Yokana 12

Maria Owiro Yesu kede Mo i Betania

(Matayo 26.6-13; Marako 14.3-9)

1Di oudo odong ceng kanyape tuno i Ebaga me Kalamo, Yesu oko ot Betania kakame oudo Lasaro bedo iye. Lasaro en oudo icuo kame Yesu oyaruno kikom jo oto. 2Gin kiko iiko ne Yesu cam me otieno, di Marita oko toko; Lasaro da oudo ngat acel kikom jo kame oudo tie kacam kede Yesu. 3#Luka 7.37-38Maria oko kwanyo cupa acel lung me mo kame kolwongo be nardi, kame wel mere tie malo adikinicel, en eko onyo i tien Yesu, di eko donyo weweo kede yer wie. Ngwece me mo nono oko wosun oromo ot dedede. 4Yuda Isikariot kame oudo obedo ngat acel kikom josiao ka Yesu, ngat kame oudo oyaro rupao en, oko penyere be, 5“Pinyo bo komio oudo likame kocato mo kikukuny noni i wel me denari tol adek di oko mino jocan?” 6En eyamo kamano likame piento en oudo eparo pi jocan, do piento en oudo ngakuwo. En oudo bin edaro isau me sente di elwidaro gikame koketo iye.

7Do Yesu oko waco be, “Wun wekunu dako no bedi, wekenu ekan mo no tuno kede ceng me yika. 8#Iswilia 15.11Wun itienu kede jocan nakanaka, do ango likame abino bedo kede wu nakanaka.”

Jo Oporo Kop me Neko Lasaro

9Kakame ekodet adwong me Iyudayan owinyo kede be Yesu oudo tie Betania, gin kiko ot kuno, likame pi neno Yesu kenekene, do pi neno Lasaro da, ngat kame Yesu oudo oyaruno kikom jo oto. 10Di do jodongo me josaseredoti oko cako iiko tam me neko Lasaro da, 11pien Iyudayan atot oudo tie weko gin pire di kidonyo yei Yesu.

Yesu Odonyo Yerusalem bala Abaka

(Matayo 21.1-11; Marako 11.1-11; Luka 19.28-40)

12Oru mere, ekodet adwong kame oudo obino i ebaga oko winyo be Yesu oudo tie bino Yerusalem. 13#Sabuli 118.25, 26Kikano jo oko jako jange me otit, kiko ot pi riamo kede en di kilelemo be, “Osana!#12.13 Osana dwong mere be lak wa nan. Etie kede winyo ngat kame bino i nying Rwot; Rubanga mi winyo but abaka me Isirael!”

14Yesu oko udo atin me punda, en eko yito ingee, bala kame iwandik kacil waco kede be,

15 # Sakaria 9.9 “Kur ibedunu lwor wun jo me Sion.

Nenunu, abaka wu ine tie bino,

di ewanano atin me punda!”

16Josiao mege bin likame oko niang dwong me gigi i agege; do i kare kame oko yaruno kede Yesu i deyo ka Rubanga, gin kiko yutuno be oudo kowandiko gi nogi be bino timere i kom en, doko da di jo oko timo ne.

17Ekodet me jo kame oudo tie kede Yesu kakame oudo elwongo kede Lasaro ooko ki ates di eko yaruno en kikom jo oto, oko mino ijura i kom gi dedede kame oudo otimere. 18Gikomio ekodet oko ot pi riamo kede Yesu en ine be, gin oudo kiwinyo be en kame bin etimo gianena nogi. 19Iparisayon oko donyo waco ken gi ken gi be, “Nenunu, wan nan likame obinunu twero timo gimoro akadi acel, pien piny dedede do tie lube!”

Jogurik mogo Omoo Yesu

20Jogurik mogo da oudo tie i kom jo kame oudo ooto Yerusalem pi woro Rubanga i kare me ebaga. 21Gin kiko ot but Pilipo ngat kame oudo owok ki Betesaida, kame tie Galilaya, di kiko waco ne be, “Adwong, wan omito neno Yesu.”

22Pilipo oko ot di eko waco ne Anderia, di Anderia oko upere kede, di kiko ot waco ne Yesu gikame Jogurik oudo owaco. 23Yesu oko dwoko negi be, “Esawa do nan otieko tuno kame koyaro mino kede deyo i kom Wot ka dano. 24Ateteni awaco ne wu be, ka likame nyige me kal opoto i lobo di eko to, en ebino dong di etie acel kamanono; do ka eto, ebino nyako nyige atot. 25#Matayo 10.39; 16.25; Marako 8.35; Luka 9.24; 17.33Ngat kame maro kuo mere bino kei, do ngat kame dagi kuo mere i piny kan, udo en ekane pi kuo kame bedo nakanaka. 26Ka ngatamoro mito tic pira, poore en eluba, tetekeny kakame ango abedo iye, en kakame ngatic na da bino bedo iye. Di do Papa na ko bino nyuto wor i kom ngat nono.

