Roma 6

Yi a twatwa i toron ama yi gwon jörun ko Kristo i mugun

1A yi kirut mo kulyani ada? Ti yi yeŋe gwon i toron anyen ’busan na nyaŋu na Ŋun boŋo babaraŋdu le?

2’Bayin sona kwöŋ! Yi aje twatwa yi gwe ’bayin i kulya ti toron, a yi kirut yeŋe gwolor i toron kata ada? 3Ta ŋona ti den adi yi liŋ lo batisa ko Kristo Yesu i mugun kulo a batisa anyen morakiŋdya i twan nanyit le? 4#Kol 2.12Kweja adi ŋina batisimo nikao a tomorakiŋdya yi i twan nanyit, a yi iŋge nuka ko lepeŋ i pirit na geleŋ, nyena gwoso nagon minyo lo Ŋun Monye a toŋiju Kristo i twan na, a yi koti mo wöröni ko gwiliŋit ludukötyo.

5Kogwon koyi a mora ko lepeŋ i twatwa gwoso na twaji lepeŋ nu, a yi mo köti mori ko lepeŋ i toŋiyu i twan gwoso na toŋiuri lepeŋ nu. 6Kogwon yi deden adi yi ko töilyet kaŋ ti ’beron kulo a ’bikiki i ködini na göro ko lepeŋ i pirit na geleŋ, anyen töilyet lo toroŋdya kulo böŋö kakaŋu an yi koti yeŋon a ’dupi ti toron; 7kogwon ko ŋuto aje twan a lepeŋ tine ’duŋöki putet lo toron. 8Ama koyi a twatwa ko Kristo i pirit na geleŋ, a yi yubbe adi yi mo köti ruru ko lepeŋ i pirit na geleŋ.

9Kogwon yi a den adi Kristo a toŋiyu i twan, a lepeŋ mo köti tine twan kwöŋ; a twan köti gwe ’bak riŋit ko lepeŋ i mugun. 10Kogwon twan nagon nye a twaji na, lepeŋ twakin i kulya ti toron daŋ geleŋ, ama gwiliŋit logon nye gwigwiliŋgi lo, lepeŋ gwilipara alo Ŋun. 11Nyena köti dene ta den ’börik adi ta aje twatwa a gwe ’bayin i kulya ti toron, ama ta gwilipara jörun a ti Ŋun ko Kristo Yesu i mugun.

12Nyenagon ti toron gwe ti tumatyan kasu i mugunya na ’bu ’burön kine, anyen tiŋdu ta i twöju na ’dekesi ti kine mugunya. 13An ta ko tikin ta toron kulye swötön ti mugunya kasu gwoso tito kitaesi ti kulya narok, ama tiŋdi ta Ŋun ’börik kasu gwoso ŋutu lo toŋiyu i twan, tiŋdi ta Ŋun swötön ti mugunya kasu gwoso tito kitaesi ti löti lo rigwo. 14Kogwon toron agu ködyö ti tumatyan ko ta, kogwon ta ’bayin gwolor i twöju na saresi, ta gwolor i twöju na ’busan na nyaŋu na Ŋun.

’Dupi ti löti lo rigwo

15A kirut gwe ada? Yi ŋona tentoroŋdya kogwon yi ’bayin gwon i twöju na kilo saresi ama yi gwon i twöju na ’busan na nyaŋu na Ŋun le? ’Bayin sona kwöŋ! 16Ta ’diri deden adi ko ta a tiŋdu ’börik gwoso ’dupi i kitakiŋdya ko i twöju na lele ŋuto, a ta ’diri gwe a ’dupi ti lepeŋ logon ta twötwö lo. Ko ta kitakiŋdya toron, a ’dutet nanyit gwe a twan, ama ko ta a katwöyök ti Ŋun, a ’dutet nanyit tiŋdi ta i gwon rigwo kanyit i komor.

17Ta köju a ’dupi ti toron, ama tinate lo Ŋun kogwon ta soŋinana aje twöju ko töilyet kasu liŋ gweyari lo todinet nagon aje todiniki ta na; 18a ta iŋge yukwe kaŋo i toron, a iŋge wora a ’dupi ti löti lo rigwo. 19(Nan ŋilo jajambu gwoso ŋuto kogwon tomunyan na mugunya kasu.) Kogwon ta köju a tiŋdu ’börik gwoso ’dupi ti tolutan koi renya na saresi, kine ŋo liŋ tiŋdu ta i koŋdya na kulya narok. Nyenagon köti tiŋdi ta ’börik gwoso ’dupi ti löti lo rigwo logon joŋga ŋuto i kelan.

20Na gwoŋdi ta koju a ’dupi ti toron nu, ta ’bayin a ’dupi ti löti lo rigwo kwöŋ. 21Nyenagon ’bulit a nyo nagon ta a wu i koŋdya na ŋo nagon soŋinana toyujö kusik kasu kine? Kogwon ’dutet na kine ŋo gwon a twan. 22Ama soŋinana ta aje yukwe kaŋo i toron a ta gwe a ’dupi ti Ŋun, nyena a ’bulit nagon ta wuwu na gwe a kelan, a ’dutet nanyit gwe a ru na yeŋ nyin. 23Kogwon toron robba ŋuto ko twan, ama Ŋun ’dogga ŋuto ’bak ropet ko ru na yeŋ nyin ko Matat likaŋ Yesu Kristo i mugun.

Currently Selected:

Roma 6: BBE

Highlight

Copy