Milimo 14

1Nga chali uku Ikonio yingila ichaponga un-ng'anda yi Leesa iya aYudea, nga fino yavwanga, iumba ikulu ilya aYudea ni lya aGliki yazumila. 2Leelo aYudea yano yatasumile, yasongelekanya antu yakulukuwa, nu kuyalakalisya imyenzo chino chaipa uku yanina. 3Nga ikala kweneko amanda tupu, angi yaluvwanga uku chiposye uku maka ya Mwene, wino wimikile iswi lyaakwe ilya nkumbu zyaakwe, nu kuyapa ivilangizyo ni vipezya-mano viombeke uku makasa yao. 4Leelo iumba lya antu ya nzi lipalunkana. Yamwi yawile uku aYudea na yamwi uku mitume. 5Apano akulukuwa na aYudea ponga na ikolo yao yayakatukila, kuti yayachite iviipe nu kuyatama na mafinga. 6Nayo yachimanya yitukila uku Listela nu ku Delbe, imizi ya Likaonia, ninsi zya mbali mbali. 7Ikala kweneko angi yalusunda iswi-zipe.

8Nu ku Listela kwali untu umwi, waomboka, wikala itenda ukufuma unda i nyina, wino atachili apite nanti uche. 9Untu wiyo wampulikisya Paulo lino aluvwanga; nawe wankundwila maaso, alola fino untu wiyo ali nusumilo wa kupoziwa. 10Avwanga ukwiswi ikulu, ati: “Katuka uwimilile uku mulu yako!” Apano awimilila zuwa ampitana. 11Amaumba ya antu pano yalola chino Paulo wachita, yakuzya amaswi yao um-mvwango wa chiLikaonia, yaati: “Yaleza iyatwikila um-mwata wa antu.” 12Balanaba yaati, ali Zeusi, na Paulo, Yeme; kuno wali alikavwanga. 13Kapela wi Zeusi wino ing'anda yaakwe yali uku nkolelo ya nzi, aleta intwazi ni nkata zya malua apa nnyango wilinga, asita ukufima ivipelo ponga na maumba. 14Leelo imitume Balanaba na Paulo, pano yachimanya, yalepola imyenda yao, yituka ulwilo yaya ingila imwiumba, na kuno yaluma chongo, 15yaati: “Yatata, uku chani muluchita chi? Neswe kwene sweswe yantu ndi mwemwe; tulumusunda iswi-zipe, ukuti musenuke nu kuta ifintu vi ivya uwelewele, museleukile kuli Leesa uwa upuma, wino walenzile iyulu ni nsi na yemba ni ifintu vyonsi fino vili mwenemo. 16Wino amanda ya kali walekile antu ya misangano yoshi angi yalupita un-nzila zyao akola. 17Leelo atautile nanti kuumanyisya, kuno wamuchitile ivizipe, angi alumutonyezya isemba ukufuma umwiyulu, nu mmacha, angi alwikusya imyenzo yino ichakulya ni nsânsa.” 18Nu ku maswi yao yayalesya amaumba uku uchuzi, yatachiyapa ivipelo.

19Leelo aYudea iza ukufuma uku Antiokia nu ku Ikonio, yasongelela amaumba, apalinji yatama Paulo na mafinga, yamkwesela ukunzi ya nzi, yatangi watafwa. 20Leelo alondeshi pano yalile iyannizya konsi, akatuka, asuwila umunzi. Nu wanda wa uwili afuma mwenemo, apita ponga na Balanaba, aya ku Delbe.

Paulo na Balanaba yasuwila uku Antiokia

21Nga pano yasunda iswi-zipe umunzi uo, yapata alondeshi tupu, nga yawela uku Listela na ku Ikonio na ku Antiokia. 22Angi yalukomya alondeshi imyenzo, nu kuyasunda ikale um-usumilo uo na fino tulungime ukwingila um-wene-wi-Leesa uku nzila ya machulo tupu. 23Nga pano yayasolwela akombe um-makongani yoshi, nu kupepa ponga na kuuzilizya ichakulya, yayawika um-makasa ya Mwene, wino yamzumile. 24Yapita insi ya Pisidia apakasi, yafika uku Pamfilia. 25Nga pano yasunda iswi liyo uku Pelge, yapita uku Atalia. 26Apa kufuma kweneko, yaakwela um-wato yaya uku Antiokia, nako ukuno yalombilwe inkumbu zyi Leesa uku nnimo ulye uno yamalilile. 27Nga pano yaya, yakonganika ikongani, yayalandila ifintu vyonsi fino Leesa waomba ponga nayo, na fino watayulila akulukuwa unnyango wa kuya um-usumilo. 28Yikala kweneko amanda yasi mache ponga na alondeshi.

Currently Selected:

Milimo 14: FNT1988

Highlight

Copy