JENESIS 47

1Ynda kumta, u Joseph u la wan ïathuh ha u Pharaoh, bad u la ong, “U kpa jong nga bad ki hynmen hynbew jong nga, bad ki kynhun jong ki, bad ki masi jong ki, bad baroh katba ki don, ki la ïawan noh na ka ri Kanaan; bad ha khmih, ki ïadon hi ha ka ri Goshen.” 2Bad u la ïalam bad u kiba na ki hynmen jong u, kat san ngut, bad u la buh ïa ki ha khmat u Pharaoh. 3Bad u Pharaoh u la ong ha ki hynmen jong u, “Kaei ka kam jong phi?” Ki te ki la ïathuh ha u Pharaoh, “Ki shakri jong me ki long ki nongsharai langbrot, ma ngi ruh bad ki kpa tymmen jong ngi de.” 4Ki la ïathuh ruh ha u Pharaoh, “Ïa ka ban shong sohsyiem ha kane ka ri ngi la ïawan; namar ba ki shakri jong me kim don jaka bam phlang ïa la ki kynhun; naba kane ka 'nemsniew ka la jur eh ha ka ri Kanaan: bad mynta, ngi kyrpad ïa me, to shah ba ki shakri jong me kin ïashong sah ha ka ri Goshen.” 5Bad u Pharaoh u la kren ha u Joseph, u da ong, “U kpa jong me bad ki hynmen hynbew jong me ki la ïawan sha me. 6Ka ri Ijipt ka long ha khmat jong me; to pynshong sah ïa la u kpa bad ïa la ki hynmen hynbew ha ka jaka ka babha tam ha ka ri; to kin ïashong sah ha ka ri Goshen: bad lada me tip ba don hapdeng jong ki, ki briew kiba nang, to buh ïa ki te ki nongsharai barangbah halor ki jingri jong nga hi.”

7Bad u Joseph u la ïalam hapoh sa ïa u Jakob u kpa jong u, bad u la buh ïa u ha khmat u Pharaoh: bad u Jakob u la kyrkhu ïa u Pharaoh. 8Bad u Pharaoh u la ong ha u Jakob, “Katno ki long ki sngi ki snem ka rta jong me?” 9Bad u Jakob u la ong ha u Pharaoh, “Ki sngi ki snem ka jingïaid ka jingim jong nga ki long shispah laiphew snem: ki sngi ki snem ka jingim jong nga ki la long kiba khyndiat bad ki basniew, bad kim pat kot ïa ki sngi ki snem ka jingim ki kpa jong nga, kumba ha ki sngi ki snem ka jingïaid ka jingim jong ki.” 10Bad u Jakob u la kyrkhu ïa u Pharaoh, bad u la mih noh na khmat u Pharaoh. 11Bad u Joseph u la pynshong neh ïa la u kpa bad ïa la ki hynmen hynbew, bad u la ai ha ki, ïa ka bynta trai ha ka ri Ijipt, ha ka jaka kaba kham bha tam, ha ka khyndew Rameses, kumba u Pharaoh u la lah ai hukum. 12Bad u Joseph u la bsa ïa la u kpa, bad ïa la ki hynmen hynbew, bad ïa ka ïing u kpa jong u baroh, da u kpu, katba kum ki ba-ha-ïing jong ki.

Ka jingpynïaid kam u Joseph ha ka por jong ka 'nemsniew

13Bad ym shym don ka jingbam ha kata ka ri baroh kawei; naba kata ka 'nemsniew ka la jur eh, katba ka ri Ijipt bad ka ri Kanaan ki la kumba ïapler namar kata ka 'nemsniew. 14Bad u Joseph u la ïalum ïa ki sbai baroh ïa kiba la ïoh shem ha ka ri Ijipt, bad ha ka ri Kanaan, na ka bynta u Kew ba ki la thied: bad u Joseph u la wallam ïa kita ki sbai sha ïing u Pharaoh. 15Bad ynda la lah lut ki sbai ha ka ri Ijipt, bad ha ka ri Kanaan, ki kynja Ijipt baroh ki la leit sha u Joseph, ki da ong, “To ai jingbam ïa ngi: naba balei ngin ïap ha khmat jong me? namar ki sbai ki la lut noh.” 16Te u Joseph u la ong, “To ai noh ïa la ki jingri; bad ngan ai ha phi na ka bynta ki jingri jong phi, lada la lut noh ki sbai.” 17Ynda kumta, ki la wallam ïa la ki jingri ha u Joseph: bad u Joseph u la ai ïa u kpu ha ki na ka bynta ki kulai, bad na ka bynta ki kynhun langbrot, bad na ka bynta ki kynhun masi, bad na ka bynta ki kadda de: bad u la bsa ïa ki da ka jingbam na ka bynta ki jingri baroh jong ki ha kata ka snem. 18Ynda la lah kata ka snem, ki la ïawan ha u ha kawei pat ka snem kaba mih, bad ki la ïa-ong ha u, “Ngin ym buhrieh na u kynrad jong ngi ba ki la lah lut noh ki sbai; bad ki jingri ruh ki la long ki jong u kynrad jong ngi; ym sah shuh ei ei ruh ha khmat u kynrad jong ngi, sa tang ki met jong ngi, bad ka khyndew jong ngi. 19Na ka balei ngin ïap noh ha khmat jong me, ma ngi ruh bad ka khyndew jong ngi? To da thied ïa ngi bad ïa ka khyndew jong ngi da ka jingbam, bad ma ngi bad ka khyndew jong ngi ngin long ki shakri jong u Pharaoh: bad to ai symbai ha ngi, ba ngin ïoh im, bad ba ngin ym ïap noh, bad ba ka khyndew kan ym kylla khlaw noh.”

