1 Korinto 10
10
Paulo a kukuju ŋuto i kulya ti nyömuejin logon a punyen
1 #
Yuö 13.21, 22;
Yuö 14.22-29
Luŋasirik, nan ’de ’dekan ta deden adi, merenyejin kaŋ liŋ ti ’beron a mukö ko luru, a lepeŋat liŋ iŋge lapaddu i Tör Nator, 2a lepeŋat liŋ iŋge batisa i luru ko i tör lukata a kakepok ti Mose. 3#Yuö 16.35A se liŋ iŋge nyesu kinyo lo geleŋ logon po ki, 4#Yuö 17.6; Ken 20.11a lepeŋat liŋ iŋge möju pioŋ na geleŋ nagon po ki, kogwon lepeŋat möju i lurutat logon Ŋun lo tiŋdu, logon köju a moraddu ko se lu. Ŋilo lurutat a Kristo. 5#Ken 14.29, 30Ma ’di sona, Ŋun a ko lyöŋön ko lojore kase, a jore kase iŋge twatwa, a öpuö kase parasake i yöbu na sese.
6 #
Ken 11.4
Nyenagon kine kulya liŋ a pokin kayaŋ a kweyesi i tokujöŋdu na yi, an yi be ’ya po narok, gwoso na ’beyi se nu. 7#Yuö 32.6An ta ko kwakwaddu ta nyömuejin gwoso kulye kase, gwoso na wurörikin nu adi, Ŋutu a si ’daki kak i nyesu ko i möju, a ŋine ki i gwoja. 8#Ken 25.1-18Ti yi gwe ti towutön gwoso na koŋdi kulye kase köju nu, a ŋuto aliŋan merya murek wot musala iŋge twatwa i lor geleŋ. 9#Ken 21.5, 6Ti yi gwe ti möŋu Kristo, gwoso na koŋdi kulye kase nu, a munuö iŋge tatatu lepeŋat. 10#Ken 16.41-49An ta ko wiwinya ta gwoso na wiwinyari kulye kase nu, a malaikatat Katatuanit iŋge tatu se. 11Kine kulya liŋ a konaki lepeŋat a kweyesi, a iŋge wuröki kak i tokujöŋdu na yi, kogwon yi gwolor i diŋit nagon ’dutet gwe nyona ko po.
12Ŋuto logon yeyeju adi nye gwogwo ’dan go lo, ti nye meddi ’bura an nye ’doro. 13Nene mörit ’bayin na pokin kasu lwölwöŋ na pokin i ŋuto liŋ. Ŋun yiyiniki i po liŋ, a lepeŋ mo tine kölökin ta i tema lwölwöŋ riŋit nasu, ama lepeŋ mo kwekwekin ta kiko logon ta rwöddi kaŋo i ŋina mörit kata, anyen ta bubulö poŋga.
14Nyenagon ta julin kwe lo nyanyara kulo, paji ta kwakwaddu na nyömuejin logon a punyen kilo. 15Nan ŋilo jambu ko ta gwoso ŋuto lotolokok, nyena lilije ta ko ’börik kulya na jam nan kune. 16#Mat 26.26-28; Mar 14.22-24; Luk 22.19, 20Kopo nagon yi mömöji na i diŋit nagon yi tiŋdu Ŋun tinate i mukök na nyesu na rorwe nu, yi ŋona ’bayin paruŋdya rima ti Kristo le? A na pipiŋdye yi ambata nu, yi ŋona ’bayin paruŋdya mugun na Kristo le?
17Kogwon ambata geleŋ kata, kweja adi a yi logon jore kilo gwe a mugun geleŋ, kogwon yi liŋ paŋu ambata geleŋ.
18 #
Lew 7.6
Yeyeji ta po na kon ŋuto ti Yisaraele. Se lo nyesu rubaŋgajin kilo paruŋdya po nagon wuki Ŋun i pirit ’yuret na rubaŋgajin, ti gwon sona le? 19a kirut nan jambu kulya nagon a ti nyo? Adi kinyo lo wuki nyömuejin a nene po le? Kode adi nyömue ŋona a nene po?
20 #
Nyö 32.17
’Bayin, nan a ko jambu sona. Nan kulya adi, Rubaŋgajin logon paganojin wuwukin kilo a ti mulökö lorok, ’bayin a ti Ŋun. Nan ti ’bön ta paŋu nene po ko mulökö lorok. 21Ta ti bulö matuŋdya i kopo na Matat ko köti i kopo na mulökö lorok. Ta ti bulö nyesu i misa na Matat ko köti i misa na mulökö lorok. 22#Nyö 32.21yi ŋona ’de ’dekan tiŋdu Matat i yulön? Yi ŋona kata ko riŋit a duma lwölwöŋ nanyit le?
23 #
1 Kor 6.12
Ta kulya adi, Yi a lui i koŋdya na po liŋ. Iŋkoi, yi ’diri a lui, ama po liŋ ti parakiŋdya. Yi ’diri a lui, ama po liŋ ti gweyuŋdya ŋuto ki. 24Ti lele ŋuro gwe ti ga ’yu kulya kanyit, ama ti nye ga ’yi kulya ti marate lonyit. 25Ta bubulö gwöruŋdyö po liŋ abur i pirit gwörit na lokore a nyesi se ’bak pipija kode a po na toron. 26#Sau 24.1Kogwon kak na a na Matat se ko po liŋ na gwon i lukata nanyit kune. 27Ko lele ŋuro logon ’bayin a kayupönit a luŋgu ta i kinyo, ko ta ’de ’dekan tu, nyesi ta po nagon a tiki kasu i komor kune ’bak pipija kode a po na toron.
28Ama ko lele ŋuro a takiŋdya ta adi, Ŋilo a kinyo logon a wuki nyömuejin, an ta ko nyö ta ŋilo kinyö, kogwon kulya ti ŋuro lo takiŋdya ta sona lo, se ko i kulya ti töili denet lo toron— 29kweja adi, ti gwon a töili ilot denet lo toron, ama a lo ŋilo ŋuro lo tukökiŋdyö do ŋilo.
Kode do pija adi, Nyo nagon töili lo lele ŋuro denet lo toron teŋgu nan i gwon a luitöt i nyesu abur? 30Ko nan a paruŋdya ŋilo kinyo ko lyöŋesi, a nyo nagon lele ŋuro yuyuggö nan kogwon kinyo logon nan aje tiŋdu Ŋun tinate kogwon nye lo? 31Waset lio gwon sona adi, Kode ta nyenyesu, kode mömoju, kode koŋdya nyo, koŋdi ta po liŋ i bu ’ya na Ŋun. 32An ta ko koŋdya ta nene po nagon tuköpuggö Yudayaki, kode ŋuto ti kulye jurön, kode kanisa na Ŋun.
33Gwoso na möŋi nan i tulyöŋgu na ŋuto liŋ i po liŋ nagon nan kökon kune. Nan ti yeyeju kulya kwe, ama nan yeyeju kulya ti ŋuto liŋ anyen se böpö lwölwökö.
Currently Selected:
1 Korinto 10: BBE
Highlight
Share
Copy
Want to have your highlights saved across all your devices? Sign up or sign in
Bari Bible © United Bible Societies, 1979.
