ÏOANNIS 5

Ka jingpynkhiah ha ka pung sum

1Hadien kine kiei kiei ruh, la long Ka Jingkhawai Niam jong ki Jiw; te U Jisu u la leit kiew sha Jerusalem.

2 # Neh. 3:1; 12:39. Te don ha Jerusalem ka pung sum hajan Ka Khyrdop Langbrot, ïa kaba la khot ha ka ktien Hebru, “Bethesda”, kaba don san tylli ki baranda. 3Ha kine, la ju thiah bun bah ki bapang, ki bamatlah, ki ba-dkoh, ki bapang ïapshiliang, ba ki da ïa-ap ïa ka jingkhih jong kata ka um. 4Namar u angel haba dei u la ju leit hiar ha kata ka pung sum, bad u la ju pynkhih ïa ka um: ynda kumta, jar uba la leit hiar nyngkong hadien ka jingkhih jong kata ka um, u la ïoh khiah noh na kano kano ruh ka jingpang kaba u la ju don. 5Te la don hangta uwei u briew, uba la don ka jingpang, laiphew phra snem. 6U Jisu haba u la ïohi ïa une ba u thiah, bad U la tip ba u la long kumta la slem eh, U kylli ïa u, “Me kwah ban khiah?” 7Uta u bapang u la ïathuh ha U, “Ko Kynrad, ngam don briew u ban buh ïa nga ha kata ka pung sum, haba la pynkhih ïa ka um; hynrei, katba nga dang wan, uwei pat u leit hiar ha shuwa jong nga.” 8#Mrk. 2:11; Mat. 9:6; Luk. 5:24.U Jisu u ong ha u, “To ïeng, rah ïa la ka jingthiah, to ïaid ruh.” 9Te kumne kumne ruh, uta u briew u la khiah; bad u la rah ïa la ka jingthiah, bad u la ïaid.

Te ka la long ka Sabbaton ha kata ka sngi. 10#Neh. 13:19; Jer. 17:21; Ïoan. 7:23; 9:16; Mrk. 2:24.Namar kata, ki Jiw ki la ïa-ong ha uta uba la ïoh khiah, “Ka long ka Sabbaton: ka bymdei ïa me ban rah ïa la ka jingthiah.” 11U te u la ïathuh ha ki, “Uta uba la pynkhiah ïa nga, uta u la ong keiñ ha nga, ‘To rah ïa la ka jingthiah, to ïaid ruh.’ ” 12Te ki la ïakylli ïa u, “Uei uta u briew uba la ong ha me, ‘To rah ïa la ka jingthiah, to ïaid ruh’?” 13Hynrei, uta uba la ïoh khiah, um shym la ithuh uei U long: naba U Jisu u la lah kynriah noh na u paidbah uba ha kata ka jaka. 14#Mrk. 2:5.Hadien kata, U Jisu u shem ïa u ha ka templ, bad U la ong ha u, “Ha khmih, la pynkhiah ïa me: wat leh pop shuh, ïoh kan jia ha me kaei kaei ruh kaba kham sniew.” 15Uta u briew u la leit noh, bad u la ïathuh ha kita ki Jiw, ba U long U Jisu uba la pynkhiah ïa u. 16Namar kata te, kita ki Jiw ki la ïalehbeiñ ïa U Jisu, bad ki la ïawad dong ïa ka ban pynïap noh ïa U, naba U la leh ïa kine kiei kiei ruh ha ka Sabbaton. 17#Jen. 2:3.Hynrei, U Jisu u la ïathuh ha ki, “U Kpa jong nga u trei haduh mynta, nga ruh nga trei.”

18 # Ïoan. 7:1; 10:33. Namar kata te, kita ki Jiw ki la nang ïawad dong ïa ka ban pynïap noh ïa U, ym tang naba U la pynkheiñ ïa ka Sabbaton, hynrei, ba U la ong ruh ba U Blei u long U Kpa jong U hi, U da leh ïa lade marryngkat bad U Blei.

Ka iktiar U Jisu

19 # Ïoan. 5:30; 8:28; 14:10. Ynda kumta, U Jisu u la ïathuh bad u la ong ha ki, “Shisha, shisha nga ong ha phi, U Khun um lah ban leh ei ei ruh em na lade, hynrei, tang ïa kaba u ïohi ba U Kpa u leh: namar ïa kiei kiei ruh kiba u leh ma u, ïa kita ruh uta U Khun kumjuh u leh. 20#Ïoan. 14:12.Namar U Kpa u ieit ïa U Khun, bad u pyni ha u ïa kiei kiei baroh kiba u hi u leh: bad un pyni ha u ïa ki jingleh kiba kham khraw ïa kine, ba phi phin sngewkyndit. 21#Rom. 4:17; 8:11; Ïoan. 11:25.Namar kumba uta U Kpa u pynmih ïa ki baïap bad u pynim ïa ki, kumta ruh U Khun u pynim ïa kiba u mon. 22Namar U Kpa um bishar ïano ïano ruh, hynrei, u la ai ïa ka jingbishar baroh ha U Khun: 23#Luk. 10:16; 1 Ïoan. 2:23.ba baroh kin burom ïa U Khun, kumjuh kumba ki burom ïa U Kpa. Uta u bymburom ïa U Khun, um burom ïa U Kpa uba la phah ïa u. 24#Ïoan. 3:18.Shisha, shisha nga ong ha phi, ba uta uba ïohsngew ïa ka ktien jong nga, bad uba ngeit ha uta uba la phah ïa nga, u don ka jingim bymjukut; bad un ym wanhap sha ka jingpynrem, hynrei, u la lait shiliang na ka jingïap sha ka jingim.

