Yokana 11

To ka Lasaro

1 # Luka 10.38-39 Oudo bin tie icuo kame nyinge Lasaro, kame bedo Betania, tuwo oko make. Betania oudo obedo bomba kame Maria kede amin mere Marita bedo iye. 2#Yokana 12.3Maria nono en kame bin oudo owiro Rwot kede mo angwe kur, di eko weweo tiene kede yer me wie; en nono kame omin mere Lasaro oudo tuwo.

3Amiegu nogo oko cwano kop but Yesu di kiwaco ne be, “Rwot, ngawoti kame imaro tuwo twatwal.”

4Do kakame Yesu owinyo kede kop noni, en eko waco be, “Tuwo no likame obino pi neko Lasaro, do pi kelo deyo kakame Rubanga tie iye, tetekeny mi deyo but Wot ka Rubanga pire.”

5Yesu oudo maro Marita kede amin mere Maria karacel kede Lasaro. 6Aso, kakame ewinyo kede be Lasaro oudo tuwo, en eko meede bedo kakame oudo etie iye pi ceng are. 7I cen mere, Yesu oko waco ne josiao mege be, “Odokunu ber bobo Yudea.”

8Josiao mege oko dwoko ne be, “Apwony, kom in nyoronyoro ni Iyudayan oudo mito didipo in kede kide, pinyo komio in imito bobo dok kuno?”

9Yesu oko dwoko be, “Mam ceng acelacel tie kede isawan tomon kiwie are? Jo kame tie ot iceng likame buo tien gi, pien udo kineno lero me piny kan. 10Do jo kame tie ot iwor di piny col, kitwomo tien gi, pien udo lero li.” 11Yesu bin owaco kop noni di eko meede kede yamo be, “Ngawot wa Lasaro do otieko nino, do ango ayaro ot cene.”

12Josiao mege oko waco ne be, “Rwot, ka enino ebino cei.”

13Aso Yesu oudo tie waco kop i kom to ka Lasaro. Lasaro oudo otieko to, do josiao oudo paro be amoto etie yamo nino me wei. 14Di do Yesu oko kenyakino ne gi be, “Lasaro otieko to, 15do ango cunya yom piru, pien ango likame oudo atie kuno, manoni otimere tetekeny iyeunu. Do wan ootunu bute.”

16Tomasi (kame bin kolwongo be Bangi) oko waco ne josiao wad gi be, “Ootunu wada wek otounu karacel kede en.”

Yesu en Iyarun kede Kuo

17Kakame Yesu otuno kede, en eko udo be Lasaro oudo otieko ceng ongwon i ates. 18Betania oudo iyapiyapi kede Yerusalem, bala mairo are. 19Iyudayan atot oudo obino pi cungo ne Marita kede Maria, pi kweno cuny gi pi to me omin gi.

20Kakame Marita owinyo kede be Yesu oudo tie bino, en eko ot pi riamo kede en i yongayo; do Maria oko dong bedo i ot. 21Marita oko waco ne Yesu be, “Rwot, koto oudo in itie kan, kom koto omina likame oto. 22Do ango angeo be akadi nan da, gimoroni dedede kame in ikwao kibut Rubanga, en ebino mini.”

23Yesu oko dwoko ne be, “Omini bino kuo bobo.”

24Marita oko dwoko ne be, “Ango angeo be en ebino yaruno i kuo bobo i ceng me ajikini.”

25Do Yesu oko waco ne be, “Ango en iyarun kede kuo, ngat kame yei ango bino kuo akadi di eto; 26doko ngatamoroni kame nan kuo di eyei ango, likame ebino to. Benyo, iyei kop noni?”

27Marita oko dwoko be, “Ebo Rwot, ango ayei be in en kame Kirisito, Wot ka Rubanga, kame oudo poore bino i piny.”

Yesu Okok

28Ingei Marita yamo kamano, en eko ot lwongo amin mere Maria di eko weweo ne be, “Apwony kara tie kan, etie lwongi.” 29Kakame Maria owinyo kede kamano, en eko yai eonyaro ot pi riamo kede. 30(Yesu oudo pwodi likame otuno i paco nono, do oudo pwodi etie kakame Marita oriamo kede iye noca.) 31Iyudayan kame bin tie bedo kede Maria i ot di kidio cunye oko neno Maria oyai malo awakawaka di eko donyo ooko; gida kiko lube di kiparo be oudo etie ot koko i ates.

