JENESIS 24

Ka tnga ïa u Isaak

1Bad u Abraham u la tymmen, ki sngi ka rta jong u ki la dier bun eh: bad U Trai u la lah kyrkhu ïa u ha kiei kiei baroh. 2Bad u Abraham u la ong ha la u shakri uba kham shuwa eh ka rta ha ka ïing jong u, bad uba synshar halor kiei kiei baroh katba u don, “To buh, nga kyrpad ïa me, ïa la ka kti hapoh ka ksang lbong jong nga: 3bad ngan pynsmai ïa me da U Trai uba U Blei jong ka bneng, bad U Blei jong ka khyndew, ba men ym shim ka tnga ïa u khun jong nga na ki khun kynthei jong ki kynja Kanaan, kiba nga shong sah hapdeng jong ki: 4hynrei, men leit sha ka ri jong nga, bad sha ki parakher paramer jong nga hi, bad men shim ka tnga ïa u Isaak u khun jong nga nangta keiñ.” 5Bad uta u shakri u la ong ha u, “Lehse kata ka briew kam mon ban wan bud ïa nga sha kane ka ri: hato ka dei shisha ba ngan leit ïalam pat ïa u khun jong me sha kata ka ri na kaba me la wan noh?” 6Te u Abraham u la ïathuh ha u, “To sumar ba men ym ïalam pat shatai ïa u khun jong nga. 7U Trai uba U Blei jong ka bneng uba la shim noh ïa nga na ka ïing u kpa jong nga, bad na ka ri ki kur jong nga, bad uba la ïakren bad nga, bad uba la smai ruh ha nga, u da ong, ‘Ha u symbai jong me ngan ai duh ïa kane ka khyndew;’ un phah ïa la u angel ha shuwa jong me, bad me ruh men shim ka tnga ïa u khun jong nga nangtai keiñ. 8Hynrei, lada kata ka briew kam da mon ban wan bud ïa me, me te men long ba la khuid na kane ka jingsmai jong nga: tangba men ym ïalam pat ïa u khun jong nga shatai.” 9Te uta u shakri u la buh ïa la ka kti hapoh ka ksang lbong u Abraham u kynrad jong u, bad u la smai ha u shaphang kane ka kam.

10Bad uta u shakri u la shim shiphew tylli ki ut na ki ut u kynrad jong u, bad u la leit noh; bad na kiei kiei baroh kiba kham bha ba dei ïa u kynrad jong u ha la ka kti: bad u la khie, bad u la leit noh sha ka ri Mesopotamia, sha ka shnong u Nahor. 11Bad u la pyndem khohsiew ïa kita ki ut shabar kata ka shnong hajan ka pukri tong um la janmiet, hamar ka por ba ki ju wan ki kynthei ban tong um. 12U la duwai te, “Ko Trai uba U Blei u Abraham u kynrad jong nga, nga kyrpad ïa me, to pyllaitluid bha ïa ka lynti ha khmat jong nga ha kane ka sngi, bad to pyni ïa ka jinglehsbun ïa u Abraham u kynrad jong nga. 13Ha khmih, nga ïeng hangne hajan kane ka pukri tong um; bad ki khun kynthei ki trai jong kane ka shnong ki ïawan ïa ka ban tong um. 14To shah ba kan jia ruh, ba kata ka samla ha kaba ngan ong, ‘To da pynhiar noh ïa la u khiew, nga kyrpad ïa pha, ba ngan ïoh dih;’ te lada kan ong, ‘To dih, bad ïa ki ut jong me ruh ngan ai ban dih;’ to ai ba kata kan long ïa kaba me la thmu ïa u Isaak u shakri jong me; bad na kata keiñ, ngan ïoh tip ba me la pyni ïa ka jinglehsbun ïa u kynrad jong nga.”

