Amatiyu 19

Eyesu a nye moare eshri obgaeble

1Ambla ba Eyesu a lu odlo a khwo nga, a kso a sku Egalili nga a bla a gre ogʼba obiŋ ba Eyahuda la a wo ongre ondzu ba Ordu. 2Moare nzenze a lu ŋa ma, nga a shaŋ mo ahe lo.

3MoaEfarisikyeŋ a ba okro baŋ nga, moa a klo o kpyi ŋa. Moa a la a zhĩ ŋa a lu mi le, Odaŋ bi o bmi ba are a bga eble, o wo ba ashe baŋ a kpo ekplokyeŋ ma? 4Eyesu a tno mo ma a lu mi le, Agimi e tsi Akpa Ahogbrẽ la a lu mi le, Okũ oriori Ahogbrẽ la a kpo ayakplo pyeŋ, a kpo arealom, ta la ashe, e ka mbo? 5Eyesu a sa a lu mi le, Okyku ekplo he, arealom á dzu adaŋ, ta la anaŋ á zga, nga á pu ta la ashe baŋ. Moa aha lo nga á dzu okyekyeŋ. 6Okyku eka he, moa a wo aha nga mbo, ambo moa a wo okyekyeŋ angyiŋ a mo. Okyku eka he, arekyeŋ a gʼba ekplo ba Ahogbrẽ a sheŋ a kŋe a bga mbo. 7MoaEfarisi a zhĩ a lu mi le, O wo ba alo o wo eka he angyiŋ le, okyku eshi Omusa a di ekʼpo okyku o da are a bga eble nga, a kyu ashe baŋ abgo? 8Eyesu a tno mo ma a lu mi le, Omusa a da gimi ekʼpo okyku o da gimi e kyu moashe bimi abgo, okyku bimi e shye eshri e gre eshri. Ambo o wo eka he angyiŋ omba ba moa a kpo ekployaŋ a mbo okũ oriori mbo. 9Okyku eka he ame e lu e da gimi, areyaŋ a mbo la a kyu ashe baŋ abgo, o wo baŋ a ka a kpo abibli angyiŋ mbo le, o wo baŋ a kyu ashe ahe le, a ta ekpa angyiŋ.

10Moanwyeotum baŋ a nyuŋ ŋa a lu mi le, O wo ba odzudzu ba arealom ta la ashe o wo eka he angyiŋ le, o raŋ o gre moa a kyu ashe mbo a sku. 11Eyesu a tno ma a lu mi le, onyenye he lo o wo okyku moare pyeŋ angyiŋ mbo, ambo o wo okyku moare ha Ahogbrẽ a shri lo a da mo sha. 12Ayakplo andandandim la a nyom moare o kyu ashe a wo ma. Moabze, okyku moa a buŋ eble, moabze, okyku moa a hrẽ mo, moabze nga okyku moa a, klo o kpo otum okyku Oreŋ Ongyeŋ. Areyaŋ a mbo la a kpo a gbu, a yga onyenye he lo.

Eyesu a fa anyuadzi a ygi moanwye afifi

13Moarekyeŋ a shri moanwye mo a ba okro Eyesu okyku o daŋ a fa anyuadzi a ygi mo, nga a fa olu okyku mo. Ambo moanwyeotum baŋ a kyku mo. 14Ambo Eyesu a nyuŋ moanwyeotum baŋ a lu mi le, Agimi e da moailwye afifi a ba okro me, e kyku mo mbo, okyku eshi, Oreŋ Ongyeŋ o wo okyku edgu moahi lo angyiŋ. 15Ambla he nga, Eyesu a shri abgo baŋ a shki moanwye lo a khwo nga, a zhiŋ ogbu a gre eŋa.

Ola anwye la a wo angyiŋ ma

16Ondakyeŋ nga alomakyeŋ a ba okro Eyesu. A lu mi le, Andakʼpo, ekployaŋ e wo shasha ba ame é ba e kpo okyku o da me e hwiŋ esõ ba gbagbu-amo? 17Eyesu a tno ŋa ma a lu mi le, Okyku eshi aŋo o zhĩ me odlo eshri ekplo la e wo shasha? Are akyekyeŋ sha a wo shasha. Aŋo o kpaŋ odaŋ o wo boŋ o klo o hwiŋ esõ ba gbagbu le. 18Alom lo a zhĩ a lu mi le, Odaŋ-yaŋ angyiŋ? Eyesu a tno ŋa ma a lu mi le, Aŋo o bga ebga mbo, aŋo o ta ekpa mbo, aŋo o si esi mbo, nga aŋo o sheŋ akpro mbo. 19Aŋo o fa olbi o da adoŋ, ta la anoŋ, nga o klo a ba ekpazhi boŋ eka boŋ o klo eshri boŋ. 20Ola anwye lo a tno ma a lu mi le, Ame e sheŋ e kpaŋ odaŋ he lo pyeŋ bgu. Eshi e sa e ra ba ame é ba e kpo? 21Eyesu a tno ŋa ma a lu mi le, O wo boŋ o klo o bli angyiŋ le, aŋo o yi o shri angyiŋ boŋ o shri o gbmo nga, o shri amgbaŋ lo o shri o gʼba moaekŋe, okyku eshi aŋo ó hwiŋ angyiŋ Ongyeŋ. Aŋo o kpo eka he o khwo bgu le, o ba o lu me ma. 22Omba ba ola anwye lo a gno eka he a khwo nga, esõ e byli ŋa, okyku eshi aŋa a wo angyiŋ ma nzenze. Aŋa a zhiŋ ogbu a gre eŋa.

23Eyesu a nyuŋ moanwyeotum baŋ a lu mi le, Alo ó wo ewu nzenze ba are angyiŋ á ba a yi Oreŋ Ongyeŋ. 24Ame e lu ekplokyeŋ é da gimi nganga. O wo ohli o gre ba arakumi a gre ewyle adne o gre, ba are angyiŋ á ba a yi Oreŋ Ongyeŋ. 25Omba moanwyeotum a gno eka he a khwo nga, moa a ka egbregbre a gre eshri. Nga moa a zhĩ a lu mi le, O wo eka he le, Ayi á ba a gro? 26Eyesu a ka mo tki nga a tno mo ma a lu mi le, Ohi lo o kpo o gbu okro moarehwĩ mbo, ambo ekployaŋ a mbo e kpo e gbu okro Ahogbrẽ.

27Ambla he nga, Ebitru a tno ma a lu mi le, Aŋo o ka, agi e dzu ekployaŋ a mbo e zga nga e lu ŋo ma, agi é hwiŋ eshi a mo? 28Eyesu a nyuŋ mo a lu mi le, Ame e lu e da gimi, omba ba Anwye Arehwĩ á ba a dzu emgbakyiŋ oreŋ baŋ ba esesla, omba mi lo, agimi otsko la e lu me ma he lo, agimi a mbo é dzu emgbakyiŋ oreŋ me, nga é sõ egu otsko ba Esrayila ombgu. 29Nga areyaŋ a mbo la a dzu adne a zga, pa la moanáŋ-alalom, o mbo le moanáŋ-alashle, o mbo le adaŋ, o mbo le anaŋ, o mbo le moanwye, o mbo le agbi a zga okyku me le, aŋa á hwiŋ ayakplo he lo eka engyi endgaekyeŋ omba la ó ba mi, nga aŋa á hwiŋ esõ ba gbagbu-amo. 30Moare nzenze ba ori á dzu moa ba ambla, moa nzenze ba ambla nga á dzu moa ba ori.

Currently Selected:

Amatiyu 19: EGONT74

Highlight

Copy