Konesi 20

Paulo a ’yö ’yu jur lo Makedonia se ko lo Giriki

1A nagon woŋon aje ’baka nu, a Paulo luŋgi ŋutu kajujumuk kulo, a togo ’yi se ko kulyaesi, a rome roman, a kirut a nye ŋiörö ŋiörö tu Makedonia. 2A lepeŋ wöröji ’e kilu jurön totŋgoloddu kayupök ko kulyaesi jore, a kirut lepeŋ ’dure i jur lo Giriki,

3a si ’dani nyu yapala musala. A nye teteŋdi tu Suria ko ki ’bo, ama a nagon nye aje den adi Yudayaki teteŋdya mwön ko nye nu, a lepeŋ yeyeji yitöri lo Makedonia. 4Nyena a Sopatero ŋuto lo Beroia ŋuro lo Ŋuro, ko Aristaruko se ko Seku ŋilo logon a ŋutu ti Tesalonike; ko Gayo ŋuto lo Derbe, ko Timoteo, ko Tukiko se ko Torepimo logon a ŋutu ti Asia kulo nyömöddi lepeŋ. 5a kilo ŋutu iti ŋerot a tu möŋdi yi Turoa. 6A i mukök na rorwe lo Ambata nagon ’bak Kape, a yi kö ’yi Pilipoi, a iti ko ki ’bo a yi ’dure Turoa ko lepeŋat yu i mukök na perok mukanat, a yi iŋge si ’da nyu perok buryo.

Si ’da na Paulo Turoa yu na ’dutet

7A i lor lo Sabata lo Yudayaki i kotumalu nanyit kotyaŋ, a yi momori i pirit na geleŋ i pipiŋdya na ambata, #20.7pipiŋdya na ambata Kendi Konesi 2.42 a Paulo jambi ko ŋutu, a lepeŋ jamaddi a ’döri tojo tukwaje kiden, kogwon lepeŋ yeyeju ŋiörö ko ’bure. 8A lombojin jore gwe i koŋilore na kadi nagon yi a momorakiŋdye kata nu. 9A lele titinti karin kanyit a Eutuko si ’dani i kuluŋit, a nagon Paulo jamaddu a ’döri nu, a Eutuko lure lur tojo lepeŋ a doto adi mwön, a ’duruu i kadi tomusala#20.9 kadi tomusala ŋina kadi a ’du ’duluji ki a kaddijik musala, a ŋilu titinti a ’duruu i tomusala ki na gwon ki tojo kak. A lepeŋat ’dumuŋdye nye ki a twan. 10Ama a Paulo luluru kak a gubakiŋdye mugun ko lepeŋ loki, a kalabbi lepeŋ, a kulyani adi, An ta ko delya ta, lepeŋ nyuŋ jörun.

11A Paulo yitöni ki i koŋilore, a pipiŋdye ambata a se nyesi nyesu, a nagon nye aje jambu ko se tojo ko waran na kak nu, a nye ŋiörö ŋiörö. 12A lepeŋat joŋgi ŋilu ŋuro mede jörun a se iŋge lyöŋön parik.

Paulo a ŋien Turoa a iti Mileto

13A yi iti ŋerot i pirit na gwoŋdi ki ’bo nu, a yi kije lukata a iti tojo Aso, yeyeju adi Paulo ŋona kija i ki ’bo lukata nyu. Paulo a teteŋdya sona kogwon lepeŋ a yeyeju adi nye ’dek tu ko mok. 14A yi ryeji lepeŋ Aso, a nye kije i ki ’bo a yi iti tojo Mitulene. 15Ko ’bure a yi ŋine yu, a iti ko ki ’bo a ’dure nyona komorga Kio, Ko ’bure nanyit a yi monoji Samo yu. Kotumalu nanyit a yi ’dure Mileto. 16Kogwon Paulo a yeyeju lwöpöddu Epeso ko ki ’bo gwo, anyen nye ködyö gwon ti karakin Asia, kogwon ’demeja tu Yerusalema anyen ’dur nyu i lor lo Pentekosta ko bubulö.

