Milimo 10

Petlo na Koloneli

1Kwali untu umwi uku Kaisalia, isina lyaakwe i Koloneli, unkulu wiumba lya asalifi ya Italia, 2untu unchindamu, wa chopo kuli Leesa na ya ng'anda umwakwe yoshi, nawe wali nuwila tupu uku yantu, wapepanga Leesa manda yoshi. 3Pano lyatemba alola amalele apatiswe, amalaika wi Leesa alwiza nu kunnena, ati: “Koloneli!” 4Annolekesya, aopa nkani, ati: “Kwawa chani, Mwene!” Annena, ati: “Ukupepa kwako nuwila wako vyafika umwiyulu, mwizu kuli Leesa. 5Ichino tuma antu uku Yafa, uwite Simoni wino yakuluti Petlo, 6umweni wa ntu umwi, isina lyaakwe i Simoni, kanyuka wa mikwela, wino ing'anda yaakwe ili pipi na yemba.” 7Malaika wiyo wino wavwanzile nawe, pano wapita, Koloneli awita yamwi yaili apa yaomvi ya un-ng'anda yaakwe nu nsalifi wenga, untu wa nchishi kuli Leesa uwa pali yano yammombelanga manda yoshi. 8Na pano wayalandila ifintu fyoshi, wayatuma uku Yafa.

9Ngu wanda wa uwili pano yapitanga angi yapalamila unsi, Petlo akwela apidali ukuyupepa, nao wali unsanya pakasi. 10Insala imwaya nkani, asita ukulya; leelo pano vachili yateyanya chimwi, umweso waakwe upita akazye. 11Alola iyulu lyayulika, ni chivya chilwika wa mwenda unkulu, ulwikisiliwa uku masempele yaakwe yani fika na pansi. 12Uno mwenemo mwali inyama ni fikalakasi fyoshi ifya mulu yani, na fino vikulusela ni fyuni ifikulelemba. 13Ngiswi lisa kunali, liti: “Katuka Petlo, ufyule, ulye!” 14Leelo Petlo ati: “Awe Mwene, kuno ntachilindye nanti uche ichintu chimwi chino chaipe, nanti chino chikulyikisha.”

15Iswi lyamwisile ilya uwili, lyaati: “Vino Leesa wasilula wemwi utachiti ifisilishe.” 16Ichintu chi chachitika amaila yatatu, apa chisila ichifya chiyo chapokelelwa kaili umwiyulu.

17Nga Petlo pano channowana um-mweso wakwe, ichili chani amalele yao, yano walola, antu yalye yano yatumilwe na Koloneli, pano yatondosya ing'anda yi Simoni, yimilila pa nnyango. 18Yalaizya yatondosya, ndi Simoni wino yakuluti Petlo ngu muno alwikala.

19Nga Petlo welengulanga amalele yao, uMweeso wannena fino: “Kuli antu yaili yalukusita. 20Ichino katuka uwike, ulondekana nayo, utachopa, kuno inene njatumile.” 21Petlo awika uku yantu yao, ati: “Nene ndi wino mulunsita. Mwizile chani?” 22Yaati: “Koloneli unkulu wa yasalifi, untu wa chumi, wa chopo kuli Leesa; wino antu yoshi um-Yudea yamchindika; wanenilwe na malaika nswepe ukutuma antu kunuli, uye uku ng'anda ukwakwe, ukuti akapulikisye amaswi kunuli.” 23Ayapokelela, ayasezya.

