JENESIS 25

Ki khun shynrang u Abraham na ka Keturah

(1 Khrn. 1:32-33)

1Bad u Abraham u la shim sa kawei pat ka tnga, bad ka kyrteng jong ka, ka la long “ka Keturah”. 2Bad ïa u ka la kha ïa u Simran, bad ïa u Jokshan, bad ïa u Medan, bad ïa u Midian, bad ïa u Ishbak, bad ïa u Shuah. 3Bad u Jokshan u la pynkha ïa u Sheba, bad ïa u Dedan. Bad ki khun shynrang u Dedan ki la long ki Asshurim, bad ki Letushim, bad ki Leummim. 4Bad ki khun shynrang u Midian ki la long u Ephah, bad u Epher, bad u Hanokh, bad u Abidah, bad u Eldaah. Te kine baroh ki la long ki khun shynrang ka Keturah. 5Bad u Abraham u la ai baroh katba u don ha u Isaak. 6Hynrei, ïa kita ki khun shynrang ba u Abraham u la ïoh na ki tnga ba kham poh jong u, u Abraham u la ai ïa ki jingai, bad u la phah noh ïa ki na u Isaak u khun jong u, mynba u dang im, shaphang mihngi, sha ka ri mihngi.

Ka jingïap bad kaba tep ïa u Abraham

7Kine mynta ki long ki sngi ki snem ka jingim baroh kawei jong u Abraham ïa kiba u la im, shispah hynñiewphew san snem. 8Bad u Abraham u la ïap noh, u la ïap ruh ha ka jinglong tymmen ba la ïaw bha keiñ, bad u la hun tymmen ruh, ba u la dap da ki snem; bad la ïalum ïa u sha u paidlang jong u. 9Te u Isaak bad u Ishmael ki khun jong u, ki la ïatep ïa u ha ka krem Makhpelah, ha ka lyngkha u Ephron u khun u Sohar u khun u Heth, kaba marpyrshah ïa ka Mamre; 10#Jen. 23:3-16.kaba long kata ka lyngkha ïa kaba u Abraham u la thied na ki khun shynrang u Heth: hangta la tep ïa u Abraham, bad ïa ka Sara ka tnga jong u. 11Te ynda la ïap u Abraham, U Blei u la kyrkhu ïa u Isaak u khun jong u; bad u Isaak u la shong sah hajan ka pukri Lahai-roi.

Kiba hiar pateng na u Ishmael

(1 Khrn. 1:28-31)

12Bad kine ki long ki jinghiar pateng bynriew jong u Ishmael, u khun u Abraham, ïa uba ka Hagar kaba ka kynja Ijipt, ka shakri ka Sara, ka la kha ïa u Abraham. 13#1 Khrn. 1:29-31.Bad kine ki long ki kyrteng jong ki khun shynrang u Ishmael, ha la ka kyrteng kyrteng, kat kumba la kha pateng ïa ki: u Nebaioth u khun nyngkong u Ishmael, bad u Kedar, bad u Abdeel, bad u Mibsam, 14bad u Mishma, bad u Dumah, bad u Massa, 15u Hadar, bad u Tema, u Jetur, u Naphish, bad u Kedemah. 16Kine ki long ki khun shynrang u Ishmael, bad kine keiñ ki long ki kyrteng jong ki, ha la ka shnong ka shnong, bad ha la ki kut; khat-ar ki syiem ha la ka jaid ka jaid bynriew. 17Bad kine ki long ki snem ka jingim jong u Ishmael, shispah laiphew hynñiew snem: te u la kut noh ka mynsiem bad u la ïap noh; bad la lum ïa u ruh sha u paidlang jong u. 18Bad ki khun jong u ki la ïashong sah naduh ka ri Habilah haduh ka ri Shur, kaba ha khmat ka ri Ijipt, haba me ïaid ha ka lynti shaphang ka ri Assyria: namar la hap ban shongneh u Ishmael ha khmat ki para jong u baroh.

Ka jingkha ïa u Iso bad ïa u Jakob

19Bad kine ki long ki jinghiar pateng u Isaak, u khun u Abraham: u Abraham u la pynkha ïa u Isaak, 20bad u Isaak u la long sawphew snem mynba u la shim ïa ka Rebekka ka khun u Bethuel, u kynja Syria na ka ri Padan-Aram, ka para u Laban u kynja Syria, ïa ka ban long ka tnga jong u. 21Bad u Isaak u la ïai-duwai ha U Trai na ka bynta ka tnga jong u, namar ba ka long kaba lyngki: bad U Trai u la shahshkor ïa u, te ka Rebekka ka tnga jong u ka la punkhun. 22Te ki khun ki la khih ïaleh lem ha ka kpoh jong ka; ka te ka la ong, “Lada ka long kumta, hato balei ba nga long kumne?” Te ka la leit kylli ïa U Trai. 23#Rom. 9:12.Bad U Trai u la ong ha ka,

“Don ha ka kpoh jong pha

ar ki jaid bynriew,

bad ar ki paidbah keiñ

kin sa ïakhlad

noh ïa lade hi

ha ka kpoh jong pha;

bad uwei u paidlang

un kham don bor

ïa uta uwei pat;

bad uta uba shuwa

un shakri

ïa uba hadien.”

24Bad ynda la dap ki sngi jong ka, ïa ka ban kha, ha khmih, ar ngut bashong synrop ha ka kpoh jong ka. 25Bad uba nyngkong u la mih noh uba saw baroh shimet kum ka jaiñkup ba shñiuh; bad ki la khot kyrteng “u Iso” ïa u. 26Te hadien kata, la mih noh u para jong u, bad ka kti jong u ka da bat ïa u Iso na ka khongdong'jat jong u; nangta la khot kyrteng “u Jakob” ïa u: bad u Isaak u la long uba hynriewphew snem ka rta mynba ka la kha ïa ki.

U Iso u die noh ïa la ka jinglong hynmen

27Bad kita ki khynnah ki la nang san: bad u Iso u la long uba nang beh mrad, u briew uba ju ïaidwir eh ha madan; hynrei, u Jakob u la long u briew uba jemnud, uba shong ha la ki ïingtrep. 28Bad u Isaak u la ieit ïa u Iso, namar ka doh skei jong u ba u la ju bam: hynrei, ka Rebekka ka la ieit ïa u Jakob.

29Bad u Jakob u la shet ïa ka jingshet syrwa: hadien kata, u Iso u la wan na lyngkha, bad u la sngewthait lwait ruh. 30Bad u Iso u la ong ha u Jakob, “To shah ïa nga ban bam, nga kyrpad ïa me, na kata kaba saw saw, naba nga sngewjrem eh:” namar kata la khot “u Edom” ïa u. 31Te u Jakob u la ong, “To die noh ha nga ha kane ka sngi ïa ka hok ka jinglong hynmen jong me.” 32Bad u Iso u la ong, “Ha khmih, ngan sa ïap noh: bad kan myntoi aïu ïa nga kane ka hok ka jinglong hynmen?” 33#Heb. 12:16.Bad u Jakob u la ong, “To smai ha nga mynta ka sngi;” u te u la smai ha u: bad u la die noh ïa ka hok ka jinglong hynmen jong u ha u Jakob. 34Te u Jakob u la ai ha u Iso ïa u kpu bad ïa ka jingshet syrwa da u kynja ri; u ruh u la bam bad u la dih, bad u la ïeng joit, bad u la leit noh ruh: kumta, u Iso u la ibeiñ ïa ka hok ka jinglong hynmen jong u.

Currently Selected:

JENESIS 25: KHB

Highlight

Copy