2 PETROS 1
1
Ka jingkhublei
1U Simon Petros, u shakri bad u apostol U Jisu Khrist,
Ha kita kiba la ïoh ïa ka jingngeit bakordor ryngkat bad ka jong ngi, da ka hok U Blei bad U Nongpynim jong ngi U Jisu Khrist:
2To long ba yn pynman bun ha phi ïa ka jingaiei bad ïa ka jingsuk ha kaba ithuh ïa U Blei bad ïa U Jisu uba U Trai jong ngi.
Ka jingkhot U Blei bad ka jingjied ïa ki
3Kumba ka bor Blei jong u ka la ai ha ngi ïa kiei kiei baroh kiba dei sha ka jingim bad ka jingriewblei, da kaba ithuh ïa uta uba la khot ïa ngi da ka burom bad ka jingbha jong u hi: 4da kiba u la ai ha ngi ïa ki jingkular kiba khraw tam bad bakordor, ba da kine phin ïoh long ki nongïaïoh bynta na ka jinglong mynsiem bakynja blei, haba la phet ïap noh na kata ka jingpynpyut plak kaba ha ka pyrthei da ka jingkwah brai. 5Te namar kane hi ka daw phi ruh da ka jingleh minot baroh, to phin pynlang ha kata ka jingngeit jong phi, ïa ka jingbha; te ha kata ka jingbha, ïa ka jingtip; 6te ha kata ka jingtip, ïa ka bor halor lade; te ha kata ka bor halor lade, ïa ka jingïaishah; te ha kata ka jingïaishah, ïa ka jingriewblei; 7te ha kata ka jingriewblei, ïa ka jingïa-ieit parabangeit; te ha kata ka jingïa-ieit parabangeit, ïa ka jingieit. 8Namar haba kine kiei kiei ruh ki ïadon ha phi, bad ki ïaman bun, ki ïa-pynlong ïa phi ban ym long kiba alhia, lymne ki bymsei soh ha kata ka jingtip babiang ïa U Jisu Khrist uba U Trai jong ngi. 9Namar uta u bymdon kine kiei kiei ruh u long u bamatlah, uba ïohi tang ïa kiba hajan, uba la pynklet noh ïa ka jingpynkhuid na ki pop barim jong u. 10Naba kumta, ko parabangeit, to phin kham ïaleh minot ban pynlong skhem ïa kata ka jingkhot bad ïa ka jingjied ïa phi; namar haba phi ïai-leh ïa kine kiei kiei ruh, phin ym jynthut lano lano ruh: 11namar kumta, yn ai kyrhai eh ha phi ïa ka jingbsut shapoh kata ka hima bymjukut U Trai bad U Nongpynim jong ngi U Jisu Khrist.
12Naba kumta, ngan long uba kloi ban pynkynmaw ïa phi ha la ka sngi shaphang kine kiei kiei ruh, la phi tip ruh ïa ki, bad la la pynskhem ïa phi ha kane ka jingshisha kaba phi don; 13hynrei, nga mut ba kaba dei katba nga dang long ha kane ka ïingtrep, ban pynkhih ïa phi da kaba pynkynmaw ïa phi; 14haba tip ba kata kaba buh noh ïa kane ka ïingtrep jong nga ka la jan eh, kat kumba U Trai jong ngi U Jisu Khrist u la pyni ha nga. 15Shisha, ngan ïaleh minot ba man la ka por hadien kata ka jingleit noh jong nga, phin ïoh pynlong ka jingpynkynmaw shaphang kine kiei kiei ruh.
Ki nongïohi ïa ka burom U Khrist
16Namar ngim shym la bud noh ïa ki puriskam kai ba la thaw nang sianti, mynba ngi la pyntip ha phi ïa ka bor bad ïa ka jingwan U Trai jong ngi U Jisu Khrist, hynrei, ngi la ïoh long ki nongïohi ïa kata ka jinglong burom jong u. 17#Mat. 17:1-8; Mrk. 9:2-8; Luk. 9:28-36.Namar u la pdiang na U Blei uba U Kpa ïa ka jinglong burom bad ïa ka jingpyndonburom, mynba la wan kat kane ka ktien ha u na kata ka burom bakhraw batyngshaiñ eh: “Une u long u khun jong nga uba ieit ha uba nga sngewbha eh.” 18Te ïa kane ka ktien, ngi la ïohsngew ma ngi ba ka da wan na bneng, mynba ngi ïadon lem bad u ha uta u lum bakyntang. 19Bad ngi don kata ka ktien ka jingïathuhlypa ba la kham pynskhem; ha kaba phi leh bha haba phi pynshahshkor ïa ka, kumba ha ka sharak batyngshaiñ ha ka jaka ba-dum, tad ynda kan mih ka sngi, bad u 'lurshai un da mih ha ki dohnud jong phi: 20haba phi tip shuwa ïa kane, ba ym don ka jingïathuhlypa na Ka Jingthoh Bakhuid kaba long na ka jingbatai u briew hi. 21Namar ym da ka mon u briew la wan ka jingïathuhlypa mynno mynno ruh: hynrei, ki briew ki la kren na U Blei keiñ, haba la pynkhih ïa ki da U Mynsiem Bakhuid.
Currently Selected:
2 PETROS 1: KHB
Highlight
Share
Copy
Want to have your highlights saved across all your devices? Sign up or sign in
The Bible Society of India