25 # Ïoan. 4:21; 16:2,32. “Shisha, shisha nga ong ha phi, ba ka por ka jia, bad ka long mynta keiñ, haba ki baïap kin ïohsngew ïa ka jingpyrta ka jong U Khun U Blei: te kita kiba ïohsngew, kin ïoh im. 26Namar kumba U Kpa u don ka jingim ha lade, kumta u la ai ha U Khun ruh ban ïoh ka jingim ha lade: 27bad u la ai ruh ha u ka bor ïa ka ban bishar, naba u long U Khun u briew. 28Wat sngewkyndit ïa kane; naba ka por ka jia, ha kaba kita baroh kiba ha ki jingtep, kin ïohsngew ïa ka jingpyrta jong u, 29#Dan. 12:2; Ki Kam. 24:15; Ïoan. 11:24; Mat. 25:46; 1 Kor. 15:52.bad kin ïamih noh: kiba la leh babha, sha ka jingmihpat ka jingim; hynrei, kiba la leh bymman, sha ka jingmihpat ka jingpynrem.

Ka jingphla kaba shisha

30 # Ïoan. 5:19; 8:16; 6:38. “Nga ngam lah ban leh ei ei ruh em na lade hi; kumba nga ïohsngew, nga bishar: bad kata ka jingbishar jong nga ka long ka bahok; naba ngam wad ïa ka mon ka jong nga hi, hynrei, ïa ka mon U Kpa uba la phah ïa nga. 31#Ïoan. 8:14-18.Lada nga, nga phla shaphang ïa lade, ka jingphla jong nga, kam long kaba shisha. 32Don uwei pat uba phla shaphang jong nga, bad nga tip ba kata ka jingphla, ïa kaba u phla shaphang jong nga, ka long kaba shisha. 33#Ïoan. 1:7,19-27; 3:27-30.Phi hi phi la phah ha u Ïoannis, bad u ruh u la phla ïa kata kaba shisha. 34#1 Ïoan. 5:9.Hynrei, nga ngam pdiang ïa ka jingphla na u briew; hynrei, nga ong ïa kine kiei kiei ruh ba phin ïohlait im. 35Uta u la long ka sharak ba la thang bad batyngshaiñ; phi te phi la ïasngewbha ban ïashadkmen tang shibit ar bit ha ka jingshai jong u. 36#Ïoan. 10:25; 14:11; 15:24; Mat. 11:4.Hynrei, ma nga, nga don ka jingphla kaba kham khraw ïa ka jong u Ïoannis; namar kita ki jingleh ïa kiba U Kpa u la aiti ha nga ba ngan ïoh pyndep ïa ki, kita kijuh hi ki jingleh kiba nga leh, ki ïaphla shaphang jong nga, ba uta U Kpa u la phah ïa nga. 37#Mat. 3:17; Mrk. 1:11; Luk. 3:22.Uta U Kpa hi ruh uba la phah ïa nga, u la phla ïa nga. Hynrei, phim shym la ïohsngew ïa ka ktien jong u mynno mynno ruh, lymne ïohi ïa ka dur jong u. 38Bad phim don ka ktien jong u kaba ïaisah ha phi; naba ïa uba la phah ma u, ha uta phi phim ngeit. 39#Luk. 24:27; Ki Kam. 13:27.Phi ïit bha ïa Ki Jingthoh, naba ha ki, phi mut ba phi ïoh ka jingim bymjukut; kita ruh ki long kiba ïaphla ïa nga. 40Pynban, phim mon ban wan ha nga, ba phin ïoh ka jingim. 41Ngam pdiang ïa ka burom na ki briew. 42Hynrei, nga ithuh ïa phi, ba phim don ka jingieit U Blei ha lade. 43#Mat. 24:5.Nga, nga la wan ha ka kyrteng U Kpa jong nga, hynrei, phim pdiang ïa nga: lada uwei pat un wan ha ka kyrteng la ka jong hi, ïa uta phin pdiang. 44Kumno phi lah ban ngeit, phi kiba ïakhmih burom paralok hi, bad phim ïawad ïa kata ka burom kaba na U Blei uba tang ma u hi? 45#Ïoan. 9:28; Rom. 2:17.Wat mut ba nga ngan mudui ïa phi ha uta U Kpa: don uba mudui ïa phi, u Moses hi, ha uba phi ïakyrmen. 46Namar lada phi la ngeit ha u Moses, phin da ngeit ha nga ruh; namar uta u la thoh shaphang jong nga. 47#Luk. 16:29,31.Hynrei, lada phim ngeit ïa kita ki jingthoh jong u, kumno phin ngeit ïa kita ki ktien jong nga?”

Currently Selected:

ÏOANNIS 5: KHB

Highlight

Copy