HEBRU 7

Shaphang ka jinglong lyngdoh u Melkhisedek

1 # Jen. 14:17-20. Namar une u Melkhisedek, u syiem ka Salem, u lyngdoh jong U Blei U Bahakhlieh Tam Eh, uba la ïashem bad u Abraham haba u dang wan phai na kata kaba pom ïa kita ki syiem, bad uba la kyrkhu ïa u; 2ha uba u Abraham ruh u la ai ïa kaba shiphew na kiei kiei baroh (uba long nyngkong, haba la batai, “U Syiem ka hok”, bad hadien kata, U Syiem ka Salem, kaba long, “U Syiem ka jingsuk”; 3uba khlem kpa, uba khlem kmie, uba khlem jinghiar pateng, u bymdon ka jingsdang ki sngi, lymne ka jingkut ka jingim, hynrei, ïa uba la pynlong syriem ïa U Khun U Blei), u ïaisah u lyngdoh bymjukut.

4To pyrkhat te, une u briew u la long uba khraw katno, ha uba wat u Abraham u kthaw tymmen u la ai ïa kaba shiphew na kita ki jinglute. 5#Jkñ. 18:21.Bad kita kiba na ki khun u Lebi kiba ïoh ïa ka kam lyngdoh, ki don ka hukum ban shim kaba shiphew na u paidlang katba kum ka hukum, kata ka long, na la ki para, la kine ki la mih noh na ka syngkai u Abraham: 6hynrei, uta ïa uba ka jinghiar pateng jong u ym shym kheiñ na kita, u la shim ïa kaba shiphew na u Abraham, bad u la kyrkhu ïa uta uba don kita ki jingkular. 7Hynrei, khlem ka jingïasaid, ïa uba kham rit la ju kyrkhu da uba kham khraw. 8Bad hangne ki briew ki baïap ki ïoh ïa kiba shiphew, hynrei, hangta uta, uba shaphang jong u, la phla ba u im. 9Bad lah ban ong, ba u Lebi ruh, uba ïoh ïa kiba shiphew, u la siew kaba shiphew da u Abraham. 10Namar u la dang long ha ka syngkai u kpa jong u, mynba uta u Melkhisedek u la ïashem bad u.

11 # Salm. 110:4. Te lada don ka jingjanai da kata ka jinglong lyngdoh ki Lebi (namar ha ka, uta u paidlang u la ïoh ïa ka hukum), dang donkam aïu ba uwei pat u lyngdoh un mih ha kata ka rukom u Melkhisedek, bad ban ym kheiñ ïa u ha kata ka rukom u Aaron? 12Namar haba la pynkylla ïa ka jinglong lyngdoh, la donkam keiñ ba kan kylla ka hukum ruh. 13Namar uta shaphang uba la kren ïa kine kiei kiei ruh, u la dei ïa kawei pat ka jaid, na kaba uno uno ruh um ju sumar ïa ka duwan. 14Namar ka paw shynna ba U Trai jong ngi u la mih na u Judah; shaphang kata ka jaid, u Moses um shym kren ei ei ruh shaphang ki lyngdoh.

15Bad kata ka nang kham paw byllien, lada la mih uwei pat U Lyngdoh ha kata ka jingsyriem u Melkhisedek, 16ïa uba la pynlong ym katba kum ka rukom ka hukum bakynja doh, hynrei, katba kum ka bor ka jingim bymjukut. 17#Salm. 110:4.Namar la phla:

“Me long U Lyngdoh bymjukut

ha kata ka rukom

u Melkhisedek.”

18Namar ka don ka jingpyndam noh ïa ka hukum kaba mynshuwa, namar ka jingtlot bad ka jingbymmyntoi jong ka. 19(Namar ka hukum kam shym pynjanai ei ei ruh), bad nalor kata, kaba wallam ïa ka jingkyrmen kaba kham bha, da kaba ngi wan hajan U Blei.

20Bad kumba kam long khlem da smai 21#Salm. 110:4.namar shisha la pynlong lyngdoh ïa kita khlem ka jingsmai; hynrei, ïa une da ka jingsmai, da uta uba ong ha u:

“U Trai u la smai

bad un ym kylla-ka-bamut,

‘Me, me long

U Lyngdoh bymjukut.’ ”

22Kumta ruh, U Jisu u la long U Nongbahkhlieh ka jutang kaba kham bha.

23Bad kita shisha shibun la pynlong lyngdoh, namar la pynpep ïa ki ban neh da ka jingïap: 24hynrei, une, namar ba u ïaisah bymjukut, u don ka jinglong lyngdoh ka bymkylla. 25Namar kata, u lah ruh ban pynim janai ïa kita kiba wan ha U Blei da u, haba u im ha la ka rta ïa ka ban ïasaid na ka bynta jong ki.

26Namar U Rangbah lyngdoh uba kum uta u la bit ïa ngi, u bakhuid, uba lui lui, u bym da bit-tngit, uba la kyrpang na ki bapop, bad ïa uba la pynlong kham ha khlieh ïa ki bneng; 27#Leb. 9:7.u bymdonkam ha la ka sngi kum kita ki rangbah lyngdoh, ban kñia jingkñia shuwa namar ki pop la ki jong hi, bad hadien kata, namar ki pop u paidlang; namar ïa kane, u la leh tang shi sien leh, mynba u la kñia noh ïa lade. 28Namar kata ka hukum ka thung rangbah lyngdoh da ki briew kiba don ka jingtlot; hynrei, kata ka ktien jong kata ka jingsmai, kaba hadien kata ka hukum, ka thung ïa U Khun, ïa uba la pynjanai bymjukut.

Currently Selected:

HEBRU 7: KHB

Highlight

Copy