HEBRU 3

U Khrist u long kham khraw ban ïa u Moses

1Naba kumta, ko parabangeit bakhuid, ki nongïoh bynta na ka jingkhot bakynja bneng, to phin pyrkhat ïa u Apostol bad U Rangbah lyngdoh ka jingphla jong ngi, U Jisu keiñ; 2#Jkñ. 12:7.uba long uba ngeit ha uta uba la thung ïa u, kumba u Moses ruh u la long ha ka ïing jong u baroh. 3Namar la ñiew ba ka dei ïa une ban ïoh ka burom kaba kham khraw ban ïa u Moses, kumjuh kumba uta uba thaw ïa ka ïing u ïoh ka burom kaba kham khraw ban ïa kata ka ïing. 4Namar ïa ka ïing baroh la thaw dano dano ruh; hynrei, uta uba la thaw ïa kiei kiei baroh long U Blei keiñ. 5#Jkñ. 12:7.Te u Moses shisha u la long uba ïaineh ha ka ïing jong u baroh kum u shakri, ïa ka ban phla ïa kita kiei kiei ruh ïa kiba yn kren hadien; 6hynrei, U Khrist kum U Khun halor ka ïing jong u hi, ka ïing jong uba ngi long ma ngi, lada ngi ïaibat skhem ïa ka jingshaniah jong ngi bad ïa ka jingkmen ka jingkyrmen jong ngi haduh ka bakut.

Ka jingjahthait ïa ki briew jong U Blei

7 # Salm. 95:7-11. Naba kumta, kumba U Mynsiem Bakhuid u ong:

“Ha kane ka sngi,

lada phin sngew ïa ka ktien

jong u,

8wat pyneh ïa ki dohnud

jong phi,

kumba ha kata

ka jingpynkhih bitar,

kum ha kata

ka sngi ka jingtynjuh

ha ka ri khlaw,

9ha kaba ki kpa jong phi

ki la ïapynkhih bitar ïa nga,

ki la ïatynjuh ïa nga,

bad ki la ïohi

ïa ki kam jong nga

sawphew snem.

10Naba kumta,

nga la sngewsih sat

ïa kane ka pateng bynriew,

bad nga la ong,

‘Ha la ka sngi,

ki bakla ha la ka dohnud;

hynrei, ki, kim shym la ithuh

ïa ki lynti jong nga.’

11Kumta, nga la smai

ha ka jingbitar jong nga:

‘Kin ym ïoh leit bsut

sha ka jingjahthait jong nga.’ ”

12To sumar, ko parabangeit, ïoh ba kumno re kumno kan don hano hano na phi ka dohnud basniew ka jingbymngeit, ha ka ban phai dien noh na U Blei ba-im. 13Hynrei, to ïakyntu paralok ha la ka sngi, katba dang khot “Mynta ka sngi” ïa ka; ba yn ym pyneh ïano ïano ruh na phi da ka jingshukor ka pop. 14Namar ngi la jia long ki nongïoh bynta na U Khrist, lada ngin ïaibat skhem ïa kata ka basdang ka jingshaniah jong ngi haduh ka bakut; 15#Salm. 95:7-8.katba dang ong,

“Mynta ka sngi,

lada phin ïohsngew ïa ka ktien

jong u,

to wat pyneh ïa ki dohnud

jong phi,

kumba ha kata

ka jingpynkhih bitar.”

16 # Jkñ. 14:1-35. Namar kino kita, kiba, haba ki la ïohsngew, ki la pynkhih bitar ïa u? Hato kita baroh kiba la mih noh na Ijipt da u Moses kim shym leh? 17#Jkñ. 14:29.Badno te u la sngewsih sat sawphew snem? Ym bad kita kiba la leh pop, kiba ki metïap jong ki, ki la ïakyllon ha kata ka ri khlaw? 18Ha kino ruh u la smai ba kin ym ïoh leit bsut sha kata ka jingjahthait jong u, hynrei, tang ha kita keiñ ki bym shym kohnguh? 19Te kumta, ngi ïohi ba kim lah shuh ban leit bsut shapoh namar ka jingbymngeit keiñ.

Currently Selected:

HEBRU 3: KHB

Highlight

Copy