GALATIA 6
6
To ïakit ïa ki jingkit paralok hi
1Ko parabangeit, wat lada lap ïa u briew ha kano kano ka jingpalat, ma phi kiba kynja mynsiem, to pynbha pat ïa uba kum uta ha ka mynsiem ka jingjemnud, da kaba khmih ïa lade, ïoh ba yn pynshoi ïa me ruh. 2To ïakit phi ïa ki jingkit paralok hi, te kumta phin ïa-pyndep ïa ka hukum U Khrist. 3Namar lada uno uno ruh u mut ba u long ei ei, pleng haba um long ei ei ruh em, u shukor ïa lade keiñ. 4Hynrei, to uwei pa uwei un tynjuh ïa la ka kam hi, te ynda kumta, un ïoh ïa ka jinglehkmen shaphang ïa lade hi, hynrei, ym shaphang uwei pat. 5Namar uwei pa uwei un kit ïa ka jingkit la ka jong hi.
6Te to ai ba uta uba shah hikai ha ka ktien, un ïasam lem bad uta uba hikai ha kiei kiei ki babha baroh. 7Wat shah ba yn shukor ïa phi; yn ym shukor ïa U Blei: namar ïa kaei kaei ruh ba u briew u bet, ïa kata hi un ïoh ot ruh. 8Naba uta uba bet ha ka doh jong u hi, na kata ka doh un ïoh ot ïa kaba pyut; hynrei, uta uba bet ha U Mynsiem, na uta U Mynsiem un ïoh ot ïa ka jingim bymjukut. 9Te ha kaba leh babha, wat ai ba ngin man thait shuh, namar ha ka Ïa babiang, ngin ïoh ot lada ngim da duh bor noh. 10Kumta te, katba ngi ïoh ka lad ba bit, to ngin ïatrei minot ïa ka babha ha ki briew baroh, hynrei, kham tam ha kita kiba na ka kur ka jingngeit.
Ki jingsneng khatduh bad ki jingkhublei
11 #
1 Kor. 16:21. Ha khmih, da ki dak bakhraw katno nga la thoh ha phi da ka kti ka jong nga hi. 12Kat kiba ïakwah ban paw bha habar ha ka doh, kita ki pynbor ban otsher ïa phi, khnang ba yn ym lehbeiñ ïa ki na ka bynta ka diengphna U Khrist. 13Namar wat kita hi ïa kiba la otsher, kim sumar ïa ka hukum; hynrei, ki ïakwah ba yn otsher ïa phi, khnang ba kin ïoh leh thaw burom ha ka doh jong phi. 14Hynrei, nga, da lei lei, ngan ym leh thaw burom, hynrei, tang ha kata ka diengphna U Jisu Khrist uba U Trai jong nga, da uba la sahnarphna ïa ka pyrthei ha nga bad ïa nga ha ka pyrthei. 15Namar ka jingotsher kam long ei ei ruh em, lymne ka jingbym-otsher, hynrei, tang ka jingthaw bathymmai keiñ. 16#Salm. 125:5.Te kat ki ban ïaid katba kum kane ka rukom, long ka jingsuk ha ki bad ka jingisynei, ha ki Israel jong U Blei keiñ.
17Naduh mynta, mano mano ruh wat pynjynjar ïa nga, namar nga bah ïa ki dak U Jisu ba la kynthah ha ka met jong nga.
18Ka jingaiei ka jong U Jisu Khrist uba U Trai jong ngi ai kan long lem bad ka mynsiem jong phi, ko parabangeit. Amen.
Currently Selected:
GALATIA 6: KHB
Highlight
Share
Copy
Want to have your highlights saved across all your devices? Sign up or sign in
The Bible Society of India
