1 Korinto 11
11
1 #
1 Kor 4.16; Pil 3.17 Mirakiŋdye ta nan gwoso nagon nan mirakiŋdye Kristo na.
Kulya ti muggöna kwe i diŋit na kwakwaddu
2Nan pupurja ta kogwon ta ŋupi yeye nan, a ta ’depakiŋdye i saresi logon yeŋon a keri logon nan aje todinikin ta kilo. 3Ama nan ’de ’dekan ta deden adi Kristo a kwe lo ŋuto lyan liŋ, a lalet gwe a kwe lo nakwan nanyit, a Ŋun gwe a kwe lo Kristo. 4Nyenagon ko lele ŋuro kwakwaddu kode tokujö ko kwe nanyit a mukö, lepeŋ lauŋdya kwe lonyit,
5a ko nene ŋuro kwakwaddu kode totokujö ko kwe nanyit a ko mukö, lepeŋ lauŋdya kwe lonyit, lepeŋ gwon gwoso ŋuro nagon kwe a ’barinu. 6A ko ŋuro nakwan ti muggö kwe nanyit a bia ti kupir kanyit ’duŋoni ’dupo; ama ko kwe na ŋuro nakwan yuyu i ’duŋgö kode i ’bariŋdu na kupir kanyit, a ti lepeŋ ködyö muke muk kwe nanyit. 7#Sul 1.26, 27Ŋuto lalet ködyö ti muggö kwe nanyit, kogwon nye a gwuluet na Ŋun ko a bulet lonyit. Ama ŋuro nakwan a bulet na ŋuro lalet. 8#Sul 2.18-23Kogwon ŋuro lalet a ko gweye i ŋuro nakwan, ama ŋuro nakwan a gweye i ŋuro lalet. 9Kogwon lalet a ko gweki i kulya ti ŋuro nakwan, ama ŋuro nakwan a gweki i kulya ti ŋuro lalet. 10Nyenagon kogwon kulya ti malaikajin, ŋuro nakwan ködyö gwon ko muket na kwe anyen kwekiŋdya adi lepeŋ gwon i saret lo lalet.
11Ama na gwoŋdi yi ko Matat i mugun na, ŋuro nakwan ti gwon a nene po ’bak ŋuro lalet, köti ŋuro lalet ti gwon a nene po ’bak ŋuro nakwan. 12Kogwon gwoso nagon ŋuro nakwan gweye i ŋuro lalet nu, sona köti ŋuro nakwan na yupuŋdyö ŋuro lalet, ama po liŋ po ko Ŋun yu.
13Lilije ta ko ’börik, ŋona a na ’but ko ŋuro nakwan kwakwaddu Ŋun ’bak muggö kwe nanyit le? 14Gwiliŋit lo ŋuro ŋona ti todinikin ta adi ko ŋuro lalet gwon ko kupir a lojo lepeŋ lalawe, ti gwon sona le? 15Ama ko ŋuro nakwan gwon ko kupir a lojo lepeŋ bubula, ti gwon sona le? Kogwon kupir kanyit lojo kulo a tiki lepeŋ a mukesi kanyit. 16Ama ko lele ŋuto ’de ’dekan rerenya i kine kulya, a ti nan kulyani adi, yi ko kanisajin ti ŋun gwon ’bak lele keri i kulya ti kwakwaddu.
Nyeŋ na Matat likaŋ a ko kona ’bura
17Ama na sarakiŋdye nan ta na, nan ti puŋa ta, kogwon na momoruŋdye ta i pirit na geleŋ nu, ta koŋu ’borik ti gwon i parakiŋdya na ’borik. 18ŋo togeleŋ, nan a yiŋ adi ko ta a momoruŋdya i, pirit na geleŋ a kanisa a ta gwe i kökoroja na ’borik; a nan iŋge yuŋ kine kulya a swot. 19(’Diri kunie koresi agu ködyö gwon kata kasu kiden anyen liliuŋdya ŋutu ti to ’diri.) 20Ama ko ta a momora i pirit na geleŋ, ta ’bayin nyesu Nyeŋ na Matat likaŋ; 21kogwon na nyesi ta nu, ŋutu liŋ geleŋ geleŋ möröddu ŋerot i nyesu na kinyo lose, a kulye gwe ko magor, a kulye mere meran. 22Ta ’bak midijik anyen ta nyesu ko möju kata le? Kode ta ŋona lauŋdya kanisa na Ŋun, a toyuje kusik ti ŋutu lomerika lo gwon kasu kiden? Ti nan ködyö jamaki ta nyo i kine kulya? Ti nan ködyö pupurje ta le? ’Bayin kwöŋ, nan ti pupurja ta asut.
Suluki na nyeŋ na Matat likaŋ
(Köti Matayo 26.26-29; Marako 14.22-25; Luka 22.14-20)
23Kogwon saresi logon nan todinikin ta kilo nan a wu ko Matat, adi, i tukwaje lo tiki ’e Matat Yesu i tatua lu, lepeŋ a ’dumuŋdya ambata, 24a tiŋdi Ŋun tinate, a pipiŋdye pipiŋdya, a kulyani adi, Ŋina a mugun nio nagon a pipinyaki ta na. Koŋdi ta sona anyen yeyeori nan.
25 #
Yuö 24.8; Yer 31.31-34;
Yuö 24.6-8
A i mukök na nyesu, a nye köti ’dumuŋdye kopo, a kulyani adi, Ŋina a tomoret ludukötyo nagon tetena ko rima kwe anyen tomor a Ŋun ko ŋutu kanyit. Koŋdi ta sona temba i möju nasu anyen yeyeori nan. 26Kogwon temba i diŋitan liŋ na nyesi ta ŋina ambata ko na möji ta i ŋina kopo nu, a ta tukökiŋdye twan na Matat likaŋ tojo ko nye a po.
Nyesu na ŋina Nyeŋ ko do a kokwe a temba mugun
27Nyena ko lele ŋuto a nyesu na ambata kode möju i ŋina kopo na Matat i kiko logon ti jukin, lepeŋ a toroŋdya mugun na Matat se ko rima kanyit.
28Ti ŋuto agu ködyö teme tem mugun i ŋerot nagon nye nyesu ŋina ambata koi möju i ŋina kopo. 29Kogwon ŋuto logon nyesu ko möju ’bak timuŋdya mugun na Matat likaŋ lo, lepeŋ nyökiŋdyö ko matakiŋdya mugun ’duŋöki na putet. 30Ko ŋina kwe jore kasu a lomunyak ko a gigilötu, a kulye iŋge twatwa. 31Ama koyi kiyaŋ a lilija ’börik, a yi ködyö tine ’duŋöki putet;
32ama Matat lo lilija kulya kaŋ, a nye lo riŋge yi, anyen yi mo gwon ti ’duŋöki putet loron i pirit na geleŋ ko ŋutu ti na kak.
33Nyenagon luŋasirik kwe lo yubbö, ko ta momoruŋdya i nyesu na kinyo, tumöni ta tumön ko ’börik. 34Ko ŋuto logon ko magor, a ti nye ködyö nyesi kanyit midi, an momora nasu jakiŋdya ta putet loron. Nyena ko nan a tu kasu ŋini a nan mo tu teteŋdi kunie kulya kine.
Currently Selected:
1 Korinto 11: BBE
Highlight
Share
Copy
Want to have your highlights saved across all your devices? Sign up or sign in
Bari Bible © United Bible Societies, 1979.
