KI KAM 2

Ka jingwan hiar U Mynsiem Bakhuid

1 # Leb. 23:15-21; Deu. 16:9-11. Te ynda la poi ka sngi Pentekost, ki baroh ki la ïadon lang ha kawei ka jaka. 2Te kyndit kyndit la wan ka jingsawa na bneng kum ka lyer bah ba beh kyrthep, bad ka la pyndap ïa ka ïing baroh kawei ha kaba ki la ïashong. 3Bad la paw ha ki, ki thylliej kiba pait pnat, kum ka ding; te ka la shong halor uwei pa uwei na ki. 4Bad la pyndap ïa ki baroh da U Mynsiem Bakhuid, bad ki la ïasdang ban kren ha kiwei pat ki thylliej, kat kumba U Mynsiem u la ai bor ïa ki ban kren.

5Te la don ki Jiw kiba shong basa ha Jerusalem, ki briew ki bariewblei na ki jaid bynriew baroh kiba napoh ka bneng. 6Te haba la ïohsngew ïa kane ka jingsawa, u paidbah u la ïawan lang bad u la sngewlyngngoh, naba u briew baroh u la ïohsngew ba ki kren ha ka ktien jong u hi. 7Baroh te ki la kyndit thred, bad ki la sngewphylla, ki da ïa-ong, “Ha khmih kine baroh kiba kren kim long ki nong Galilaïa? 8Kumno te ngi, ngi ïohsngew, u briew baroh ha la ka jong ka jong ka ktien ha kaba la kha ïa ngi? 9Ki Parthia, bad ki Mid, bad ki Elam, bad kiba shong ha Mesopotamia, ha Judia, bad ha Kappadokia, ha Pontos, bad ha Asia, 10ha Phrygia, bad ha Pamphilia, ha Ijipt, bad ha ki phang ka Libya kaba hajan Kyrini, ki nongshong basa kiba na Rom, ki Jiw bad kiba la kylla niam ruh, 11ki Krit, bad ki Arab, ngi ïaïohsngew ba ki da ïakren ha ki thylliej jong ngi hi, ïa ki kam baphylla jong U Blei!” 12Baroh te ki la kyndit thred, bad ki la ïasngewlyngngoh lyngngaiñ, ki ïa-ong paralok hi, “Ka mut aïu kane?” 13Hynrei, kiwei da kaba beiñ ki la ong, “Ki la kdang Waiñ thymmai.”

Ka jingïalap u Petros ha ka Pentekost

14Hynrei, haba u Petros u la ïeng lem bad ki khatwei ngut, u la pynjam la ka ktien, bad u la ïathuh ha ki: “Ko phi ki rangbah Judia, bad phi baroh kiba shong ha Jerusalem, to phin tip ïa kane, bad to shahshkor ïa ki ktien jong nga: 15naba kine, kim buaid kumba tharai ma phi, namar ka dang shi por ka sngi. 16Hynrei, kane ka long kata ba la ong da u Joel u nongïathuhlypa:

17 # Jol. 2:28-32. “ ‘Kan jia ruh ha ki sngi

ki bakhatduh,’

ong U Blei,

‘ba ngan theh noh

na U Mynsiem jong nga

halor ka doh baroh;

te ki khun shynrang jong phi

bad ki khun kynthei jong phi

kin ïathuhlypa,

bad ki samla jong phi

kin ïohi ïa ki jingithuhpaw,

bad ki tymmen jong phi ruh

kin phohsniew

ki jingphohsniew:

18bad halor ki shakri

jong nga ruh

shynrang bad kynthei

ha kita ki sngi ngan theh noh

na U Mynsiem jong nga,

bad kin ïathuhlypa.

19Bad ngan pyni

ïa ki jingphylla ha bneng

sha jrong,

bad ïa ki dak ha ka khyndew

sha tbian,

ka snam, bad ka ding,

bad u lyoh tdem;

20ïa ka sngi yn pynkylla dum,

bad ïa u bnai

yn pynkylla snam,

mynshuwa ban wan

kata ka sngi ka jong U Trai

kaba khraw bad ba-itriem.

21Bad kan jia

ba uno uno baroh

u ban khot kyrpad

ïa ka kyrteng U Trai,

yn pynim ïa u.’

22“Ko ki rangbah Israel, to sngew ïa kine ki ktien: ïa U Jisu uba na Nasaret, u briew ba U Blei u la pynithuh shynna ha phi da ki kambah, bad da ki jingphylla, bad da ki dak khyllah de, kiba U Blei u la leh da u hapdeng jong phi, kumba phi hi ruh phi tip, 23#Mat. 27:35; Mrk. 15:24; Luk. 23:33; Ïoan. 19:18.ïa une, ba la aiti noh da ka jingthmu ba la buh, bad da ka jingtip lypa U Blei; ma phi da ki kti pop phi la sahnarphna, phi la pynïap ruh; 24#Mat. 28:5,6; Mrk. 16:6; Luk. 24:5.ïa uba U Blei u la pynmih pat, da kaba u la law noh ïa ki jingkhum ka jingïap; namar kam lah long ban bat ma ka, ïa u. 25#Salm. 16:8-11.Namar u Dabid u ong shaphang jong u,

“ ‘Nga la ïohi ïa U Trai

ha khmat jong nga

khlem da pud,

naba u long sha kamon

jong nga,

ba yn ym pynkhih ïa nga:

26namar kata, ka dohnud

jong nga

ka la sngewkmen,

bad u thylliej jong nga

u la kmen;

bad ka doh jong nga

ruh putet

kan shong ha ka jingkyrmen:

27namar men ym iehnoh

ïa ka mynsiem jong nga

ha Hades,

lymne men ym shah

ïa U Bakhuid jong me

ban shem ïa kaba pyut.