15Ka la jia ruh, haba um pat la lah wai ban kren; ba ha khmih, ka Rebekka ka la wan mih noh, ïa kaba la kha ïa u Bethuel, u khun ka Milkah, ka tnga u Nahor, u para u Abraham, bad u khiew tong um jong ka ha la ka tyrpeng. 16Bad kata ka samla ka la long kaba ibhabriew eh, ka theisotti keiñ, namar uno uno ruh em u briew um shym la ithuh ïa ka: bad ka la leit hiar sha kata ka pukri, bad ynda ka la pyndap ïa la u khiew tong um, ka la wan kiew pat. 17Te uta u shakri u la phet ban ïashem bad ka, bad u la ong ruh, “To shah ïa nga mynta, nga kyrpad ïa pha, ban shu kjit khyndiat ka um na u khiew um jong pha.” 18Ka te ka la ong, “To dih, ko kynrad”: bad ka la pynkloi, bad ka la pynhiar noh ïa la u khiew um ha la ka kti bad ka la ai ha u ban dih. 19Bad ynda ka la lah ai ha u ban dih, ka la ong, “Ngan da tong um ïa ki ut jong me ruh, ha ban da ki la kdang.” 20Bad ka la pynkloi, bad ka la theh lut ïa la u khiew um ha ka shyngoid, bad ka la phet biang pat sha kata ka pukri ban tong um, bad ka la tong um kumta ïa ki ut jong u baroh. 21Bad uta u briew ba u da iphylla ïa ka u da sngap jar noh, ïa ka ban tip lada U Trai u la lah pynman bha ne em ïa ka jingwan jong u.

22Ka la jia ruh, ynda ki la lah dih kita ki ut, ba uta u briew u la shim ïa ka nod ksiar kawei, kaba shong kumba shiteng tola, bad ïa ki ar tylli ki khadu ïa ki ryndang kti jong ka kiba shong kumba shiphew tola da ka ksiar; 23bad u la kylli, “Hato pha long ka khun jongno? to ïathuh ha nga mynta, nga kyrpad ïa pha: don ka jaka ne em ha ïing u kpa jong pha ba ngin ïashong basa?” 24Ka te ka la ïathuh ha u, “Ma nga, nga long ka khun u Bethuel u khun ka Milkah, ïa uba ka la kha ïa u Nahor.” 25Bad ka la nang ïathuh ha u, “Ngi don u skum phlang bad u stait bam ba dap biang, bad ka jaka ïa ka ban shong basa ruh de.” 26Bad uta u briew u la nguh la ka khlieh, bad u la mane ïa U Trai. 27Bad u la ong, “To long ba la kyrkhu ïa U Trai uba U Blei u Abraham u kynrad jong nga, u bym shym la shim noh khoit ïa la ka jingleh isynei bad ïa la ka jingneh shisha na u kynrad jong nga: mynba nga dang long keiñ ha ka lynti, U Trai u la ïalam ïa nga sha ka ïing ki hynmen hynbew u kynrad jong nga.”

28Bad kata ka samla ka la phet, bad ka la ïathuh ha ka ïing ka kmie jong ka ïa kine kiei kiei ruh katba long. 29Bad ka Rebekka ka la don u hynmen, bad ka kyrteng jong u ka la long “u Laban”: bad u Laban u la phet shabar sha uta u briew, haduh ka pukri. 30Ka la jia ruh, ynda u la ïohi ïa kata ka nod ksiar khmut, bad ïa kita ki khadu ha ki ryndang kti ka para jong u, bad ynda u la ïohsngew ïa ki ktien ka Rebekka ka para jong u, ba ka da ong, “Kumne u la kren uta u briew ha nga”; ba u ruh u la leit jang jang sha uta u briew; bad ha khmih, u dang ïeng bad kita ki ut hajan kata ka pukri. 31Bad u la ong, “To ale wan shapoh ïing, me uba la kyrkhu jong U Trai; balei me ïeng shabar? namar nga la lah pynkhreh ïa ka ïing, bad ïa ka jaka ruh ïa kita ki ut.” 32Te uta u briew u la leit shapoh ka ïing: bad u Laban u la phah law panpoh ïa kita ki ut jong u, bad u la ai ruh ïa ka skum phlang bad ïa ka jingbam stait ha kita ki ut, bad ïa ka um ban sait ïa ki sla'jat jong u, bad ïa ki sla'jat jong kita ki briew kiba don lem bad u. 33Bad u la buh ei ei ruh ha khmat jong u ban bam: te uta u briew u la ong, “Ngan ym bam keiñ, tad ynda nga la ïathuh ïa ki ktien ba nga donkam ban kren.” U te u la ong, “To da ïathuh noh.”

