HEBRU 2

Ka jingpynim bakhraw

1Naba kumta, ka dei ïa ngi ban ïakham pynshahshkor ïa kita kiei kiei ruh ïa kiba la ïohsngew, ïoh ba kumno re kumno ngi tuid noh na ki. 2Namar lada kata ka ktien ïa kaba la kren da ki angel ka la long kaba skhem, bad ba ka jingpalat bad ka jingbymkohnguh baroh ka la pdiang ïa ka bainong hok; 3kumno ngi ngin ïohlait keiñ, lada ngi lyndet ïa ka jingpynim bakhraw katta katta? haba la kren ïa ka ha kaba mynnyngkong da U Trai, la pynskhem ïa ka ha ngi da kita kiba la ïohsngew; 4U Blei ruh u da phla lem bad ki, da ki dak khyllah bad da ki jingphylla bad da ki kambah bun jaid, bad da ki jingai U Mynsiem Bakhuid, katba kum ka mon jong u hi.

U Nongpynlong ka jingpynim

5Namar ym ha ki angel u la pynhapoh ïa kata ka pyrthei ka ban sa wan, shaphang kaba ngi kren. 6#Salm. 8:4-6.Hynrei, uwei ha kawei ka jaka u la phla u da ong:

“U briew u long aïu,

ba me kynmaw ïa u?

lane u khun u briew,

ba me wan khmih ïa u?

7Me la pynlong ïa u

kham poh khyndiat

ban ïa ki angel;

me la pynphong pansngiat ïa u

da ka burom

bad ka jingpyndonburom,

bad me la buh ïa u

halor ki kam ki kti jong me:

8Me la pyndem

ïa kiei kiei baroh

hapoh ki kjat jong u.”

Namar ha kaba u la pyndem ïa kiei kiei baroh ha u, um shym pynsah ei ei ruh ka bym shym pynhapoh ha u. Hynrei, mynta, ngim pat ïohi ba la pynhapoh ïa kiei kiei baroh ha u; 9hynrei, ngi ïohi ïa U Jisu ïa uba la pynlong kham poh khyndiat ban ïa ki angel, na ka bynta kata ka jingshahïap jong u, ba la pynphong pansngiat ïa u da ka burom bad da ka jingpyndonburom; ba da ka jingaiei U Blei, un mad ïa ka jingïap na ka bynta baroh.

10Namar ka la bit ïa u, na ka bynta jong u ba la long kiei kiei baroh, bad da u ba long kiei kiei baroh, ha kaba u ïalam ïa ki khun shibun sha ka burom, ban pynjanai ïa U Nongpynlong ka jingpynim jong ki da ki jingshahshitom. 11Namar uta uba pynkyntang ruh bad kita ïa kiba la pynkyntang ki long baroh na uwei keiñ; namar kata ka daw, um sngewlehrain ban khot para ïa ki, 12#Salm. 22:22.u da ong:

“Ngan pynbna ïa ka kyrteng

jong me

ha ki para jong nga,

hapdeng ka balang

ngan rwai ïaroh ïa me.”

13 # Isa. 8:17-18. Pat ruh:

“Ngan buh la ka jingshaniah

ha u.”

Bad:

“Ha khmih, ma nga

bad kita ki khun ïa kiba U Blei

u la ai ha nga.”

14Namar kata, haba kita ki khun ki long ki nongïoh bynta na ka doh bad ka snam, ma u hi ruh, da kajuh ka rukom u la shim bynta na kijuh; ba da ka jingïap un ïoh pynduh noh ïa uta uba don ka bor ka jingpynïap, uta u long u Soitan keiñ; 15bad ba un ïoh pyllait ïa kita baroh kiba da kaba sheptieng ïa ka jingïap ki la ju long baroh shi rta hapoh ka jinglongmraw. 16#Isa. 41:8-9.Namar shisha um shim ïa ka jong ki angel, hynrei, u shim ïa u symbai u Abraham keiñ. 17Namar kata, ka la dei ban pynlong ïa u, uba syriem ïa la ki para ha kiei kiei baroh, ba un ïoh long U Rangbah lyngdoh ba-isynei bad ïa uba lah ban shaniah ha kiei kiei kiba dei sha U Blei, ba un pynlong ka kuna namar ki pop u paidlang. 18Namar ha kaba ma u hi u la shah haba la pynshoi ïa u, u lah keiñ ban ïarap ïa kita ïa kiba la pynshoi.

Currently Selected:

HEBRU 2: KHB

Highlight

Copy