28Me la pyntip ïa nga

ïa ki lynti ka jingim;

men pyndap ïa nga

da ka jingkmen

ha khmat jong me.’

29“Ko para, nga lah ban ong shynna ha phi shaphang u Dabid u kthaw tymmen, ba u la ïap noh bad ba la tep ruh ïa u, bad ka jingtep jong u, ka don bad ngi haduh kane ka sngi. 30#Salm. 89:3,4; 132:11.Namar kata, ba u long u nongïathuhlypa, bad ba u tip ba U Blei u la lah kular da ka jingsmai ha u, ba na u soh ka syngkai jong u, un pynmih ïa uwei u ban shong ha ka khet jong u; 31#Salm. 16:10.haba u la ïohi lypa, u kren shaphang kata ka jingmihpat U Khrist, ba ym shym la iehnoh ïa ka mynsiem jong U ha Hades, ka doh jong U ruh kam shym shem ïa kaba pyut. 32Ïa une U Jisu keiñ, U Blei u la pynmih pat; shaphang kata, ma ngi baroh ngi long ki nongphla. 33Namar kata, haba la kyntiew ïa u da ka kti kamon U Blei, bad haba u la ïoh diang na U Kpa ïa ka jingkular ïa U Mynsiem Bakhuid, u la theh noh ïa kane, ïa kaba phi mynta phi ïohi bad phi ïohsngew. 34#Salm. 110:1.Namar u Dabid um shym la kiew sha ki bneng; hynrei u ong hi,

“ ‘U Trai u la ong ha U Trai

jong nga:

“To shong sha ka kti kamon

jong nga,

35tad ynda ngan pynlong

ïa kiba shun ïa me,

ka jingïuh kjat jong me.” ’

36“To ka ïing Israel baroh kawei, namar kata, kan tip skhem, ba U Blei u la pynlong U Trai bad U Khrist ïa une ujuh U Jisu, ïa uba la sahnarphna ma phi.”

37Te haba ki la ïohsngew ïa kane, la dung ngak ïa ki ha la ka dohnud, bad ki la ong ha u Petros, bad ha kita kiwei ki apostol, “A para, kumno ngin leh?” 38Te u Petros u la ïathuh ha ki, “To phin kylla-ka-bamut, bad yn pynbaptis ïa phi uwei pa uwei ha ka kyrteng U Jisu Khrist, ïa ka ban ïohmap ki pop; bad phin ïoh diang ïa ka jingai U Mynsiem Bakhuid. 39#Isa. 57:19; Jol. 2:32.Namar ka jingkular ka long ïa phi, bad ïa ki khun jong phi, bad ïa baroh kiba sha jngai, kat kiba U Trai uba U Blei jong ngi un khot ha u.” 40Da ki shibun kiwei pat ki ktien u la pyni, bad u la kyntu ïa ki, u da ong, “To pynim ïa lade na kane ka pateng bynriew bakynriang.” 41Namar kata, ïa kita kiba la pdiang ïa ka ktien jong u, la pynbaptis; kumta la pynïasoh ha kata ka sngi sha ka balang kumba lai hajar ki mynsiem. 42Bad ki la ïaineh skhem ha ka jinghikai jong ki apostol, bad ha ka jingïasyllok, bad ha kaba kdiah kpu, bad ha ki jingduwai de.

Ka rukom im hapdeng ki parabangeit

43Te ka jingsheptieng ka la jia ha ki mynsiem baroh, bad bun ki jingphylla bad ki dak khyllah la leh da ki apostol. 44#Ki Kam. 4:32-35.Te baroh kiba la ngeit ki la ïalong hajuh, bad ïa kiei kiei baroh ki la ïaleh lang; 45#Mat. 19:21; Mrk. 10:21; Luk. 12:33; 18:22.bad ki la ïadie noh ïa la ki bri, ïa la ki ïing, bad ïa la ki mar, bad ki la ïasam ïa ki ha baroh, kat ha kiba donkam. 46Ha la ka sngi ruh ki da ïaineh skhem ha kawei ka jingmut ha ka templ; bad haba ki da kdiah kpu ha ka ïing ka ïing, ki la ïabam da ka jingkmen bad da ka jingsngewbeit ka dohnud, 47ki da ïaroh ïa U Blei, bad ki da shem ka jingsngewbha na ki briew baroh. Bad U Trai ruh u la nang pynïasoh ha ki ha la ka sngi ïa kita kiba la lait im.

Currently Selected:

KI KAM 2: KHB

Highlight

Copy