20Kumta, u Joseph u la thied ïa ka khyndew baroh ka ri Ijipt ïa u Pharaoh; naba kita ki Ijipt ki la die noh uwei uwei ruh baroh ïa la ka lyngkha, naba kata ka 'nemsniew ka la nang kham jur halor jong ki: kumta ka khyndew ka la hap ha u Pharaoh. 21Ïa u paidlang, ruh u la pynkynriah sha ki nongbah na kawei ka bakut sha kawei pat ka bakut jong ka ri Ijipt. 22Tang ïa ka khyndew jong ki lyngdoh ym shym la thied; naba kita ki lyngdoh ki la ïoh ïa la ka jingsam na u Pharaoh, bad ki la ïabam na kata ka bynta ïa kaba u Pharaoh u la ai ha ki: namar kata, kim shym la die ïa la ka khyndew. 23Ynda kumta, u Joseph u la ong ha uta u paidlang, “Ha khmih, nga la thied ïa phi mynta bad ïa ka khyndew jong phi ïa u Pharaoh: ha khmih, une u symbai ïa phi, to phin bet symbai ruh ha ka khyndew. 24Kan jia ruh haba u la mih, ba phin ai ïa kaba san bynta ha u Pharaoh, bad saw bynta kin long ki jong phi hi, ïa ka ban ïoh symbai ïa ka khyndew, bad ban ïoh jingbam ïa phi, bad ïa kita ki ba-ha-ïing jong phi, bad ïa ka ban ïoh ka jingbam ïa ki khun khynnah jong phi de.” 25Bad ki la ïa-ong, “Me la ri pynim ïa ngi: to shah ba ngin shem ka jingsngewbha ha khmat u kynrad jong ngi, bad ma ngi ruh ngin long ki shakri jong u Pharaoh.” 26Bad u Joseph u la pynlong ba kata kan long ka rukom haduh kane ka sngi halor ka khyndew ka ri Ijipt, ba u Pharaoh un ïoh ïa kaba san bynta; hynrei, tang ka khyndew jong ki lyngdoh, ka bym shym la hap ha u Pharaoh.

Ka jingpynsmai u Jakob ïa u Joseph shuwa ba un ïap

27U Israel ruh u la shong duh ha ka ri Ijipt, ha ka khyndew Goshen; bad ki la ïoh ki bynta trai ha ka, bad ki la ïaman bha, bad ki la ïa nang roi shikatdei eh ruh. 28U Jakob ruh u la im ha ka ri Ijipt khathynñiew snem: kumta, ki sngi ka rta jong u Jakob, ki snem ka jingim jong u keiñ ki la long shispah sawphew hynñiew snem.

29 # Jen. 49:29-32; 50:6. Bad ki sngi jong u Israel ki la nang jan ba un ïap noh: te u la khot ïa u Joseph u khun jong u, bad u la ong ha u, “Lada mynta nga la shem ka jingsngewbha ha khmat jong me, to buh, nga kyrpad ïa me, ïa la ka kti hapoh ka skhep jong nga, bad to pyni ïa nga ïa ka jingsngewbha bad ïa ka jingshisha; to wat tep ïa nga, nga kyrpad ïa me, ha ka ri Ijipt: 30hynrei, ngan ïohthiah bad ki kpa jong nga, te men pynbah noh ïa nga na ka ri Ijipt, bad to men tep ïa nga ha ka jingtep jong ki.” U ruh u la ong, “Ngan leh keiñ kat kumba ka long ka ktien jong me.” 31Bad u la ong, “To smai ha nga.” U te u la smai ha u. Ynda kumta, u Israel u la dem ha khlieh ka jingthiah.

Currently Selected:

JENESIS 47: KHB

Highlight

Copy