Mateo 27

Yesu pali Pilato nu kufwa kwi Yuda

(Mk 15:1; Lk 23:1-2; Yn 18:28-32)

1Nga pano wawa untoondo, ayikolo iyakapela yooshi na yikolo ya antu yafwaanga isha pali Yesu, ukuti yamumole. 2Nga yannyepa, yankolesha yantwala kwi Pilato, wino wali unnâsi.

3Apano Yuda, wiiwi wino wanfimiile, pano walola iyamputwila unndandu wa kufwa, umweeso uwela, wayapilusisha ayikolo iyakapela na ayikolo fiifi ifipaande vya mpia amakumi yatatu, 4walaanda waati: “Nononile pano nafimile uwaashi uno usi niifyo!” Leelo weene yannena, yaati: “Ala! Alaya nga yitu? Yalolange yao wenkola!” 5Wasumbile ifipande fiyo ifya mpia un-ng'anda-nkulu-iyi-Leesa, wampita waya waikulika. 6Ayikolo iyakapela yatola ifipande fiyo ifya mpia, yalaanda, yaati “Chitayiile ukushiwiika um-mbokosi ya mpia, kuno isha waashi.” 7Yafwaanga apalipoonga yafiombele ukukala ichaalo chi nakamata, chiwe icha kushiikaa yeeni. 8Ichino ichaalo chiyo ni leelo kweene chikulwitwa. “Ichaalo cha waashi.” 9Chaleka lyawa iswii lino kalausha Yelemia wafwanshile, ukuti: “Yatoshile ifipande amakumi yatatu fya mpia, umpangila waakwe wino wapangilwa, wino yamwi apa aIslaeli yanchitile umpangila. 10Yafiombela uku kukala ichaalo chi nakamata, ndi fino uMwene wantumile.”

Pilato waputula unndandu wi Yesu

11Nga Yesu awimilila apa unndâsi; nga unndâsi wantondosha, waati: “Weewe uli mweene wa a Yudea?” Na Yesu wannena, waati: “Weewe walaanda.” 12Leelo pano ayikolo iyakapela na akoombe yansitachi, atachili afwaange chimwi. 13Apano Pilato wannena, waati: “Chene! utapulike ifintu vinga fino yakwimikila?” 14Leelo weene atachili afwaange iswii naanti lyoonga; chaleka unndâsi wasunguka ndi.

15Nga apa waanda ukulu, unndâsi wali ni ntaambi ya kusapwiila iumba untu weenga wino wanyepwa, wino yakuunda. 16Nga pa maanda yaaya kweene pali untu unyepwa, wino walumbuka. Ishiina lyaakwe i Balaba. 17Nga pano yakongana, Pilato wayanena, waati: “Mulusita msapwile wini? Wiwi Balaba naanti Yesu, wino yakuluti Klisto?” 18Kuno wamanyile fino yantwashile uku usuwa.

19Nga pano walile atikala apa chisuumbi-cha-kuputwilaimilandu, unchi watumile untu ukunnena ukuti: “Utise uchite chimwi uku ntu wiyo uwa chuumi, kuno ilelo ninchuula ifyavula uku tulo uku ntu wiyo.”

20Nayo ayikolo iyakapela na koombe yachufyanya amaumba, kuti ayasapwiile Balaba, yumoole Yesu. 21Nga unndâsi wayanena, waati: “Mulushita msapwile wini pali ya yayili?” Yalanda yaati: “I Balaba!” 22Pilato wayanena, waati: “Nga inchite uli Yesu wino yaluti iKlisto?” Yalanda yooshi, yaati: “Aumoolwe!” 23Wafwaanga, waati: “Kuno ichaani? Uyifu chi! uno wachita?” Nga yalusha nkaani ukuma choongo nukuti: “Aumoolwe!” 24Nga pano Pilato walola chakoma ni mpansheela ilulu kukula, watola amaasi, wafulala amakasa yaakwe apiumba, waati: “Ineene nsimoo um-waashi wa ntu wi uwa chuumi; umupeleele mwe yakola.” 25Aantu yooshi yalaanda ukuti: “Uwaashi waakwe utupelele sweeswe ponga na ana yitu.” 26Apano wayasapwila Balaba, leelo wamuma Yesu ni mikowa, anfima ukuti yakamumoole.

Asalifi yasoweka Yesu

(Mk 15:16-20; Yn 19:2-3)

27Apano asalifi ya unndâsi yanseenda Yesu umu Pleitolio (alikuti: ng'anda yi Gavana) niumba lya asalifi yankonganila, 28nga yansuula umweenda waakwe, yanswika umweenda unkasuke. 29Yaluka inkata ya myoonga, yanswika uku ntwe. Nga yampa ilonje kwikasa lyaakwe ilya kwiluunji, yafukama panali, yansoweka, angi yaluuti: “Tulukulaula, mweene wa aYudea.” 30Nga yapuutila amati, yatola ilonje yamumauma nalyo apa ntwe. 31Nga pano yansoweka yansula umweenda ulye, yanswika imyeenda yaakwe, yanseenda ukuyumumoola. 32Nga lino yalufuma, yalola untu wa ku Kilene, ishiina lyaakwe Simoni; nga yanfyengelesha ukuti asende unsalaba waakwe.