Nu wanda wa uwili Petlo afuma apita ponga nayo, na yamwi apa yachitu yano yatenzi uku Yafa yalondekana nawe. 24Uwanda wa uwili yafika uku Kaisalia. Na Koloneli wayalolelanga, walile atita a luko lwakwe na ankula nachakwe. 25Pano Petlo alwingila, Koloneli afuma ukunkomanya, amfukamila nu kwinamila apa mulu yaakwe. 26Leelo Petlo amkatusya, annena, ati: “Wimilila, nene kwene nene ntu.” 27Nga pano aluvwanga nawe awingila un-ng'anda, alola antu tupu iyakongana. 28Nga ayanena, ati: “Nemwe akola mumanyile fino untu wino mYudea atangi auminkanye na antu yanji nanti ukuya kunali. Leelo Leesa atandanga fino ntangi ntake untu umwi fino uwa kulukuwa nanti uwa kukowezya. 29Ichino fiyo ngizile pano nitwa nanti kukana. Nga ndumutondosya, iswi uli lino mungitile?” 30Nga Koloneli ati: “Ilelo uwanda wa uni ukufuma lino napepaa Leesa un-ng'anda umwane, pano lyatemba. Liyo kwene untu umwi awimilila panondi, azwite imyenda ilumesamesa. 31Nawe ati: ‘Koloneli, ukupepa kwako kwapulikikwa, na mawila yako yelengulwa apa maaso yi Leesa. 32Ichino tuma antu yaye uku Yafa, yakite Simoni wino yakuluti: i Petlo; afikile un-ng'anda mwi Simoni kanyuka wa mikwela, umbali yi yemba.’ 33Ichino liyo kwene nakutumila; wachita chino chazipa ukwiza. Ichino swensi tulipo pa apa maaso yi Leesa, kuti tupulikisye amaswi yoshi yano unenilwe nu Mwene.”

34Petlo avwanga, ati: “Chumi, namanya fino Leesa asi nu nsumbo, 35leelo ali apa antu yoshi, nguntu wensi wino amchindike nu kuchita ivya chumi, akuluzumilwa nawe, 36kuyana niswi liyo lino watwalile ana ya Islaeli, angi alusunda iswi-zipe ilya kuwelezyana muli Yesu Klisto. Alu Mwene wa antu yoshi. 37Ichintu chiyo muchimanyile mwemwi, chino chalimba um-Yudea onsi, ukufuma uku Galilea, ichisila cha lubatizyo luno Yoane wasundanga. 38Amaswi yi Yesu wa ku Nazaleti, fino Leesa wampakile amafuta uku Mweso Nswefu na maka; nawe walîlanga ku na ku, angi aluomba imilimo mizipe, nu kupozya yoshi yano yaluchuziwa na chiwa; kuno Leesa wali ponga nawe. 39Neswe tuli yasyuta ya ifintu fiyo vyonsi, fino waomvile umunsi ya Yudea num-Yelusalemu. Wino yumozile yansamika uku chiti. 40Wene Leesa wamtutulwile uwanda wa utatu, amtuma kuti aloleke; 41asu ku antu yoshi, leelo kuli yasyuta yano yalile yasololwa na Leesa, alu sweswe, yano twalyanga nu kunwa ponga nawe ichisila cha kututuluka kwakwe ukufuma uku yafwi. 42Atutuma tusundile antu nu kwimikila fino wiyo kwene uwino wimikwe na Leesa awe Umputuzi wa milandu ya apuma nafwi. 43Uwino amalau yoshi yalwimikila, fino ukwizina lyaakwe wensi uwa mzumila, apokelele ukwelelwa kwa maifyo.”

44Pano Petlo achili aluvwanga amaswi ya, uMweeso Nswefu uikila yoshi yano yalipulikisyanga iswi liyo. 45Na yano yazumila yano yachitwa ichibalu, yazunguka, antu yoshi yano yizile ponga na Petlo, kuno akulukuwa nayo kwene iyitililwa uwila wa Mweso Nswefu. 46Kuno yayapulike yaluvwanga imivwango mipya nu kutensya Leesa. Apano Petlo waati: 47“Uwini wino angalesya amasi, yatabatiziwa ya, antu yano yapokelela uMweeso Nswefu ndi fino sweswe kwene?” 48Alanda kuti yabatiziwe ukwizina lyi Yesu Klisto. Nga yampapata, kuti awikale kweneko amanda yamwi.

Currently Selected:

Milimo 10: FNT1988

Highlight

Copy