Paulo saŋu temejik ti kanisa na Epeso a ’dutet

17Na gwoŋdi Paulo Mileto yu nu, a lepeŋ soŋdi lore Epeso luŋurikin temejik ti kanisa, 18A lepeŋat ko ’dure kanyit ni, a nye kulyani ko lepeŋat adi,

Ta ko ’börik deden ko nan a si ’da ada kasu kiden diŋitan liŋ, suluja i lor lo kokwe lo tanyakiŋdye nan moköt i jur lo Asia lu. 19Ta a den ko nan a kitakiŋdya Matat likaŋ ko tokoyokan liŋ se ko ŋolitan ko möriesi na pokin köyö kogwon Yudayaki ga ’yu mwön ko nan kune, 20Ta köti a den adi nan a ko ’de ’ya kunie kulya nagon bubulö parakiŋdya ta. Nan a tokujö a iŋge todinikin ta köke ŋutu memet, ko kasu i midijik. 21Nan a kukuju Yudayaki se ko ŋutu ti kulye jurön adi ti se löpukuŋdye ko Ŋun ni a yubbe Matat likaŋ Yesu. 22Nyena mete ta, soŋinana nan lo iti Yerusalema, Mulökötyo Loke a rerek nan, a nan tine den ŋo nagon mo pokin köyö yu kunu. 23Tuŋ nan deden adi Mulökötyo Loke a tokurukiŋdyö nan i köjinö liŋ adi kadi rereket se ko sasanyesi mömöŋdu nan. 24#2 Tim 4.7Nan ti yeyeju ru nio gwoso nene ŋo nagon nan ködyö titi na, ama tuŋ nan ’de ’dekan tutuŋgö wökön nio na opere, anyen tutuŋökiŋdyö kita nagon Matat Yesu a tikin nan na, anyen tökoŋu Loŋe Lo ’but lo ’busan na nyaŋu na Ŋun,

25Nyena soŋinana mete ta, nan a den adi ta liŋ logon nan a tu kasu ŋini i tokujö na kulya ti Tumatyan na Ŋun kilo ta mo ti meddya komor nio köti kwöŋ. 26Nyena nan tokurukiŋdyö ta i lo lor adi nan gwon a loke ’bak rima ti lele ŋuto, 27kogwon nan a ko ’de ’ya tukökiŋdyö ta yeyeesi liŋ ti Ŋun.

28Tiji ta ’börik, köti tiji ta teŋ na yidin ’bukuluŋ nagon Mulökötyo Loke a tiŋdu ta a kamemetak kase na, anyen ta yuggu kanisa na Matat, nagon nye a ryekin mugun ko rima kanyit na.

29Kogwon nan deden adi i mukök nagon nan aje tu nu, a lujin kaŋajin mo poŋdi kasu kiden, a mo tine pitökin teŋ na yidin. 30a ŋutu kulye mo ŋine ŋien kasu kiden logon mo jambu kulya tulyaŋesi a mo jiköddi ŋutu ti Yesu kajujumuk anyen kepoddu se.

31Nyenagon gwe ta ko konyen ŋa, ko yeyene ta yeye adi nan a joŋga kiŋajin musala a ko jaran tuparan ko tukwaje i kukuju na ta liŋ geleŋ geleŋ ko ŋolitan.

32Nyena soŋinana nan tiŋdu ta ko Ŋun i könin ko i kulyaet lo ’busan na nyaŋu nanyit. Lepeŋ ko riŋit i gweyuŋdya na ta ki, ko i tiŋdu na ta ŋo na ’but ti mede nanyit na Ŋun, nagon ta se ko ŋutu liŋ logon a gelwe a ŋutu kanyit kilo mo wuwu kune. 33Nan a ko be ’ya pödö kode dakaŋ ti lele ŋuto kode boŋgwat kanyit. 34Ta ko ’börik deden adi nan ko kulo könisi kwe a kitauŋdya ŋo liŋ nagon nan se ko ŋutu logon gwon ko nan kulo ’de ’deggi kune. 35Nan a kwekiŋdya ta miret i ŋo liŋ adi yi ködyö kikita anyen parakiŋdya ŋutu lomunyak, ko i yeyeju na kulya nagon Matat Yesu a jam kune adi, Ka ’dokak a kalyöŋök lwölwöŋ kawuyuk.

36A nagon Paulo aje tutuŋgö jambu nu, a nye rugwuŋökine kak ko se liŋ i pirit na geleŋ a kwakwaddi kwakwaddu. 37A se liŋ gwine gwien parik, a kalabbi lepeŋ ko ’bi ’biyet, 38dedelya parik kegga ko kulyaet logon nye a kulyari adi se mo köti ti met komor nanyit kwöŋ. A kirut se nyömökindye lepeŋ tojo i ki ’bo.

Currently Selected:

Konesi 20: BBE

Highlight

Copy