KI KAM 4

U Petros bad u Ïoannis ha khmat ka dorbar

1Te haba ki dang kren ha uta u paidlang, ki lyngdoh, bad u rangbah ka templ, bad ki Saddusi, ki la wan kyndit ha ki, 2ba ki da sngewsih sat namar ba ki hikai ïa u paidlang, bad ba ki ïalap da U Jisu ïa ka jingmihpat na ki baïap. 3Te ki la kem ïa ki, bad ki la set byndi ïa ki haduh lashai, namar ka la long la janmiet lypa. 4Hynrei, bun na kita kiba la lah ïohsngew ïa kata ka ktien, ki la ngeit, bad ka jingkheiñ ïa ki rangbah ka la long kumba san hajar.

5Ka la jia te ynda kum lashai, ba ki nongsynshar jong ki, bad ki tymmen basan, bad ki nongthoh de, ki la ïalum lang ha Jerusalem, 6bad u Annas u rangbah lyngdoh, bad u Kaïaphas, bad u Ïoannis, bad u Aleksander, bad kat kiba la long na ka jaid rangbah lyngdoh. 7Te haba ki la pynïeng ïa ki hapdeng, ki la kylli, “Da ka bor aïu, lane da ka kyrteng aïu, phi la leh ïa kane?” 8Ynda kumta, u Petros, uba la dap da U Mynsiem Bakhuid, u la ong ha ki, “Ko phi ki nongsynshar jong u paidlang, bad ki tymmen basan, 9lada yn kylli ïit ïa ngi ha kane ka sngi shaphang kata ka kam babha ïa uta u briew u ba-dkoh, kumno ba la pynkhiah ïa u, 10to tip phi baroh, bad u paidlang Israel baroh, ba da ka kyrteng U Jisu Khrist uba na Nasaret, ïa uba la sahnarphna ma phi, ïa uba U Blei u la pynmih pat na ki baïap, da uta keiñ, une u ïeng hangne ha khmat jong phi uba la khiah khran. 11#Salm. 118:22.Une u long uta u maw ïa uba la kyntait beiñ noh da phi ki nongtei, ïa uba la pynlong ha khlieh ka dong. 12Bad ym don ka jingpynim hano hano ha uwei pat: naba ym don kawei pat ka kyrteng hapoh ka bneng, ïa kaba la ai hapdeng ki briew, da kaba ka dei ba yn pynim ïa ngi.”

13Te haba ki la khmih thuh ïa kata ka jingshlur jong u Petros bad u Ïoannis, bad ki la sngewthuh ruh ba ki long ki briew kiba khlem jinghikai bad kiba bieit, ki la ïasngewphylla; hynrei, ki la ithuh ïa ki, ba ki la ju don lem bad U Jisu. 14Haba ki da ïohi te ïa uta u briew ïa uba la pynkhiah, ba u da ïeng lem bad ki, kim don ei ei ruh em ban ïasaid kylliang. 15Hynrei, haba ki la hukum ïa ki ban kynriah noh shabar ka dorbar, ki la ïasylla paralok hi, 16ki da ong, “Aïu ngin leh ïa kine ki briew? namar shisha ba ïa ka dak khyllah ba-donnam la leh da ki, ka la paw shai ha baroh kiba shong ha Jerusalem; bad ïa kata ngim lah ban len. 17Hynrei, ba kan ym phriang shuh hapdeng u paidbah, to ngin ïabyrngem ïa ki, ba naduh mynta kin ym kren shuh hano hano ruh ha kane ka kyrteng.” 18Kumta, haba ki la khot ïa ki, ki la hukum ïa ki ban ym kren satia lymne hikai ha ka kyrteng U Jisu. 19Hynrei, u Petros bad u Ïoannis ki la ïathuh bad ki la ong ha ki, “La ka shong hok ha khmat U Blei ban sngap ïa phi kham tam ban ïa U Blei, to khan ma phi: 20namar ngi ngim lah ban ym kren ïa kiei kiei ruh, ïa kiba ngi la ïohi bad ngi la ïohsngew.” 21Kumta, ki, haba ki la nang byrngem shuh ïa ki, ki la pyllait noh ïa ki; ba kim shem lad ban pynshitom ïa ki, namar uta u paidlang, naba ki briew baroh ki la ïa-pyndonburom ïa U Blei na ka bynta kata kaba la leh. 22Namar uta u briew u la palat sawphew snem ka rta, ha uba la leh ïa kane ka dak khyllah jong ka jingkhiah khran.

