2 PETROS 2

Ki nonghikai balamler

1 # Jud. 1:4-16. Hynrei, ki la don ki nongïathuhlypa balamler ruh hapdeng uta u paidlang, kumba hapdeng jong phi ruh kin long ki nonghikai balamler, ki ban wallam tuh hapoh ïa ki jinghikai bakla bapynjot noh, bad haba ki len noh ïa uta U Kynrad uba la siewspah ïa ki, ki da pynwan kumta ha lade hi ïa ka jingpynjot kaba stet thir thir. 2Te shibun kin ïabud noh ïa kita ki jingleh kyr-eit jong ki, kiba na ka bynta jong ki yn krenbeiñ eh ïa ka lynti ka jingshisha. 3Bad ha ka jingkwah lalot kin ïakhaïi ïa phi da ki ktien bathawnang: ïa kiba kata ka jingpynrem na mynslem kam pyntud, bad kata ka jingpynjot noh jong ki kam samthiah.

4Namar lada U Blei um shym la riej ïa ki angel mynba ki la leh pop, hynrei, haba la shop arsut ïa ki sha dujok, u la aiti noh ïa ki ha ki krem ka jingdum tliw tliw, ba la ri noh ïa ki, ïa ka jingbishar; 5#Jen. 6:1—7:24.bad lada um shym la riej ïa ka pyrthei ba-mynbarim, hynrei, ïa u Noah, u nongïalap ïa ka hok, lem bad hynñiew ngut kiwei pat u la ri kyndong, mynba u la pynwan ïa ka jingshlei ha kata ka pyrthei ki bymriewblei; 6#Jen. 19:24.bad haba la pynlong dpei ïa ki nongbah ka Sodom bad Gomorra, u la pynrem ïa ki da ka jingpynkyllon khram, u da buh ïa ki ban long ka rukom maham ïa kita ki ban im bymriewblei; 7#Jen. 19:1-16,29.te u la knieh kynthet noh ïa u Lot bahok, ïa uba la pynsngew satia noh da kata ka jinglong kyr-eit jong kita ki bymman 8(namar uta u bahok ha kaba ïohi bad ha kaba ïohsngew, haba u shong sah hapdeng jong ki, man la ka sngi u la ju pynkordit ïa la ka mynsiem bahok da ki jingleh babeiñ hukum jong ki): 9U Trai u nang ban knieh kynthet noh ïa kiba riewblei na ka jingpynshoi, bad ban rakhe#2:9 rakhe: Ka jingmut hangne ka ïajan bad ka kyntien ri noh kumba long ha ka dkhot 4. ïa ki bymhok ïa ka sngi ka jingbishar ban pynshitom ïa ki. 10Hynrei, kham tam ïa kita kiba beh brai ïa ka doh ha ka jingkwah brai ka jingpynbit-tngit, bad ïa kiba ñiewbeiñ ïa ka jingsynshar:

Kiba shlan eh, kiba leh hangamei, kim sngewkyiuh haba ki ïakrenbeiñ ïa ki bakhraw batri: 11ha kaba ki angel, la ki long kiba kham khraw ha ka jingkhlaiñ bad ka bor, kim ïatian ïa ka jingbishar bakrenbeiñ ïa kita ha khmat U Trai. 12Hynrei, kine, kum ki mrad bakhlem jingmut, ba la kha kynja mrad ïa ki, ïa ka ban kem bad ban pynïap noh ïa ki, haba ki krenbeiñ shaphang kita kiei kiei ïa kiba kim sngewthuh, yn pynjot noh khoit ïa ki ha kata ka jingpynpyut plak jong ki hi; 13kin da ïoh ïa ka bainong ka jingleh bymhok, haba ki ïañiew kaba sngewbha eh ïa kata kaba im sarong awria ha kaba mynsngi, ki long ki jingthohbria bad ki jingkhlemrain, ki da ïa-im sarong awria ha kita ki jingïakhawai ïa-ieit jong ki hi, haba ki ïakhawai lem bad phi; 14kiba don ki khmat ba-dap da kaba klim, bad ki bym lah kyndiah na ka pop; ki da ïariam pah ïa ki mynsiem bymneh; kiba don ka dohnud ïa kaba la pynmlien ha ki jingikwah lalot; ki khun ka jingtim; 15#Jkñ. 22:4-35.kiba haba ki la iehnoh noh ïa ka lynti kaba beit, ki la leit sakma, da kaba bud noh ïa ka lynti u Balaam u khun u Beor, uba la ieit ïa ka bainong ka jingbymhok; 16#Jkñ. 22:21,23,28,30-31.hynrei, u la ïoh ka jingsneng namar ka jingpalat jong u hi: ka kadda ka bymnangkren, haba ka la kren da ka ktien briew, ka la khang ïa kata ka jingleh bieit tam uta u nongïathuhlypa.

17Kine, ki long ki pukri bakhlem um, ki lyoh ïa kiba la beh da ka 'erïong, ha kiba la ri noh ïa ka jingïong jong ka jingdum na ka bynta jong ki. 18Namar da kaba kren ïa ki ktien ba at sarong ka jingbieit thala, ki ïariam pah ha ki jingkwah brai ka doh, da ki jingleh nuti, ïa kita kiba dang ïaphet ïap noh na kita kiba im ha ka jingïaid sakma; 19ki da ïakular ha ki ka jinglaitluid, haba ma ki hi, ïa lade ki long ki mraw ka jingpynpyut; namar da uba la jop noh ïano ïano ruh, da uta la pynlong mraw keiñ ïa u. 20Namar lada, haba ki la phet ïap noh na kita ki jingpynbit-tngit jong ka pyrthei da ka jingtip ïa U Trai bad U Nongpynim jong ngi U Jisu Khrist, pynban, la suhsat pat ïa ki da kine kiei kiei ruh bad la jop noh ïa ki, ka jinglong ka bakhatduh kan long ha ki kaba kham sniew ïa ka banyngkong. 21Namar ka la kham bha ïa ki, ban ym tip ïa kata ka lynti ka hok, ban ïa haba ki la tip ïa ka, ba kin kylla dien noh na kata ka hukum bakhuid ïa kaba la aiti ha ki. 22#Pro. 26:11.Hynrei, ka la jia ha ki, ïa kaba ong kata ka pharshi kaba shisha; “U ksew u la wan phai sha la ka jong ka prie,” bad “Ka sniang ïa kaba la pynsum pynsait sha la kaba ksaid ktieh.”

Currently Selected:

2 PETROS 2: KHB

Highlight

Copy