34Te u la ong, “Nga long u shakri jong u Abraham. 35Bad U Trai u la kyrkhu shibun eh ïa u kynrad jong nga, bad u la man bakhraw: bad u la ai ha u ïa ki kynhun langbrot, bad ïa ki kynhun masi bad ïa ka rupa, bad ïa ka ksiar, bad ïa ki shakri shynrang, bad ki shakri kynthei, bad ïa ki ut, bad ïa ki kadda ruh. 36Bad ka Sara ruh ka tnga u kynrad jong nga ka la kha ïa u khun ïa u kynrad jong nga ynda ka la lah tymmen: bad u la ai duh ha u ïa kiei kiei baroh katba u don. 37Bad u kynrad jong nga u la pynsmai ïa nga, u da ong, ‘Men ym shim ka tnga ïa u khun jong nga na ki khun kynthei ki kynja Kanaan, kiba ha ka khyndew jong kiba nga shong sah: 38hynrei, men leit sha ka ïing u kpa jong nga, bad sha ki kur jong nga bad men shim ka tnga ïa u khun jong nga.’ 39Te nga la ong ha u kynrad jong nga, ‘Lehse kata ka briew kan ym wan bud ïa nga.’ 40Bad u la ong ha nga, ‘U Trai, uba ha khmat jong U nga ïaid, un phah ïa la u angel lem bad me, bad un pynpoi bha ïa ka lynti jong me; bad men shim ka tnga ïa u khun jong nga na ki ba-ha-ïing jong nga hi, bad na ka ïing u kpa jong nga: 41ynda kumta, men long ba lait khuid na ka jingsmai jong nga haba me leit poi sha kiba na ïing jong nga; te lada kim ai kawei ha me, me men lait khuid na ka jingsmai jong nga.’

42“Te nga la wan poi sha kane ka pukri mynta ka sngi, bad nga la ong, ‘A Trai uba U Blei u Abraham u kynrad jong nga, lada mynta me pynpoi bha ïa ka lynti ha kaba nga ïaid: 43ha khmih, nga ïeng mynta hajan kane ka pukri um; to shah ba kan jia, ba kata ka samla ka ban sa wan ïa ka ban tong um, bad ha kaba ngan sa ong, “To shah, nga kyrpad ïa pha, ba ngan dih khyndiat na u khiew um jong pha;” 44bad ba ka kan ïoh ong ha nga, “To ma me men dih, bad ïa ki ut jong me ruh ngan tong um:” to ai ba kata hi keiñ kan long ïa kaba U Trai u la thung shai ban long ka tnga ïa u khun u kynrad jong nga.’

45“Te haba ngam pat la dep ong ïa kane ha la ka dohnud, ha khmih, ka Rebekka ka wan mih noh bad la u khiew um ha ka tyrpeng jong ka; bad ka la leit hiar sha kata ka pukri, bad ka la tong um ruh: ynda kumta, nga la ong ha ka, ‘To ai ha nga ban dih, nga kyrpad ïa pha.’ 46Ka te ka la pynkloi, bad ka la pynhiar ïa la u khiew um na la ka tyrpeng, bad ka da ong artad, ‘To dih, bad ha ki ut jong me ruh ngan ai ban dih:’ kumta keiñ, nga la dih, bad ka la pyndih ïa ki ut ruh de. 47Bad nga la kylli ïa ka, nga da ong, ‘Pha long ka khun jongno?’ Ka ruh ka la ïathuh, ‘Ka khun u Bethuel, u khun u Nahor, ïa uba ka Milkah ka la kha ïa u’: ynda kumta, nga la buh ïa ka nod khmut ksiar ha ka shyllangmat jong ka, bad ïa ki khadu ha ki ryndang kti jong ka. 48Bad nga la nguh la ka khlieh, bad nga la mane ïa U Trai, bad nga la kyrkhu ïa U Trai uba U Blei u Abraham u kynrad jong nga, uba la ïalam ïa nga ha ka lynti kaba dei khnang ba ngan shim ïa ka khunruid u kynrad jong nga ïa u khun jong u. 49Te mynta lada phi don ka mon ban leh ïa ka jingsbun bad ka jingshisha ïa u kynrad jong nga, to ïathuh ha nga: bad lada phim mon, to ïathuh keiñ ha nga, ba ngan ïoh phai shawei sha ka kti kamon, lane sha kadiang.”

