PHILEMON 1

Ka jingkhublei

1U Paul, u nongsah byndi U Khrist Jisu, bad u Timothi u para jong ngi,

Ha u Philemon u hep ba-ieit bad u para baïatrei lem jong ngi, 2#Kol. 4:17.bad ha ka Apphia ka para jong ngi, bad ha u Arkhippos u para shipai jong ngi, bad ha kata ka balang kaba ha ïing jong me:

3 # Rom. 1:7. To long ka jingaiei ha phi bad ka jingsuk na U Blei U Kpa jong ngi bad na U Jisu Khrist uba U Trai.

Ka jingieit bad ka jingngeit u Philemon

4 # Rom. 1:8. Nga ainguh ïa U Blei jong nga ha la ka sngi, da kaba kynmaw ïa me ha ki jingduwai jong nga, 5haba ïohsngew shaphang ka jingieit jong me, bad ïa ka jingngeit kaba me don sha U Jisu uba U Trai, bad sha ki riewkhuid baroh; 6ba ka jingïasyllok ka jingngeit jong me kan ïoh long kaba don bor, ha ka jingtip ïa ka babha baroh kaba ha phi, sha U Khrist. 7Namar nga la don ka jingkmen bad ka jingpyntngen shibun ha ka jingieit jong me, naba la pynpyngngad ïa ka dohnud kita ki riewkhuid da me, ko para.

Ka jingkyrpad na ka bynta u Onesimos

8Naba kumta, la nga don shibun ka jingshlur ha U Khrist ban hukum ïa me ïa kata kaba dei, 9hynrei, na ka bynta ka jingieit nga kyrpad pynban, haba nga long kat u Paul u riewtymmen, bad mynta ruh u nongsah byndi U Jisu Khrist: 10#Kol. 4:9.nga kyrpad ïa me na ka bynta u khun jong nga u Onesimos, ïa uba nga la kha ha kine ki jingkhum jong nga; 11uba mynshuwa u la long u bymmyntoi ïa me, hynrei, mynta, u long uba myntoi ïa me bad ïa nga: 12ïa u hi, nga la phah noh pat sha me, uba long ka dohnud jong nga hi: 13ïa uba nga la kwah ban bat bad nga, ba na ka bynta jong me un ïoh shakri ïa nga ha ki jingkhum ka gospel: 14hynrei, khlem ka jingïakohnguh jong me, ngan ym leh ei ei; ba kata kaba leh bha jong me kan ym ïoh long kum na kaba leh bor, hynrei, da la ka mon sngewbha hi.

15Namar lehse na ka bynta kane la pynkhlad noh ïa u katto katne, ba men ïoh ïa u ha la ka rta; 16ym kum u mraw shuh, hynrei, kham halor ïa u mraw, u parabangeit ba-ieit, kham tam ha nga, hynrei, kaba katno tam ha me, ha ka doh bad ha U Trai! 17Namar kata, lada me ñiew ïa nga u nongïaïoh lem, to pdiang ïa u kum ïa nga hi. 18Hynrei, lada u la leh bymdei ei ei ïa me, lane u kit ram ei ei, to men kheiñ ïa kata ha nga; 19ma nga, u Paul, nga thoh da ka kti ka jong nga hi, nga ngan siew noh keiñ: ba ngan ym ong ha me, kumno ba me kit ram ruh na nga wat ïa lade hi ruh. 20Shisha, ko para, to ai ba ngan ïoh jingkmen na me ha U Trai: to men pynpyngngad ïa ka dohnud jong nga ha U Khrist.

21Da kaba shaniah ha ka jingkohnguh jong me, nga la thoh ha me, haba nga tip ba men leh ruh wat tam ïa kaba nga ong. 22Bad nalor kata, to men khreh ïa nga ruh ka ïingbasa; namar nga kyrmen ba da ki jingduwai jong phi, yn ai ïa nga ha phi keiñ.

Ki jingkhublei khatduh

23 # Kol. 1:7; 4:12. U Epaphras, u para basah byndi lem bad nga ha U Khrist Jisu, u khublei ïa me. 24#Ki Kam. 12:12,25; 13:13; 15:37-39; 19:29; 27:2; Kol. 4:10,14; 2 Tim. 4:10,11.Kumjuh u Mark, u Aristarkhos, u Demas, u Loukas, ki lok baïatrei lem jong nga.

25To long ka jingaiei U Jisu Khrist uba U Trai jong ngi bad ka mynsiem jong phi: Amen.

Currently Selected:

PHILEMON 1: KHB

Highlight

Copy