Yesu Owaco Kop kame mako To Mere

27“Nan cunya tie kede peko. Nan do awac benyo? Benyo, awac be, ‘Papa, laka ki esawa me can noni?’ Li, pien kop noni en komio ango atuno iesawa ni. 28Papa, mi deyo bed i nyingi.”

Dwan oko winyere di waco ki malo be, “Ango atieko mine deyo, doko abino medo timo kamanono.”

29Ekodet kame oudo tie cungo kuno oko winyo dwan nono, di kiko waco be manono oudo mwoc me kot, do mogo oko waco be, “Malaika en oyamo kede!”

30Do Yesu oko dwoko ne gi di ewaco be, “Dwan ni likame oyamo pira, do piru. 31Nan do en esawa me ngolo kop ne piny kan. Rubanga oyaro riamo ngat kame lem pugo piny kan tenge. 32Doko kame kotinga malo ki piny kan, abino coko jo dedede buta.” 33En eyamo kaman pi nyuto epone kame oudo eyaro to kede.

34 # Sabuli 110.4; Isaya 9.7; Esekeri 37.25; Danieri 7.14 Ekodet oko dwoko ne be, “I Iswil wa, wan owinyo be Kirisito bino bedo kede wan nakanaka. Epone nyo do komio in iwaco be poore ting Wot ka dano malo? Wot ka dano noni do en ngai?”

35Kikano Yesu oko waco negi be, “Lero pwodi tie kede wu pi kare moro acecek, miero iotunu di pwodi lero tie kede wu, tetekeny kur colo nguk wu; pien dano kame tie ot i colo likame ngeo kakame etie ot iye. 36Wun miero do iyeunu lero, di nan pwodi etie kede wu, tetekeny ibedunu idwe me lero.”

Jo Odagi Yei Yesu

Ingei yamo kope go, Yesu oko yai di eko ot pwono ne gi. 37Bed bala Yesu oudo otimo gianena atot i nyim gi, do likame gin kiko yei en; 38#Isaya 53.1 manono en komio kop kame enabi Isaya bin owaco ocobere kakare be,

“Rwot, ngai en koyei kop kame wan owaco?

Doko ngai en kame Rubanga onyuto twer mere bute?”

39Pi mano, omio gin likame kiko yei, pien Isaya oudo bobo oko waco be,

40 # Isaya 6.10 “Rubanga otieko umo wang gi,

doko etieko cego tam gi,

ka koto oudo likame kamanono, koto wang gi okaruno neno,

doko koto wi gi da oniang, di kiko lokere buta

di ango ako cango gi.”

41Isaya bin oyamo kope nogi pien oudo etieko neno deyo ka Yesu di eko yamo kope kame make.

42Bed bala kamanono da, jotel me Iyudayan atot oko yei en, do pi lworo Iparisayon oko mino likame kiko tuco yei gi nono, tetekeny kur riam gi tenge ki sinagoga. 43Pien oudo gin kimaro pak me dano kalamo pak kame yai kibut Rubanga.

Kope ka Yesu bino Ngolo ne Jo Kop

44Yesu oko yamo kede dwan amalo di ewaco be, “Ngat kame yei ango, udo likame eyei ango do udo eyei ngat kame oora. 45Doko ngat kame nenango, udo eneno ngat kame oora. 46Ango abino i piny bala lero, tetekeny ngat kame yei ango kur dong di etie i colo. 47Ka ngatamoro owinyo kope na di likame eko lubo gi, ango likame angolo ne kop, pien ango likame abino pi ngolo kop ne piny, do pi lako piny. 48Ngat kame daga di likame emito gamo kop na, en etie kede ngat kame bino ngolo ne kop; doko kop kame ango ayamo en kame bino ngolo nen kop i ceng me ajikini. 49Pien likame ango ayamo man kede wia kena, do Papa ngat kame oora en kociko na, di emia gikame poore atatamo kede gikame poore awaci. 50Doko ango angeo be cik mere mio jo udo kuo kame bedo nakanaka. Pi mano, ango awaco gikame Papa ocika be ayami.”

Currently Selected:

Yokana 12: BILKDC13

Highlight

Copy