JUDAH 1

Ka jingkhublei

1 # Mat. 13:55; Mrk. 6:3. U Judah, u shakri U Jisu Khrist, bad u para u Jakob,

Ha kita ïa kiba la khot, kiba ieit ha U Blei U Kpa, bad ïa kiba la ri noh khnang ïa U Jisu Khrist:

2Ïa ka jingisynei ha phi, bad ka jingsuk bad ka jingieit to ai ba yn pynman bun.

Shaphang ki nonghikai balamler

3Ko hep ba-ieit, haba nga dang leh minot eh ban thoh ha phi shaphang kata ka jingpynim ba ïadei lem, nga la shem ba donkam eh ban thoh ha phi, ban sneng ïa phi ban ïaleh eh na ka bynta kata ka jingngeit, ïa kaba la aiti shi sien ai ha ki riewkhuid. 4#2 Pet. 2:1-18.Namar don kino kino ruh ki briew kiba la par sian shapoh, ïa kiba la kynthoh lypa la mynslem khnang sha kane ka jingpynrem, ki briew ki bymriewblei, kiba pynkylla ïa ka jingaiei U Blei jong ngi sha ka jingleh jakhlia, bad kiba len noh ïa U Jisu Khrist, uba long tang ma u hi U Kynrad bad U Trai jong ngi.

5 # Eks. 12:51; Jkñ. 14:29,30. Te nga kwah ban pynkynmaw ïa phi, la phi tip shi sien tip ïa kane baroh, ba U Trai haba u pyllait im ïa u paidlang na ka ri Ijipt; hadien kata, u la pynjot noh khoit ïa kita ki bym shym la ngeit. 6Ki angel ruh ki bym shym la ri ïa kata ka burom tynrai jong ki hi, hynrei, ki la iehnoh noh ïa ka jaka shong sah la ka jong hi, u la ri noh ïa ki ha ki kynjri bymjukut hapoh kaba dum tliw tliw, ïa ka jingbishar ka sngi bakhraw. 7#Jen. 19:1-24.Kumba ïa ka Sodom bad Gomorra, bad kita ki nongbah kiba sawdong ïa ki, haba ki ïashait ïaleh nuti, bad ki da leit bud ïa ka doh kawei pat, ha ka rukom kaba kum ïa kine, la buh ïa ki ha khmat kum ka rukom maham keiñ, da kaba ki shah ïa ka jingpynshitom hok ka ding bymjukut.

8Pynban, kine ruh kumjuh haba ki da phohsniew ki da pynbit-tngit ïa ka doh, bad ki ñiewbeiñ ïa ka jingsynshar, bad ki ïakrenbeiñ ïa ki bakhraw batri. 9#Dan. 10:13,21; 12:1; Jpw. 12:7; Deu. 34:6; Sekh. 3:2.Hynrei, u Mikhal u angel rangbah, mynba u dang ïa-pyneh bad u Soitan, ba u da ïasaid nia shaphang ka met u Moses, um nud ban bishar kat ban krenbeiñ ïa u, hynrei, u la ong, “To U Trai un da sneng ïa me!” 10Hynrei, kine ki ïakrenbeiñ ïa kat kita kiei kiei ruh ïa kiba kim tip satia; bad kat kita kiei kiei ruh ba ki tip na la ka kynja tynrai, kum ki mrad ba khlem jingmut, ha kita kiei kiei ruh la pynjot ïa ki. 11#Jen. 4:3-8; Jkñ. 22:1-35; 16:1-35.Kordit ïa ki! naba ki la ïaleit ïaid ha kata ka lynti u Kain, bad ki la ïaphet kyrthep ha kata ka jingsakma u Balaam namar ka bainong, bad ha kata ka jingïaleh kiat u Korah ki la jot noh. 12Kine ki long ki jingthohbria ha kita ki jingïakhawai ïa-ieit jong phi, haba ki ïakhawai lem bad phi, ki nongsharai kiba bsa sngaid ïa lade khlem da sheptieng; ki lyoh ba khlem um, ïa kiba la rong kynting noh da ki lyer; ki dieng Synrai kiba khlem soh, kiba la ïap noh ar sien, ïa kiba la rat noh; 13ki jingat phyllung ba khih dom eh ka duriaw, kiba sei tyrtho ïa ki jinglehrain jong ki hi; ki khlur ba ïaid sakma, ha kiba ïa u lyoh baïong jong ka jingdum la ri noh sha ka bymjukut.

14 # Jen. 5:21-24. Bad dei ïa kine, ba u Enokh ruh, u bahynñiew na u Adam, u la ïathuhlypa, u da ong, “Ha khmih U Trai u la wan bad ki shiphew hajar ki bakhuid jong u, 15ban leh ïa ka jingbishar halor baroh, bad ban pynrem noh ïa kita baroh ki bymriewblei shaphang kita ki jingleh baroh ka jingbymriewblei jong ki, ïa kiba ki la leh bymriewblei, bad shaphang kita ki ktien barunar eh ïa kiba ki la kren ki nongpop bymriewblei pyrshah ïa u.” 16Kine ki long kiba ïakren khñium, kiba ud wad daw, kiba ïaid katba kum ki jingkwah brai jong ki hi; bad ka shyntur jong ki ka kren ïa kiei kiei ba at sarong, ki da ñiew shiliang khmat ïa ki briew na ka bynta ka jingmyntoi.

Ka jingmaham bad ki jingsneng kyntu

17Hynrei, ma phi, ko hep ba-ieit, to kynmaw ïa kita ki ktien ïa kiba la ïathuhlypa da kita ki apostol U Jisu Khrist uba U Trai jong ngi; 18#2 Pet. 3:3.kumno ki la ju ong ha phi, ba ha ka Ïa ka bakhatduh kin long ki nongkrenbeiñ, kiba da ïaid katba kum kita ki jingkwah brai ki bymriewblei jong ki hi. 19Kine ki long kita kiba pynlong ki jingïakhlad, kiba kynja mrad, ki bymdon U Mynsiem. 20Hynrei, ma phi, ko hep ba-ieit, haba phi ïatei ïa lade ha kata ka jingngeit ka bakhuid tam jong phi, da kaba ïaiduwai ha U Mynsiem Bakhuid, 21to phin ri noh ïa lade ha ka jingieit U Blei da kaba ap khmih hir hir ïa kata ka jingisynei U Jisu Khrist uba U Trai jong ngi sha ka jingim bymjukut. 22Te ïa kiwei shisha to phin leh isynei, da ka bapynïapher; 23#Sekh. 3:3-4.hynrei, ïa kiwei pat to phin pynim, da kaba knieh kynthet ïa ki na ka ding, bad ïa kiwei pat to isynei da ka jingsheptieng, da kaba shun wat ïa kata ka jingphong ïa kaba la pynbit-tngit na ka jong ka doh.

Ka jingkyrkhu pynwai

24Te ha uta uba lah ban ri kyndong ïa phi ba khlem jynthut, bad ban pynïeng ïa phi ba khlem pop ha khmat ka burom jong u ha ka jingkmen bakhraw eh, 25ha U Blei U Bastad tang ma u hi uba U Nongpynim jong ngi, da U Jisu Khrist uba U Trai jong ngi, to long ka burom, bad ka jingkhraw tam, ka jingsynshar bad ka bor, mynta ruh, bad sha ki bymjukut baroh: Amen.

Currently Selected:

JUDAH 1: KHB

Highlight

Copy