JINGPYNPAW 19

1Te hadien kine kiei kiei ruh, nga la ïohsngew kum ka ktien bajam u paidbah byllien ha bneng, ka da ong,

“Halleluïa!

Ka Jingpynim, bad ka burom,

bad ka bor,

ki long ki jong U Blei jong ngi!

2 # Deu. 32:43. Naba kiba shisha

bad ki bahok

long kita ki jingbishar jong u;

naba u la bishar ïa kata

ka nuti ka bakhraw,

kaba la ju pynpyut

ïa kata ka khyndew

da ka jingleh nuti jong ka,

bad u pynhiar kput ïa ka

na ka bynta ka snam

kita ki shakri jong u.”

3 # Isa. 34:10. Bad ki la ïa-ong pat,

“Halleluïa!

Bad ka tdem jong ka te

ka kiew noh sha ki bymjukut

ki bymjukut.”

4Bad kita ki arphew saw ngut ki tymmen basan bad kita ki saw ki jingthaw ba-im ki la ïahap dem bad ki la ïamane ïa U Blei u bashong halor kata ka khet, ki da ïa-ong, “Amen; Halleluïa!”

Ka jingkhawai shongkurim U Khun langbrot

5 # Salm. 115:13. Bad ka ktien sawa ka la wan mih noh na kata ka khet, ka da ong,

“To ïaroh ïa U Blei jong ngi,

phi baroh ki shakri jong u,

bad phi kiba sheptieng ïa u,

ki barit baraiñ ruh

bad ki bakhraw batri.”

6 # Ese. 1:24. Bad nga la ïohsngew kum ka jingsawa u paidbah byllien, bad kum ka jingsawa shibun ki um, bad kum ka jingsawa ki pyrthat bajam, ki da ong,

“Halleluïa!

naba U Trai uba U Blei jong ngi,

U Badonbor Baroh,

u la synshar.

7 # Salm. 118:24. To ngin ïakmen

bad ngin ïashadkmen,

bad to ngin ïa-ai ka burom ha u:

naba ka jingshongkurim

U Khun langbrot ka la jia,

bad ka tnga jong u

ka la pynkhreh ïa lade.

8Te la ai ha ka

ba kan da ïoh kup

ïa ka jaiñ linen bani,

bakhuid bad batyngshain:”

Namar kata ka jaiñ linen bani ka long keiñ ki jinglehhok jong ki riewkhuid.

9 # Mat. 22:2,3. Bad u ong ha nga, “To thoh: Suk kita ïa kiba la khot sha kata ka jingïakhawai miet ka jingshongkurim uta U Khun langbrot.” U ong ruh ha nga, “Kine ki long ki ktien bashisha ki jong U Blei.” 10Te nga la hap dem ha khmat ki kjat jong u ban mane dem ha u. Te u ong ha nga, “To sumar me, wat leh ïa kata! nga long u para shakri jong me bad jong kita ki parabangeit jong me kiba bat ïa ka jingphla U Jisu. To mane dem ïa U Blei” (namar kata ka jingphla U Jisu ka long ka mynsiem ka jingïathuhlypa).

Uta uba shong halor u kulai balieh

11 # Ese. 1:1. Bad nga la ïohi ïa ka bneng ba la plie, bad ha khmih ka kulai balieh; bad ïa uta uba shong halor jong ka la khot U Baïaineh bad U Bashisha; bad ha ka hok, u bishar bad u ïaleh thma. 12#Dan. 10:6.Te ki khmat jong u ki kum ka thylliej ka ding, bad halor ka khlieh jong u don ki pansngiat shibun: u don ruh ka kyrteng ba la thoh, ïa kaba uno uno ruh um ithuh, hynrei, tang ma u hi. 13Bad la pynkup ïa u da ka jaiñkup ïa kaba la wieh ha ka snam: bad la khot ïa ka kyrteng jong u, “U Ktien jong U Blei”. 14Bad kita ki paidïapom kiba ha bneng ki la ïabud ïa u halor ki kulai balieh, kiba la kup da ka jaiñ linen bani, ka balieh bad bakhuid. 15#Salm. 2:9; Isa. 63:3; Jol. 3:13; Jpw. 14:20.Bad na ka shyntur jong u ka mih noh ka waitlam banep, bad da kata un da shoh ïa ki kynja bynriew: te un synshar ïa ki da u dieng synshar nar: bad u ïuh roit ïa ka jingtylliat umsoh ka jingshla ka jong ka jingbitar U Blei U Badonbor Baroh. 16#Deu. 10:17; Dan. 2:47.Bad u don halor ka jaiñkup, bad halor ka lbong jong u, ka kyrteng ba la thoh, “U Syiem Ki Syiem bad U Trai Ki Trai”.

17 # Ese. 39:4,17-20. Bad nga la ïohi ïa uwei u angel uba ïeng ha ka sngi; bad u la pyrta da ka ktien bajam, u da ong ha kita ki sim baroh ki baher hapdeng ka suiñ, “To ale, bad to phin ïalang sha ka jingïakhawai miet kaba khraw jong U Blei; 18khnang ba phin ïoh bam ïa ka doh ki syiem, bad ïa ka doh ki rangbah shihajar, bad ïa ka doh ki bakhlaiñ, bad ïa ka doh ki kulai bad ïa ka jong kita kiba shong halor jong ki, bad ïa ka doh ki bynriew baroh, kiba laitluid ruh bad ki mraw, ki barit ruh bad ki bakhraw.” 19Bad nga la ïohi ïa uta u mrad khlaw, bad ïa kita ki syiem jong ka khyndew, bad ïa kita ki paidïapom jong ki, kiba la ïaseng lang ban ïaleh thma ïa uta uba shong halor kata ka kulai, bad ïa uta u paidïapom jong u. 20#Jpw. 13:1-18.Te la kem ïa uta u mrad khlaw, bad lem bad u ruh ïa uta u nongïathuhlypa balamler uba la leh ïa kita ki dak khyllah ha khmat jong u, da kiba u la shukor ïa kita kiba la pdiang ïa kata ka dak uta u mrad khlaw, bad ïa kita kiba la ïamane dem ïa kata ka dur jong u. Ïa kine baroh ar, la bred im keiñ sha kata ka pung ka ding ïa kaba la thang da u kyndok. 21Bad ïa kita kiba sah la pynïap noh da kata ka waitlam jong uta uba shong halor kata ka kulai, kata ka waitlam keiñ kaba mih noh na ka shyntur jong u: te ïa kita ki sim baroh la pynkdang da ka doh jong ki.

Currently Selected:

JINGPYNPAW 19: KHB

Highlight

Copy