GALATIA 4

1Te nga ong, ba uta u nongïoh pateng katba u dang khynnah, um ïapher ei ei ruh em na u mraw, la u long u trai kiei kiei baroh; 2hynrei, u long hapoh ki nongsumar bad ki sordar tad ynda kata ka Ïa ba la buh da u kpa. 3#Kol. 2:20.Kumta, ma ngi ruh, mynba ngi la long ki khynnah, ngi la ju long mraw hapoh ki jinghikai ka pyrthei; 4hynrei, haba la jia ka Ïa kaba biang U Blei u la phah ïa la U Khun, ïa uba la kha na ka briew, ïa uba la kha hapoh ka hukum, 5#Rom. 8:15-17.khnang ba un ïoh siewspah noh ïa kita kiba hapoh ka hukum, ba ngin ïoh pdiang ïa ka jingtingkhun. 6#Rom. 8:15.Te naba phi long ki khun, U Blei u la phah ïa U Mynsiem U Khun jong u ha ki dohnud jong ngi, u da kyang, “Abba, ko pa!” 7Ba kumta, phim long shuh u mraw hynrei, u khun keiñ; te lada u khun, u nongïoh pateng ruh da U Blei.

Ka jingsngewieit u Paul ïa ki nong Galatia

8Hynrei, mynkata, haba phim shym la ithuh ïa U Blei, phi la long mraw ïa kita kiba na la ka jinglong tynrai kim long ki blei. 9Hynrei, mynta, ba phi la ïoh ithuh ïa U Blei, hynrei, kham tam ba la ithuh ïa phi da U Blei keiñ, hato kumno ba phi phai dien pat sha ki jinghikai kiba tlot bad bymmyntoi, ha kiba phi ïakwah ban shong mraw pat sa shi sien? 10Phi ïasumar ïa ki sngi bad ki bnai bad ki Ïa bad ki snem! 11Nga sngewsheptieng shaphang jong phi, ïoh ba kumno re kumno nga la trei lehnohei shaphang jong phi.

12Nga kyrpad ïa phi, ko parabangeit, to long phi kum nga, naba nga long kum phi; phim shym leh sniew ei ei ïa nga. 13#Ki Kam. 16:6.Hynrei, phi tip ba namar ka jingtlot ha ka doh, nga la ïathuh ïa ka gospel ha phi ha ka banyngkong. 14Bad ïa ka jingtynjuh ïa phi ha ka doh jong nga phim shym la ibeiñ, lymne kyntait; hynrei, phi ïa-pdiang ïa nga kum u angel U Blei, kum U Khrist Jisu keiñ. 15Hangno te long kata ka jingsngewbha jong phi? namar nga phla ïa phi, ba, lada lah, phin da la khlaw noh ïa ki khmat jong phi, bad phin da la ai ïa ki ha nga. 16Hato kumta te nga la kylla long u nongshun jong phi, namar ba nga ïathuh ïa kaba shisha ha phi? 17Ki leh ieit eh ïa phi, hynrei, ym da ka jingmut ka babha; em, hynrei, ki ïakwah ban pynkhlad noh ïa phi, khnang ba phin leh ieit ïa ki. 18Hynrei, ka long ka babha ïa ka ban leh ieit ha kaei kaei ka babha ha la ka sngi, ym tang haba nga don ryngkat bad phi. 19#1 Kor. 4:15.Ko khun hep jong nga, ïa kiba nga suhkhun pat tad ynda yn pynlong ïa U Khrist ha phi, 20nga da kwah ban long ha khmat lem bad phi mynta, bad ban pynkylla ïa la ka rukom kren, naba nga artatien shaphang jong phi.

Ka nuksa na ka Hagar bad ka Sara

21To ïathuh ha nga, phi kiba kwah ban long hapoh ka hukum, hato phim ju ïohsngew ïa kata ka hukum? 22#Jen. 16:15; 21:2,9.Namar la thoh ba u Abraham u la don ar ngut ki khun shynrang, uwei na kata ka mraw, bad uwei na kata kaba laitluid. 23#Rom. 9:7-9.Hynrei, ïa uta uba na kata ka mraw la kha katba kum ka doh, hynrei, ïa uta uba na kata kaba laitluid da ka jingkular. 24Kine kiei kiei ki long ka pharshi: namar kine ki long ar tylli ki jutang; kawei na u lum Sinai, kaba kha khun sha ka jinglongmraw; kaba long ka Hagar keiñ. 25Namar kane ka Hagar ka long u lum Sinai ha Arabia, bad ka ïadei bad ka Jerusalem kaba mynta, namar ka shong mraw lem bad ki khun jong ka. 26Hynrei, kata ka Jerusalem kaba haneng ka long kaba laitluid, kaba long ka kmie jong ngi keiñ. 27#Isa. 54:1.Namar la thoh:

“To leh kmen, pha kaba lyngki

ka bym ju ïoh khun,

to da kyang

bad to da kyang jam eh,

pha ka bym ju kha khun;

naba ki khun kata

kaba weibriew

ki kham bun ban ïa ki jong kata

kaba don tnga.”

28Mynta ngi ruh, ko parabangeit, kumba la long u Isaak, ngi long ki khun ka jingkular. 29#Jen. 21:9.Hynrei, kumba mynkata, uta uba la kha katba kum ka doh, u la lehbeiñ ïa uta uba katba kum U Mynsiem, kumta hi ka long mynta ruh. 30#Jen. 21:10-12.Hynrei, Ka Jingthoh ka ong aïu? “To shop noh shabar ïa kata ka mraw bad ïa u khun jong ka, namar uta u khun kata ka mraw un ym ïoh bynta lem bad u khun jong kata kaba laitluid.” 31Kumta te, ko parabangeit, ngim long ki khun kata ka mraw, hynrei, ki jong kata kaba laitluid.

Currently Selected:

GALATIA 4: KHB

Highlight

Copy