32Di bin Maria otuno kakame Yesu oudo tie iye, eneno Yesu di eko riebere piny i tiene kanono di eko waco ne be, “Rwot, koto oudo ibino kan sek, koto omina likame oto!”

33Kakame Yesu onene kede di etie koko, karacel kede Iyudayan kame bin en eupere kede da di tie koko, apil oko make, cunye oko dubere adikinicel. 34En eko penyo gi be, “Iyikenu tuai?”

Gin kiko dwoko ne be, “Rwot bia ineni.”

35Yesu oko kok. 36Di Iyudayan oko waco be, “Nenunu kite kame oudo emaro kede Lasaro.”

37Do mogo kikom gi oko donyo yamo ken gi ken gi be, “En ngat kame bin eyabo wang emuduk, mam oudo etwero gengo icuo ni kur toi?”

Yesu Oyaruno Lasaro

38Cwercuny atek bobo oko mako Yesu, di eko ot i ates kame oudo tie i abo kame koumo doge kede kidi ati. 39Yesu oko waco be, “Kwanyunu kidi no tenge.” Do Marita, amin me icuo kame oudo oto oko dwoko ne be, “Rwot, nan eromo do doko ngwe, pien etieko do nan ceng ongwon i ates.”

40Yesu oko dwoko ne be, “Mam oudo awaco ni be ka iyei ibino neno deyo ka Rubanga?”

41Jo mogo kikom gi oko kwanyo kidi tenge ki dog ates, Yesu oko neno malo di eko waco be, “Apwoyi Papa, pien in itieko winya. 42Ango oudo angeo be in nakanaka iwinya, do ango atie yamo man pi jo kame nan tie cungo kan gi, tetekeny gin kiyei be in en kame iora.” 43Ingei waco kope nogi, en eko redo kede dwane amalo be, “Lasaro, wok ooko.” 44Lasaro oko wok ooko di kotweo cinge kede tiene kede egoe kame koyiko kede jo oto, di koboo kiton wange da kede egoe. Yesu oko waco ne gi be, “Gonyenu iwekenu eoti.”

Koporo Kop me Neko Yesu

(Matayo 26.1-5; Marako 14.1-2; Luka 22.1-2)

45Iyudayan atot kame oudo obino kede Maria oko neno gikame Yesu oudo otimo, di do kiko yei en. 46Do mogo kikom gi oko ot but Iparisayon, di kiko tatamo ne gi gikame Yesu otimo. 47Di do Iparisayon kede jodongo me josaseredoti oko lwongo kansulo, di kiko waco be, “Nyo kame wan poore otimunu? Nenunu do twon gianena kame icuo ni tie timo. 48Ka wan oyei ne meede anyim kede timo gigi, jo dedede bino yei en, di do Joroma ko bino tuturo tempulo wa kede ateker wa da!”

49Do ngat acel kikom gi, kame oudo nyinge Kayapa, kame bin oudo obedo Ngatel Josaseredoti i mwaka nono, oko waco be, “Wun kom likame ingeunu gimoro akadi acel. 50Benyo, likame iniangunu be eber ne dano acel to pi jo akaka weko piny dedede to?” 51En likame oudo etie yamo kamano pi wie kene; do bala kite kame en oudo etie Ngatel Josaseredoti i mwaka nono, oudo en etie do murao be Yesu oyaro to pi Iyudayan, 52do likame pi gin kenekene, do pi coko idwe ka Rubanga kame osarakin obukui pi doko jo acel.

53Cako cenge no, di do jotel me Iyudayan oko donyo mono epone me neko Yesu. 54Pi mano, Yesu likame oko meede ot i kakaler i dier Iyudayan, do en eyai eko ot i adul moro kame bin iyapiyapi kede tim, i bomba kame kolwongo be Epuraimu, kakame en eko bedo iye kede josiao mege.

55Ceng me camo Ebaga me Kalamo oudo odoko do iyapiyapi, jo atot oudo oyai ki miere ooto Yerusalem pi lonyere di ebaga pwodi likame otuno. 56Gin oudo kitie mono Yesu. Kakame bin gin kicokere kede i tempulo, kiko donyo penyere ken gi ken gi be, “Nan wun iparunu benyo, ateteni icuo ni oyaro bino i ebaga noni?” 57Jodongo me josaseredoti karacel kede Iparisayon oudo otieko ciko jo be, ka ngatamoro ongeo kakame Yesu tie iye, poore eter kop but gi awakawaka, tetekeny kimake.

Currently Selected:

Yokana 11: BILKDC13

Highlight

Copy