Amatiyu 18

Ayi a wo anyuanyuŋ a gre pyeŋ?

1Omba he lo nga moanwyeotum ba Eyesu a ba a zhĩ ŋa a lu mi le, Ayi angyiŋ a wo anyuanyuŋ a gre pyeŋ Oreŋ Ongyeŋ? 2Eyesu a bzi anwye akyeŋ a daŋ a ba a tspi egi ayi mo, 3nga a nyuŋ mo a lu mi le, Agimi e ka! O wo bimi e zhiŋ e dzu eka moanwye afifi mbo le, agimi é yi Oreŋ Ongyeŋ mbo ku-ku. 4Are la a sko eshri baŋ a zga ble-ble eka anwye afifi angyiŋ, a wo anyuanyuŋ pyeŋ a gre Oreŋ Ongyeŋ. 5Okyku eka he, areyaŋ a mbo la a yga akyeŋ eshki moanwye afifi he lo eshko me le, a yga me angyiŋ.

Are la a bile mo a da mo a kpo odlobi

6Areyaŋ a mbo la a da akyeŋ eshki moanwye afifi la a bmi ba adlidzi pa la me a sheŋ evgo le, o wo odzi o gre ba moa a shri eghwo a dze ŋa oto, nga moa a shri ŋa a ndbi a ta anyuŋ-ondzu, nga a daŋ a dom a yi eshyẽ. 7O wo ekplo ayiekŋe angyiŋ okyku eshi ayakplo la a da moare a tsi a gbu a wo obiŋ hi nzenze! Edgu ayakplo hi lo, á kpo ombamba pyeŋ, ambo a ba eshri are la a shri edgu ayakplo hi lo a shri a ba!

8O wo ba obgo boŋ, o mbo le odga boŋ o doŋ o tsu o gbu le, o kplu lo o shri o ta a bi! O raŋ o gre boŋ o hwiŋ esõ la obgo okyekyeŋ o mbo le odga okyekyeŋ, o sku boŋ o yi ovo ba gbagbu-amo la abgo aha, o mbo le la adga aha. Ovo he lo o wo ba gbagbu-amo. 9O wo ba eyi boŋ e doŋ o tsu o gbu le, o gʼbu lo o ta a bi! O raŋ o gre boŋ o hwiŋ esõ la eyi ekyekyeŋ o sku boŋ o yi ovo ba gbagbu-amo la ayi ahaha pyeŋ.

Egŋe eshri ekylu la e blu

10O raŋ o gre bimi e dzĩ akyeŋ eshki moanwye afifi hi lo mbo. Moanwyeadga ba Ahogbrẽ la a kʼpu mo moa a wo egi ayi Adugu la a wo Ongyeŋ ombamba pyeŋ. [ 11Anwye Arehwĩ a ba okyku o shri oshla o shri o da moa la a som ayi.]

12Agimi e ka anyu? O wo ba arekyeŋ a wo ékylu endga ma le, o wo ba ekyeŋ e blu le, aŋa á kpo eshi? Aŋa á dzu ekʼpoetronyi la etronyi la e wo oso ékylu á zga, nga a yi á klo ekylu la e blu hi lo akla. 13O wo baŋ a hwiŋ lo le, ame e lu e da gimi, aŋa á gno oraŋ nzenze ta la alo á gre ékylu ekʼpoetronyi la etronyi la e wo ka la ŋa. 14Ekakahelo angyiŋ, Adigi la a wo Ongyeŋ, a klo ba akyeŋ a mbo eshki moanwye afifi hi lo a blu mbo.

Anóŋ la a kpo odlobi

15O wo ba anóŋ a kpo odlobi egi ayi boŋ le, o yi o tsa ŋa odlobi baŋ. Aŋo o kpo lo agʼbaha boŋ ka la ŋa sha. O wo baŋ a ngli atuŋ a gno ŋo le, aŋo o shri ŋa o bla o ba ozhẽ angyiŋ eka he lo. 16Ambo o wo baŋ a ngli atuŋ a gno odlo boŋ mbo le, aŋo o klo arekyeŋ o mbo le moare aha o da gimi e yi otsotse, okyku o da mo a hwiŋ moaegŋe aha, o mbo le atra okyku ekployaŋ a mbo baŋ á ba a lu. Odlo Ahogbrẽ o tsa eka he angyiŋ. 17Ambo o wo baŋ a ka a ngli atuŋ a gno odlo mo mbo le, agimi e shri odlo lo e yi eshki moa la a lu Eyesu ma. O wo baŋ a ka a ngli atuŋ a gno eshki a mbo mbo le, agimi e sko ŋa e zga eka are la a yga Eyesu esõ baŋ a ka mbo, o mbo le eka are la a yga ewaŋ.