Yesu wakonkomelwa apa nsalaba

(Mk 15:21-32; Lk 23:26-43; Yn 19:17-27)

33Nga pano yafika apantu pano yataangi Golgota, ulikuti: “Ipanga lya ntwe.” 34Yampa amaasi ya misabibu, yano yuminkine ni nyeengo, kuti anwe; leelo pano wasumpula wakana ukunwa. 35Nga pano yankonkomela apa nsalaba, yankanya imyeenda yaakwe, yachita chimala-mpaka, (ukuti liloleka lino ilau watasile, ukuti: Yankine imyenda yane apa yakola, na pa mwenda wane yachiti chimala-mpaka.) 36Nga yikala ukunndolela pao kweene. 37Nga yaandika amaandiko ya unndandu waakwe, yawika apiyulu apa ntwe waakwe, angi yaatile: “ALAWI YESU, MWEENE WA AYUDEA.”

38Liyo kweene aifi yayili yumoolwa poonga nawe, weenga ukwikasa lyaakwe ilya kwiluunji, na weenga ukwikasa lyaakwe ilya kuli kamani.

39Nga yano yapitaanga un-sila angi yaluntuka, angi yalupukusha imitwe yao, yaluti: 40“Weewe wino ukupomola ng'anda-nkulu-iyi-Leesa nu kuikuula uku maanda yatatu, uufyusye wenkola; ndiwe mwaana wi Leesa, wika uku nsalaba.” 41Na yikolo iyakapela nayo kweene yansoweka, poonga na yakaandika na akoombe, yaati: “Wafyushishe aanji, atangi aufyusha unkola. 42Ali mweene wa Islaeli ichino leelo awike uku nsalaba, neeswe twammsumila 43Wataila Leesa; ali leelo antule ndi wansipila, kuno wataangi: ‘Neene ndi Mwaana wi Leesa.’ ” 44Na yaaya kweene aifi yano yumolwa poonga nawe yalaanda fiyo kweene.

Yesu wafwa

(Mk 15:33-41; Lk 23:44-49; Yn 19:28-30)

45Nga fuma unsanya pakasi kuwa ichaanda un-nsi yooshi, kufika na pano lyateemba. 46Nga pano lyateemba, Yesu afwaanga. iswii uku maka, aati: “Eloi! Eloi! Lama sabaktani?” alikuti: Leesa wane! Leesa wane! Nga fino waanta? 47Na yamwi yano yali penepo, pano yapulika, yaati: “Alawi alwita Elia” 48Nga weenga liyo kweene awituka ulwilo, ayatola inkamu ayiombeka um-maasi masasalume, wayitunga ukwilonje, wannwesha. 49Anina yaati: “Leka, tulole ndi Elia alwiisa antule.” 50Nga pano Yesu wangula kayili ukwiswi nkaani, umweeso waputuka.

51Nga lolini, umweenda wa ng'anda-nkulu-iyi-Leesa yalepuka apakashi, ukufuma piyulu kufika na paasi; insi yatetema, amafiinga yalepuka. 52Amaliindi yayulike, imyiili tupu iya yasweepe yano yawisi, yakatuka 53Nga yafuma um-maliindi yao pa chisila cha kututuluka kwaakwe, yingila umunsi nsweefu, yaloleka uku aantu tupu.

54Nga unkulu wa asalifi na yalye yano yali poonga yalunnolelela Yesu, pano yalola ichitentema cha nsi na fino fyaombeka, yoopa nkaani, nga yaati: “Umwenemo, wi wali umwana wi Leesa.”

55Pao kweene pali na anachi tupu yalolaanga lwa patali, yao yano yalondile Yesu ukufuma uku Galilea nu kumwombela. 56Pali yeneyo pali Malia wa ku Mandala, nu Malia nyina wi Yakobo na Yosefu na nyina wa yana yi Zebedeo.

Yesu wazikwa mwilindi

(Mk 15:43-47; Lk 23:50-56; Yn 19:38-42)

57Na pano yawa amaangushi, awisa untu unsafi uwa ku Alimateo, ishiina lyaakwe i Yosefu, nawe kweene wali unnondeshi wi Yesu. 58Untu wiyo wayile kuli Pilato, aloomba ichaala chi Yesu. Apano Pilato walaanda apiwe. 59Yosefu watola ichaala, wachifuunda um-mweenda untiswe. 60Washiika umwilindi lyaakwe ipyaa, lino wimfile uku mwaamba, akunkulusisha ifiinga ikulu apa nndyango wi lindi, nga ampita.

61Pao kwene yalipo Malia wa ku Mandala nu Malia wiwi uwa uwili, yatenzi apipi nilindi.

Yakalolela yilindi

62Nu waanda wa uwili uli waanda uno walondelile uwaanda wa kuteya, ayikolo iyakapela na aFaliseo yakonganila Pilato. 63Yalaanda, yaati; “Mweene, twisukila fino wiiwi unchenjesu watakaanga pano achili umpuma, ati: ‘Ichisila cha maanda yatatu ndututuluka.’ 64Ichino utume iliindi lilolelwe niingo kufika amaanda yatatu, alondeshi yaakwe yaatize yamwiye, nu kunena antu, yaati: ‘Watatutuluka uku yafwi.’ Nu ufi wa chisila ululuta ufi wa ntangulo.” 65Pilato wayanena, waati: “Mulina asalifi, yangini mukalolele niingo fino mumanyile.” 66Nga yaaya ukuyulolelela niingo iliindi, uku kutela akamanyililo api fiinga liyo, poonga na asalifi yano yalulolela.

Currently Selected:

Mateo 27: FNT1988

Highlight

Copy