye. 34Pien kakame abar ni tie iye, en kame cunyi da bino bedo iye.

Jotic kame Kio Piny

35 # Matayo 25.1-13 “Bedunu di itiekunu iikere pi tic, doko di italan wu tie liel, 36#Marako 13.34-36di itienu bala jo kame tie kuro dwogo me ngadwong gi ki ebaga me nyom, tetekeny kame edwogo di eko kukungo ekeko, kitwero yabe oyotoyot. 37Kitie kede winyo jotic kame ngadwong gi bino dwogo di eko udo gi di kineeno; ateteni awaco ne wu be, en ebino dolo egoe mere etweo i piere di eko mino gi kibedo piny kacam, di eko poko ne gi cam. 38Jotic nogo tie kede winyo ka ngadwong gi nono bino udo gi di kitieko iikere, akadi edwog i dier iwor amotoko obai. 39#Matayo 24.43-44Do miero ingeunu be, koto di oudo won ot ngeo esawa kame ngakuwo oyaro bino kede, oudo koto egwokere di likame eko weko koturo ode. 40En komio wuda miero ibedunu di itiekunu iikere, pien Wot ka dano bino ngoole dwogo iesawa kame wun likame ingeunu.”

Ngatic Agenere amoto kalikame Genere

(Matayo 24.45-51)

41Petero oko penyo Yesu be, “Rwot itie yamo agole noni pi wan kenwa, arabo pi jo dedede?”

42Rwot oko dwoko ne be, “Ngai ber en kame ngagwok kame genere doko di eriek, kame ngadwong mere kete daro ode kede jame dedede kame tie iye, pi mino jotic icegun cam iesawa kopoore? 43Etie kede winyo ngatic nono ka ngadwong mere bino dwogo ko ude di etie timo kamanono. 44Ateteni awaco ne wu be, en ebino keto ngatic nono pi lono jame mege dedede. 45Do ka ngatic nono oko cako yamo i cunye kene be, ‘Ngadwong na likame oyaro dwogo sek,’ di do en eko cako bungo jotic icegun acuo kede amon, di eko donyo gire cam kede amata di emer, 46ngadwong me ngatic nono bino ngoole dwogo i ceng kalikame en egeno be eromo dwogo iye kede iesawa kame en ekwia, di eko bino mine alola atek di eko ribe i kom jo kalikame genere.

47“Doko ngatic kame oudo ngeo gikame ngadwong mere mito, do di likame en eko iikere arabo timo, kobino bunge adikinicel. 48Do ngatic kalikame oudo ngeo gikame ngadwong mere mito, di en eko donyo timo gikame romo mino kobunge, kobino bunge momot. Pien ngat kame komio atot, kobino penyo atot da kibute; doko ngat kame kogeno kede atot, kobino da penyo atot kalamo kibute.”

Yesu Okelo Apokapoka

(Matayo 10.34-36)

49Di Yesu oko waco be, “Ango abino pi kelo mac i lobo, do oudo amito be koto nan di etieko cako liel. 50#Marako 10.38Ango atie kede batisimu kame kopoore batiso ango kede, do cunya li kede anapakin tuno kede di etieko cobere! 51Iparunu be ango abino pi kelo mulem i lobo? Awaco ne wu be li gire, kom ango akelo apokapoka. 52Pien cako nan, paco kame jo tie iye kany bino pokere, jo adek bino dagi jo are, di jo are da ko bino dagi jo adek. 53#Mika 7.6Papa bino dagi wode, doko awobi da bino dagi papa mere; toto bino dagi nyare, di nyako da ko dagi toto mere. Toto me awobi bino dagi dako ka wode, doko dako me awobi da bino dagi toto me cware.”

Ngeno Kare

(Matayo 16.2-3)

54Doko Yesu oko waco ne ekodet me jo be, “Ka wun inenunu idoun di tingere malo ki tetu potoceng, esawa nono di icakunu waco be, ‘Kot oyaro cwei’; doko di eko cwei da. 55Doko ka inenunu yamo kame buko di wok ki tetu piny, iwacunu be, ‘Piny do oyaro doko liet’; doko di eko timere da. 56Wun joecuke! Ingeunu gonyo dwong me gikame tie timere ka inenunu cal me malo kede me piny, do pinyo ber komio likame itwerunu neno kare noni di ikounu ngeno gonyo dwong me gikame tie timere?”

Poro Kop kede Ngat kame tie Pidi

(Matayo 5.25-26)

57Yesu doko oko waco be, “Pinyo ber komio likame wun itwerunu ngeno poko gikaber? 58Ka itie ot i nyim ngangolkop di itie upere kede ngat kame tie pidi, tamakino kede teko pi ber poro kede kop i yongayo me wek kur eteri i nyim ngangolkop, di ngangolkop ko mini i cing sirikale kame ko bino rwaki i otkol. 59Awaco ni ateteni be, likame ibino wok ki kuno tuno kede di iculo sente dedede kame kotangi kede.”

Currently Selected:

Luka 12: BILKDC13

Highlight

Copy