JENESIS 48

U Jakob u kyrkhu ïa u Ephraim bad ïa u Manasseh

1Bad ka la jia ruh, ynda la lah kine kiei kiei ruh, ba uwei u la leit ïathuh ha u Joseph, “Ha khmih, u kpa jong me u pang:” ynda kumta, u la shim ïa ki khun shynrang jong u baroh ar ngut lem bad u, u Manasseh bad u Ephraim. 2Bad uwei ruh u la ïathuh ha u Jakob de, u la ong, “Ha khmih, u Joseph u khun jong me u wan sha me:” te u Israel u la pynshait ïa lade, bad u la shong ha ka jingthiah. 3#Jen. 28:13-14.Bad u Jakob u la ong ha u Joseph, “U Blei U Badonbor Baroh u la mihpaw ha nga ha Lus ha ka ri Kanaan, bad u la kyrkhu ïa nga, 4u la ong ruh ha nga, ‘Ha khmih, ngan pynlong ïa me uba sei soh kyrhai, bad ngan nang pynroi ïa me, bad ngan pynlong ïa me ka jaid bynriew babun paidbah; bad ngan ai ïa kane ka khyndew ïa u symbai jong me hadien jong me ba kan long ka bynta trai junom.’ 5Bad mynta ki khun jong me baroh ar ngut, ïa kiba la kha ïa me ha ka ri Ijipt mynshuwa ba nga la poi sha me sha ka ri Ijipt, kin long ki jong nga: u Ephraim bad u Manasseh kin long ki jong nga, kum u Reuben bad u Simeon. 6Bad ki khun jong me, ïa kiba men pynkha hadien jong ki, kin long ki jong me hi, bad yn sa khot ïa ki ha ka kyrteng la ki hynmen ha ka jingïoh bynta trai jong ki. 7#Jen. 35:16-19.Bad ynda nga la wan na Padan-Aram, ka Rakhel ka la ïap noh bad nga ha ka ri Kanaan ha lynti, haba dang don sa shi mail ka lynti haduh Ephrath: bad nga la tep ïa ka hangta ha ka lynti jong ka Ephrath; kaba long ka Bethlehem.”

8Bad u Israel u la ïohi ïa ki khun shynrang u Joseph, bad u la ong, “Kiei kine?” 9Bad u Joseph u la ïathuh ha la u kpa, “Kine ki khun shynrang jong nga, ïa kiba U Blei u la ai ha nga shane.” Ynda kumta, u la ong, “To wallam ïa ki sha nga, nga kyrpad ïa me, bad ma nga, ngan kyrkhu ïa ki.” 10Te ki khmat u Israel ki la ïabyrngut namar ba la tymmen, katba um lah imat shuh: bad u la wallam ïa ki hajan jong u; bad u la doh ïa ki, bad u la kdup ïa ki ruh de. 11U Israel u la ong ruh ha u Joseph, “Ngam shym la ngeit ba ngan ïohi ïa ka khmat jong me shuh: te ha khmih, U Blei u la pyni ha nga ïa u symbai jong me ruh putet.” 12Bad u Joseph u la pynmih noh ïa ki napdeng ki khohsiew jong u, bad u la nguh haduh ka khyndew ha khmat jong u. 13U Joseph ruh u la shim ïa ki baroh ar ngut, ïa u Ephraim ha la ka kti kamon shaphang ka kti kadiang jong u Israel, bad ïa u Manasseh ha ka kti kadiang jong u shaphang ka kti kamon jong u Israel, bad u la wallam ïa ki hajan jong u. 14Bad u Israel u la kner ïa la ka kti kamon, bad u la buh ïa ka halor ka khlieh u Ephraim, uba long u bakhatduh, bad ïa la ka kti kadiang halor ka khlieh u Manasseh, u da ïalam tipbriew ïa la ki kti de; naba u Manasseh u la long u khun nyngkong. 15Bad u la kyrkhu ïa u Joseph, bad u la ong,

“U Blei uba ha khmat jong u

ki la ïaid ki kpa jong nga,

u Abraham bad u Isaak,

uta U Blei uba la bsa ïa nga

naduh ba nga la long

haduh kane ka sngi,

16uta u angel uba la

pyllait im ïa nga

na ka basniew baroh,

un kyrkhu ïa kine

ki samla;

ïa ka kyrteng jong nga ruh

bad ka kyrteng ki kpa

jong nga

u Abraham bad u Isaak,

yn sa khot ha ki;

to ai ba kin ïakha roi ruh

kum ki dohkha ha

ka jingbun

hapdeng kata ka ri.”

17Bad u Joseph haba u la ïohi ba u kpa jong u, u buh ïa ka kti kamon jong u halor ka khlieh u Ephraim, ka la pynsngewsih ïa u: bad u la bat ïa ka kti u kpa jong u, ïa ka ban pynkynriah ïa ka na ka khlieh u Ephraim sha ka khlieh u Manasseh. 18U Joseph u la ong ruh ha la u kpa, “Ym kumta, ko kpa: naba une u long u khun nyngkong; to buh ïa la ka kti kamon halor ka khlieh jong u.” 19Te u kpa jong u, u la kyrngah bad u la ong, “Nga tip ma nga, ko khun, nga tip ma nga: une ruh un long u paidbah, bad un long u bakhraw une ruh de: hynrei, shisha u para uba hadien jong u un long uba kham khraw ïa u, bad u symbai jong u un long ka jingpyndap ki jaid bynriew.” 20#Heb. 11:21.Bad u la kyrkhu ïa ki ha kata ka sngi, u da ong,

“Ha me u kynja Israel

un kyrkhu,

u da ong, ‘U Blei

un pynlong ïa me

kum u Ephraim

bad kum u Manasseh:’ ”

Bad u la buh ïa u Ephraim ha shuwa ïa u Manasseh. 21U Israel u la ong ruh ha u Joseph, “Ha khmih, ngan sa ïap noh: hynrei, U Blei un long ryngkat bad phi, bad un ïalam pat ïa phi sha ka ri ki kpa jong phi. 22Bad nga la ai ha me kawei ka bynta tam nalor ki hynmen hynbew jong me, ïa kaba nga la knieh na ka kti ki kynja Amor da la ka waitlam bad da la ka ryntieh.”

Currently Selected:

JENESIS 48: KHB

Highlight

Copy