KI KAM 5

U Ananias bad ka Saphira

1Hynrei, uwei u briew uba kyrteng “u Ananias”, lem bad ka Saphira ka tnga jong u, u la die ïa ka bri, 2bad u la buhrieh ïa lade shi bynta na ka jong ka dor, ka tnga jong u ruh ka la ïabuit lem ïa kata; te u la wallam tang shi bynta, bad u la buh ïa ka ha kjat ki apostol. 3Hynrei, u Petros u la ong, “Ko Ananias, hato balei ba u Soitan u la pyndap ïa ka dohnud jong me, ïa ka ban shukor ïa U Mynsiem Bakhuid, bad ban buhrieh noh shi bynta na ka dor kata ka bri? 4Katba ka dang sah, kam shym la long ka jong me hi? bad ynda la die noh ruh ïa ka, kam shym la don ha ka bor jong me hi? hato balei ba me la pun ïa kane ha ka dohnud jong me? mem shym la shukor ïa ki briew, hynrei, ïa U Blei.” 5Te haba u Ananias u la ïohsngew ïa kine ki ktien, u la kyllon khram, bad u la dkut mynsiem. Ka jingsheptieng bakhraw te ka la hap ha kita baroh kiba la ïohsngew ïa kata. 6Te ki samla ki la ïeng joit, bad ki la ïasop spaiñ ïa u, bad haba ki la ïabah noh shabar, ki la tep ïa u.

7Ynda la dap kumba shi por, ka tnga jong u, haba kam pat tip ïa kaba la lah jia, ka la wan rung. 8Te u Petros u la ong ha ka, “To ïathuh ha nga, tang katta phi la ïadie noh ïa kata ka bri?” Ka la ïathuh te, “Ho-oid, tang katta keiñ.” 9Hynrei, u Petros u la ong ha ka, “Hato balei ba phi la ïakut lem ban tynjuh ïa U Mynsiem U Trai? Ha khmih, ki kjat jong kita kiba la ïatep ïa u tnga jong pha, ki ha kato ka jingkhang, te kin ïabah noh shabar ïa pha ruh.” 10Te shisyndon ka la kyllon ha ki kjat jong u, bad ka la dkut mynsiem. Te haba kita ki samla ki la rung, ki la shem ba ka la lah ïap; bad haba ki la ïabah noh shabar ïa ka, ki la ïatep ïa ka ha syndah u tnga jong ka. 11Ka jingsheptieng bakhraw te ka la ngat ha kata ka balang baroh kawei, bad ha baroh kiba la ïohsngew ïa kine kiei kiei.

Ki kambah bad ki jingphylla

12Bad la leh bun ki dak khyllah bad ki jingphylla hapdeng uta u paidbah da ki kti kita ki apostol; baroh ruh ki la ïalong da kawei ka jingmut ha kata ka baranda u Solomon. 13Hynrei, na kita kiwei pat, ym don ba nud ban ïalok bad ki, pynban, uta u paidlang u pynkhraw ïa ki. 14Te ïa kiba ngeit la nang pynïasoh kham bun kham bun ha U Trai, ki paidbah shynrang bad kynthei, 15kat ban bah shabar ïa ki bapang khrew ha ki lynti shnong, bad ban buh ïa ki ha ki palong bad ha ki khalti, ba ynda u Petros u wan ïaid, kan shu ïoh kah wat tang ka syrngiew jong u halor kiba na ki. 16Te u paidbah na ki shnong baroh sawdong, u la ïawan lang sha Jerusalem, ki ïawallam ïa ki bapang khrew bad ïa kiba la shitom eh da ki mynsiem bymkhuid, bad la pynkhiah ïa ki baroh.

La pynshitombeiñ ïa ki Apostol

17Te haba uta u rangbah lyngdoh u la ïeng joit, bad kita baroh kiba ïadon lem bad u, kiba long ka jaid niam ki Saddusi, la pyndap ïa ki da ka jingïa-ing; 18bad ki la kem ïa ki apostol, bad ki la set ïa ki ha ka ïing byndi. 19Hynrei, mynmiet, u angel U Trai u la plie wang ïa ki jingkhang kata ka ïing byndi, bad haba u la ïalam noh ïa ki shabar, u la ong, 20“To khie leit phi, da ïeng bad ïalap ruh ha ka templ ha u paidlang ïa ki ktien baroh jong kane Ka Jingim.” 21Te haba ki la ïohsngew ïa kata, ki la ïarung shapoh ka templ la dang shu shai phar, bad ki la hikai. Hynrei, haba uta u rangbah lyngdoh u la wan, bad kita kiba bad u, ki la ïakhot lang ïa ka dorbar, bad ïa ki tymmen basan baroh jong ki khun Israel, bad ki la ïaphah sha ïing byndi ban wallam noh ïa ki. 22Hynrei, kita ki shakri kiba la wan, kim shem ïa ki ha ka ïing byndi: bad haba ki la leit phai, ki la ïathuh, 23ki da ong, “Ïa kata ka ïing byndi, shisha ngi la shem ba la khang skhem, bad ki nongap ki ïeng ha ki jingkhang, hynrei, haba ngi la lah plie, ngim shym shem ïano ïano ruh hapoh.” 24Te haba u rangbah ka templ, bad kita ki rangbah lyngdoh ki la ïohsngew ïa kine ki ktien, ki la sngewlyngngoh lyngngaiñ shaphang jong ki, aïu kane ka long. 25Te la wan uwei, bad u la ïathuh ha ki, “Ha khmih, kita ki briew ïa kiba phi la set ha ka ïing byndi, ki don ha ka templ, ki da ïeng, bad ki da hikai ïa u paidlang.” 26Ynda kumta, haba uta u rangbah u la leit lem bad kita ki shakri, u la ïalam noh ïa ki, ym da ka bor, naba ki la sheptieng ïa uta u paidbah, ïoh ba yn lynthem maw ïa ki.