Ka Balang ka duwai dem diap

23Te haba la pyllait noh ïa ki, ki la wan sha la ki lok, bad ki la ïathuh baroh ïa kaba ki rangbah lyngdoh bad ki tymmen basan ki la ong ha ki. 24#Eks. 20:11; Salm. 146:6.Ki te haba ki la ïohsngew ïa kata, ki la ïa-pynjam ïa la ka ktien ha U Blei da kawei ka jingmut, bad ki la ïa-ong, “A Trai Kynrad, me U Blei uba la thaw ïa ka bneng, bad ïa ka khyndew, bad ïa ka duriaw, bad ïa baroh kat kiba don ha ki, 25#Salm. 2:1,2.uba da U Mynsiem Bakhuid, da ka shyntur u Dabid u kpa jong ngi u shakri jong me, me la ong:

“ ‘Balei ba ki Jentil

ki la ïabitar lep,

bad ba ki paidbah

ki la ïapyrkhat

ïa kiei kiei kiba thala?

26Ki syiem ka pyrthei

ki la ïaïeng ïaleh,

bad ki nongsynshar

ki la ïalum lang

pyrshah ïa U Trai,

bad pyrshah ïa U Khrist jong u.’

27 # Salm. 2:1-2; Luk. 23:7-11; Mat. 27:1,2; Mrk. 15:1; Luk. 23:1; Ïoan. 18:28,29. “Namar da shisha ha kane ka shnong, u Herod bad u Pontios Pilat, lem bad ki Jentil bad ki paidbah Israel, ki la ïalum lang ïa ka ban ïaleh ïa U Jisu U Khun u bakhuid jong me, ïa uba me la pynsleh, 28ïa ka ban leh ïa kiei kiei ruh katba ka kti jong me bad ka jingpyrkhat jong me, ki la lah thmu lypa ba kin jia. 29Te mynta, A Trai, to khmih ha ki jingbyrngem jong ki, to ai ruh ha ki shakri jong me ban kren ïa ka ktien jong me da ka jingsngewshlur suda, 30da kaba me kner noh ïa la ka kti ban pynkhiah; bad ba yn ïoh leh ïa ki dak khyllah bad ki jingphylla da ka kyrteng U Khun Bakhuid jong me U Jisu.” 31Ynda ki la lah duwai te, la pynkhynñiuh ïa kata ka jaka ha kaba ki la ïaseng, bad la pyndap ïa ki baroh da U Mynsiem Bakhuid, bad ki la kren ïa ka ktien U Blei da ka jingsngewshlur.

Kiei kiei baroh ki long kiba ïadei lang

32 # Ki Kam. 2:44,45. Te u paidbah jong kita kiba la ngeit, u la long da kawei ka dohnud bad kawei ka mynsiem; bad uwei ruh um ong shuh ba ka long ka jong u hi kaei kaei ruh na kita kiei kiei kiba u don; hynrei, kiei kiei baroh ki long kiba ïadei lang. 33Bad da ka borbah, ki apostol ki la phla ïa ka jingmihpat jong U Trai Jisu: te ka jingaiei bakhraw ka la long ha ki baroh. 34#Mat. 19:21; Mrk. 10:21; Luk. 12:33; 18:22.Naba ym don uwei ruh u bakyrduh hapdeng jong ki; naba kat kiba la long ki trai ki bri lane ki ïing, ki la die noh bad ki la wallam ïa ki dor jong kita kiei kiei ba la lah die, 35bad ki la buh ïa ki ha kjat ki apostol; bad la sam ïa ki ha uwei pa uwei katba uno uno ruh u donkam. 36Kumta, u Joseph, ïa uba la sin “Barnabas” da ki apostol (kaba haba la batai, ka long, “U Khun ka jingpyntngen”), u jaid Lebi, u kynja Kypros, 37ba u don ka bri, u la die noh ïa ka, bad u la wallam ïa ki sbai, bad u la buh ïa ki ha kjat ki apostol.

Currently Selected:

KI KAM 4: KHB

Highlight

Copy