Onyonyom pa la obibmi

18Okyku eka he ame e lu e da gimi, ekplo bimi e nyom lo obiŋ hi, moa á nyom lo a mbo Ongyeŋ, nga ekplo bimi e bmi ta la alo obiŋ hi, moa á bmi ta la alo a mbo Ongyeŋ.

19Nga ame e lu e da gimi e ta ma-ma, o wo ba moare aha obiŋ hi a bmi ta la ekplokyeŋ nga a la a fa olu okyku lo, Adugu la a wo Ongyeŋ, á kpo mo alo. 20Okyku eshi okroyaŋ a mbo, ba moare aha, o mbo le atra a shki ma eshko me le, ame e wo ma pa la mo.

Egŋe eshri anwye-odne la a ka ayiekŋe mbo

21Ebitru a ba okro Eyesu nga a zhĩ a lu mi le, Adigi-odne, engyi ehrẽ ame é kyu anime abgo o wo baŋ a ta akpu egi ayi me? Ame é kyu ŋa abgo engyi efoha? 22Eyesu a tno ŋa ma a lu mi le, O mbo, engyi efoha sha mbo, ambo engyi ekʼpoefoha ma-me engyi efoha. 23Okyku eshi Oreŋ Ongyeŋ o wo eka areŋ la a zga esõ okyku o mbli edgu otum moanwye-odne baŋ a kpo o ka. 24Omba baŋ a wo ma a la a kpo nga, moa a shri akyeŋ eshki moanwye-odne baŋ la a ri ŋa amgbaŋ Enaira ezbienyi. 25Anwye-odne hi lo a wo ekplokyeŋ la e tse ma ba o hre okŋe he lo mbo, okyku eka he, adaŋ-odne a da mo ekʼpo ba moa a shri ŋa ta la ashe baŋ, pa la moanwye baŋ, ta la ekployaŋ a mbo baŋ a wo alo ma a shri a gbmo, okyku o daŋ a hre okŋe he lo. 26Ambo anwye-odne he a tsu a gbu egi ayi adaŋ-odne nga a vẽ ŋa a lu mi le, Aŋo o ka me ayiekŋe, ame é kpo nga é hre ŋo ekployaŋ a mbo e boŋ la e wo pa la me! 27Adaŋ-odne a ka ŋa ayiekŋe, nga a kyu ŋa abgo a daŋ a gre. 28Alom lo a zgi a gre a yi a ka akyeŋ eshki moanwye-odne la a ri ŋa okŋe Enaira okʼpo. A fye ŋa evgo oto ngre nga a lu mi le, O hre okŋe me! 29Anwye-odne he lo a kne a shki obiŋ egi ayi baŋ, nga a vẽ ŋa a lu mi le, Aŋo o ka me ayiekŋe, ame é kpo nga é hre ŋo ekployaŋ a mbo e boŋ la e wo pa la me! 30Ambo anwye-odne ba moa a kyu ŋa abgo hi lo, a bmi mbo nga a nyuŋ anwye-odne la a ri ŋa okŋe he lo, ma aŋa a da mo á vu ŋa á ta aku, o tsa baŋ a hreokŋebaŋ. 31Omba ba moanwye-odne ahwõ a ka eka ekplo ba anwye-odne he lo a kpo ta la anwye-odne la a ri ŋa okŋe nga, moa a gre a yi a lu a da adimo-odne eka ekployaŋ a mbo la e kpo okyku eshi esõ e tpi mo ayi. 32Adimo-odne a bzi anwye-odne he lo a daŋ a ba. Nga aŋa a nyuŋ ŋa a lu mi le, Aŋo areabi. Ame e dzu amgbaŋ boŋ o ri me okŋe pyeŋ e doŋ okyku boŋ o wu okũ egi ayi me. 33E mbi aŋo a mbo o ka are la a kpo otum ka la ŋo odne me ayiekŋe eka ba ame a mbo e ka ŋo ayiekŋe. 34Esõ e tpi adimo-odne ayi e gre eshri, nga a da mo a vu anwye-odne lo a ta aku o tsa baŋ a hre amgbaŋ lo pyeŋ. 35Eyesu a sa a lu mi le, Adugu a mbo á kpo gimi pyeŋ eka he lo angyiŋ, o wo bimi e kyu moanigimi la a ta akpu egi ayi bimi abgo la esõ ekyekyeŋ mbo le.

Currently Selected:

Amatiyu 18: EGONT74

Highlight

Copy