50Ynda kumta, u Laban bad u Bethuel ki la ïathuh, ki da ong, “Kane shisha ka mih na U Trai: ngim lah ban ong ei ei pat ma ngi ha me lane ka basniew lane ka babha. 51Ha khmih, ka Rebekka ka long ha khmat jong me, to shim ïa ka, bad to khie leit ruh, bad to ai ba kan long ka tnga ïa u khun u kynrad jong me, kumba la kren U Trai.”

52Te ynda u shakri jong u Abraham u la ïohsngew ïa kine ki ktien jong ki, u la nguh ngon ïa lade haduh ka khyndew ha khmat U Trai. 53Bad uta u shakri u la sei noh ïa ki jingdeng rupa, bad ïa ki jingdeng ksiar, bad ïa ki jaiñkup, bad u la ai ïa ki ha ka Rebekka: bad ïa kiei kiei kiba kordor u la ai ha u hynmen jong ka bad ha ka kmie jong ka. 54Bad ki la ïabam bad ki la ïadih: ma u bad kita ki briew kiba don ryngkat bad u; bad ki la ïasah baroh shi miet hangta; bad ki la ïakhie kum lashai mynstep, bad u la ong, “To phah noh ïa nga sha u kynrad jong nga.” 55Bad u hynmen jong ka Rebekka bad ka kmie jong ka ki la ïa-ong, “To shah ba kane ka samla kan sah lem bad ngi sa khyndiat sngi, haba kumno kumno ruh haduh shiphew sngi; hadien kata kan sa ïoh leit.” 56Hynrei, u la ïathuh ha ki, “Wat khang ïa nga mynta haba ïohi ba U Trai u la pynpoi bha ïa ka jingleit jong nga; to pyllait ïa nga keiñ ba ngan ïoh leit phai pat sha u kynrad jong nga.” 57Ki pat te ki la ïa-ong, “Ngin khot ïa kata ka samla, ba ngin ïakylli ïa ka hi.” 58Ynda kumta, ki la khot ïa ka Rebekka, bad ki la ïa-ong ha ka, “Pha mon ban leit noh bad une u briew?” Ka te ka la ïathuh, “Ngan leit noh keiñ.” 59Kumta, ki la ïapyllait noh ïa ka Rebekka ka para jong ki, bad ïa ka aïa jong ka, bad ïa u shakri u Abraham, bad ïa ki briew jong u. 60Bad ki la ïakyrkhu ïa ka Rebekka, bad ki la ong ha ka,

“Pha long ka para jong ngi,

to long ma pha ka kmie

ïa ki hajar hajar bynriew,

bad to ai ba u symbai jong pha

un ïoh bat ïa ka khyrdop

jong kita kiba shun ïa ki.”

61Ynda kumta, ka Rebekka ka la mih noh, bad ki shakri kynthei jong ka, bad ki la ïashong halor kita ki ut, bad ki la leit ïabud ïa uta u briew: kumta, uta u shakri u la shim ïa ka Rebekka, bad u la leit noh.

62Bad u Isaak u wan ïaid na ka lynti ka pukri Lahai-roi; naba u la shong ha ka ri shathie. 63Bad u Isaak u la leit ïaid kai shabar ïa ka ban pyrkhat ha ka lyngkha la janmiet: bad u la khmied ïa la ki khmat, bad u la ïohi ruh, bad ha khmih, kita ki ut ki ïawan. 64Bad ka Rebekka ruh ka la khmied ïa la ki khmat, bad haba ka la ïohi ïa u Isaak, ka la hiar noh na kata ka ut. 65Namar ka la lah kylli ha uta u shakri, “Hato uei une u briew uba wan ïaid kai ban ïashem bad ngi?” Bad uta u shakri ruh u la lah ong, “Une u long keiñ u kynrad jong nga:” bad ka la shim ïa ka jingkah, bad ka la pynkah ïa lade ruh. 66Bad uta u shakri u la ïathuh ha u Isaak ïa kiei kiei baroh ba u la lah leh. 67Ynda kumta, u Isaak u la ïalam ïa ka shapoh ka ïingtrep jong ka Sara ka kmie jong u, bad u la shim ïa ka Rebekka, bad ka la long ka tnga jong u; bad u la ieit eh ïa ka: bad ïa u Isaak la pynsngewtngen shaphang ka kmie jong u.

Currently Selected:

JENESIS 24: KHB

Highlight

Copy