Tice 8

1Saulo da oudo oyei be nek Sitepano.

Saulo Otidilo Ekodet me Jokirisito

Ceng nono oko cako tidilo jo koyei Kirisito i Yerusalem, di gin kiko sarakin i adulion dedede me Yudea kede Samaria, joor kenekene en oko dong. 2Jo mogo kame bin keto cuny gi woro Rubanga en kame oko yiko Sitepano, di kiko koke kitek.

3 # Tice 22.4-5; 26.9-11 Do Saulo oudo tie tisilaro jo koyei Kirisito. En oudo ebedo donyo iot acelacel di epeo cuo kede mon kame bin oyei Yesu ooko, di emio korwako gi i otkol.

Pilipo Otuco Ejiri i Samaria

4Di do jo koyei Kirisito, gin jo kame bin osarakin, oko donyo ot di kipwonyo kop ka Rubanga. 5Pilipo bin oko ot i bomba me Samaria di eko tuco ne gi kop i kom Kirisito. 6Ekodet oko keto tam gi i kom kop kame Pilipo owaco, pien oudo kiwinyo doko kineno gianena mogo kame en oudo etimo. 7Pien tipo areco bin oko wok tenge kikom jo atot di kidwilao. Jo atot da kame bin tuwo oneko adulion me kom gi kede jo kongwalo oko cango. 8Manoni oko mino jo kame bin tie i bomba me Samaria oko bedo kede kilel adwong.

9Do oudo tie icuo moro kame nyinge Simoni, kame oudo ber ogeo bedo i bomba nono di etimo tangu me jwok. En eko mino Josamaria oure. En oudo ewaco ne gi be en dano moro kame pire tek. 10Jo dedede cako kibut jo me ruom apiny tuno kede but jo me ruom amalo, oko keto tam gi i yamo mere, di kiwaco be, “Icuo ni en twer ka Rubanga, kame kolwongo be Twer Adwong.” 11Di gin kiko keto tam gi i kome, pien pi kare alac gin kibedo uro tangu mere me jwok. 12Do kakame kiwinyo kede kop aber me Ajakanut ka Rubanga kede nying Kirisito kame Pilipo oudo tatamo, gin kiko yei di oko batiso gi, cuo karacel kede mon. 13Kiton Simoni da kikome oko yei Yesu Kirisito; ingei batiso en, en eko donyo upere kede Pilipo. Kakame eneno kede gianena kede giaura adongodongo kame Pilipo otimo, Simoni oko uro.

14Kakame joor kame oudo tie Yerusalem owinyo kede be Josamaria otieko gamo kop ka Rubanga, gin kiko cwano Petero kede Yokana but gi. 15Petero gini oko ot di kiko lego ne gi tetekeny kiud Tipo Kacil, 16pien cako lem likame pwodi oudo ebino i kom ngatamoro kikom gi, do kenekene oudo kobatiso gi i nying Rwot Yesu. 17Petero kede Yokana oko keto cing gi i wi gi, di do kiko pong kede Tipo Kacil.

18Kakame Simoni oneno kede be Tipo Kacil obino i kom joka, pien joor oudo oketo cing gi i wi gi, en eko kwanyo sente ne Petero kede Yokana, 19di ewaco be, “Okwe miunu ada twer noni, tetekeny ngat acelacel kame ada aketo cinga i wie, eud Tipo Kacil.”

20Do Petero oko waco ne be, “Sente ni rweny karacel kede kuo ni, pien in iparo be giamia ka Rubanga kowilo awila kede sente! 21In ili kede gikame ipoore timo arabo dul kame kopoko ni i tic wan noni, pien cunyi likame opoore i nyim Rubanga. 22Pi mano, swilaro ki gikarac no, di iko kwano Rubanga wek amoto esasiro in ki tam kame tie i cunyi. 23Pien ango nan atieko neno be in itie kede raco me ingobel, doko itieko doko epasoit me dub.”

24Di do Simoni oko dwoko be, “Legunu Rwot pira, tetekeny kur gimoro kikom kope kame wun iwacunu go timere i koma.”

25Ingei mino ijura kede pwonyo kop ka Rwot, Petero kede Yokana oko dok Yerusalem, di kiko donyo tuco ejiri i calere atot me Samaria.

Pilipo kede Ngatic Adwong me Abisinia

26Malaika ka Rwot oko waco ne Pilipo be, “Yai di iko ot tetu piny, i yongayo kame yai ki Yerusalem ot Gasa.” Yongayo noni oudo beo i tim. 27Pilipo oko yai di eko ot. Kikano, oudo tie ebwocit moro me Abisinia, kame bin obedo ngatic adwong kame lo kakame kokano iye lim ka Kandese.#8.27 Kandese en oudo nying abakai amon me piny me Abisinia. 28En oudo eoto Yerusalem pi woro Rubanga, nan oudo do etie dok di ebedo i wi cabala mere di esomo itabu ka enabi Isaya. 29Tipo Kacil oko waco ne Pilipo be, “Oti inok nget cabala no.” 30Pilipo oko ringo bute, en eko winyo di esomo itabu ka enabi Isaya. Pilipo oko penye be, “In iniang gikame itie somo no?”

31En eko dwoko ne Pilipo be, “Kara atwero niang benyo ka ngatamoro likame okonya?” En eko lwongo Pilipo pi yito malo bedo kede en i wi cabala. 32#Isaya 53.7-8 Adul me iwandik kacil kame en oudo etie somo noca somere be,

“Bala oromo kame kotie tero ot ngolo,

bala atin oromo kame ling alinga kame kotie nyaro yer mere,

en bin likame eyabo doge akadi acel.

33En bin kodwoko dwongo mere piny, di oko dagi ngolo ne kop me ateni.

Ngai kame twero mino ngec i kom ikwae mege?

Pien kotieko kwanyo kuo mere ki wi lobo.”

34Di do ebwocit nono oko penyo Pilipo be, “Waca, enabi ber tie yamo kope go i kom ngai, i kom en, arabo i kom ngat apat?” 35Pilipo oko cako yamo, di eko tatamo ne kop Aber i kom Yesu, di kong egeo kede iwandik kacil noni. 36Di bin gin kitie pwodi ot, kiko tuno i pii moro, di ebwocit nono oko waco ne Pilipo be, “Neningo, pii ine kan, nyo kara do kame genga udo batisimu?” 37(Pilipo oko waco ne be, “Man gire twerere, ka in iyei Yesu kede cunyi dedede.” Icuo nono oko dwoko ne be, “Ango atieko yei be Yesu Kirisito en Wot ka Rubanga.”)

38Di ebwocit nono oko waco be mi cabala ber cungi. En karacel kede Pilipo kiko ot donyo i yi pii, di Pilipo oko batiso en. 39Kakame do kiwok kede ki pii, Tipo ka Rwot oko rwenyo kede Pilipo, di ebwocit nono likame bobo oko nene, di eko meede kede ot mere di elelo. 40Do Pilipo oko udo be etieko tuno Asota. En eko bebeo i bomban dedede di etuco ejiri tuno en donyo Sisiria.

Currently Selected:

Tice 8: BILKDC13

Highlight

Copy