27Te haba ki la wallam ïa ki, ki la pynïeng ïa ki ha khmat ka dorbar, bad uta u rangbah lyngdoh u la kylli ïa ki, 28#Mat. 27:25.u da ong, “Ngi la hukum skhem ïa phi ban ym hikai ha kane ka kyrteng, te ha khmih, phi la pyndap ïa ka Jerusalem da ka jinghikai jong phi, bad phi ïathmu ban pynkit ha ngi ïa ka snam jong une u briew.” 29Te u Petros bad ki apostol, ki la ïathuh bad ki la ïa-ong, “Ngi dei ban kohnguh ïa U Blei kham tam ban ïa ki briew. 30#Deu. 21:22-23.U Blei ki kpa jong ngi u la pynmih pat ïa U Jisu, ïa uba phi la pynïap da kaba sdien ïa u ha u dieng. 31Ïa une, U Blei u la kyntiew sha ka kti kamon jong u, ban long U Syiem bad U Nongpynim, ïa ka ban ai ka jingkylla-ka-bamut ha u Israel, bad ka jingmap ki pop. 32Ngi te ngi long ki sakhi ïa kine kiei kiei ruh; kumjuh ruh U Mynsiem Bakhuid, ïa uba U Blei u la ai ha kita kiba kohnguh ïa u.”

33Hynrei, haba ki la ïohsngew ïa kane, ki la bitar eh lep, bad ki la thmu ban pynïap noh ïa ki. 34Hynrei, haba la ïeng joit uwei ha kata ka dorbar, u Pharisi, uba kyrteng “u Gamaliel”, u nonghikai ka hukum, uba la donburom na u paidbah baroh, u la hukum ban pynmih habar shiphang ïa kita ki briew. 35Bad u la ong ha ki, “Ko phi ki rangbah Israel, to sumar ïa lade shaphang kine ki briew, aïu ba phin leh. 36Namar mynshuwa kine ki sngi, la mih u Theudas, u da kren sarong ïa lade ba u long ma u uwei; ha u, la ïasoh lang kumba sawspah ki rangbah, ïa uba la pynïap noh; bad ïa kita baroh kat kiba la kohnguh ïa u, la pynsakma noh, bad kim shym long ei ei ruh. 37Hadien une, la mih u Judas uba na Galilaïa, ha kita ki sngi jong ka jingkheiñ ïa ka hima, bad u la ring noh ïa u paidbah hadien jong u; u ruh u la ïap noh, bad ïa kita baroh kat kiba la kohnguh ïa u, la pynsakma noh. 38Te mynta nga ong ha phi, To kynran noh na kine ki briew, to iehnoh noh ïa ki; naba lada kane ka jingsylla, lane kane ka jingleh, ka long na ki briew, kan dam noh; 39hynrei, lada ka long na U Blei, phim lah ban pyndam noh ïa ki; ïoh ba yn shem ïa phi pynban, ki nongïaleh ïa U Blei.” 40Bad ki la ïakohnguh ha u; te haba ki la lah khot ha ki ïa ki apostol, ki la sympat ïa ki, bad ki la adong ïa ki ban ïalap ha ka kyrteng jong U Jisu, bad ki la pyllait noh ïa ki. 41Ki te, ki la ïamih noh na khmat kata ka dorbar, ki da ïakmen namar ba la ñiew ïa ki, kiba bit ban shah jahburom na ka bynta kata ka Kyrteng. 42Ha la ka sngi ruh, ha ka templ, bad ha la ïing, kim wai noh ban hikai, bad ban ïathuhkhana ïa#5:42 ïa: Hangne kane ka kyntien ka kit ïa ka jingmut shaphang. U Jisu ba u long U Khrist.

Currently Selected:

KI KAM 5: KHB

Highlight

Copy