2 KORINTH 5

1Namar ngi tip skhem ba lada yn lied noh ïa ka ïing jong ngi kaba ha ka khyndew, kane ka ïingtrep keiñ, ngi don ka jingtei na U Blei, ka ïing ba la thaw bym da ki kti, ka bymjukut ha ki bneng. 2Namar shisha ngi ud sat ha kane, ba ngi da kwah hir hir ba'n pynphong halor da ka ïing shongneh jong ngi kaba na bneng, 3ba haba la pynphong ïa ngi kumta, yn ym shem ïa ngi kiba lyngkhuit. 4Namar ngi kiba don ha kane ka ïingtrep ngi ud sat, ba la pynkit khia ïa ngi, ym naba ngi kwah ban loit noh ïa ka, hynrei, ban ïoh pynphong halor, ba kumta, yn ïoh nguid noh ïa kane kaba ïap da ka jingim. 5Te uta uba la pynbit ïa ngi sha kane kajuh hi long U Blei, uba la ai ruh ha ngi ka synjat, uba U Mynsiem hi.

6Namar kata, haba ngi sngewshlur ha la ka sngi, bad ba ngi tip ba katba ngi dang shong ha kane ka met, ngi ïashong khlad noh na U Trai 7(namar ngi ïaid da ka jingngeit, ym da ka jingïohi), 8te ngi sngewshlur keiñ, bad ngi kham sngewbha ban leit noh na kane ka met, bad ban ïoh shongneh bad U Trai. 9Naba kumta ruh, ngi ïaleh tyngeh noh ban long kiba pynsngewbha eh ïa u, la ngi ïashong sah lane ngi ïaleit noh; 10#Mat. 16:27; Rom. 14:10.namar ka dei ban pynïeng ïa ngi baroh ha khmat ka jingshong bishar U Khrist, ba uwei pa uwei un ïoh pdiang ha lade ïa kita kiei kiei ruh ba la leh ha ka met jong u, katba kum kita ba u la leh, la bha la sniew.

Ka jingpynïasuk bad U Blei ha U Khrist

11Namar kata, haba ngi tip ïa kane ka jingsheptieng ïa U Trai, ngi pyrshang pynkohnguh ïa ki briew; hynrei, la pynpaw ïa ngi ha U Blei, bad nga kyrmen ba la pynpaw ïa ngi ha ki jingïatiplem jong phi ruh. 12#2 Kor. 3:1.Namar ngim ïaroh ïa lade pat ha phi, hynrei, ha phi ngi ai daw ka jingïaroh na ka bynta jong ngi, ba phin ïoh ei ei ruh ïa ka ban phai ktien ha kita kiba sngewkmen ha kaba paw habar, te ym ha ka dohnud. 13Namar la ngi leh bym tipbriew, ka long na ka bynta U Blei; la ngi leh tipbriew biang biang, ka long na ka bynta jong phi keiñ. 14#Rom. 5:15; 6:6-7.Namar ka jingieit U Khrist ka pynleh ïa ngi, da kaba ngi la kut jingmut kumne, ba lada uwei u la ïap na ka bynta baroh, kumta, kita baroh ki la ïap keiñ; 15bad u la ïap ruh na ka bynta baroh, ba kita kiba im kin ym im shuh ha lade hi, hynrei, ha uta uba na ka bynta jong ki u la ïap bad u la mihpat.

16Kumta te, naduh mynta, ngi ngim ñiew ïano ïano ruh katba kum ka doh; toi lada ngi la ju ñiew ïa U Khrist katba kum ka doh, hynrei, mynta, ngim ñiew shuh. 17#Rom. 16:7; Gal. 6:15.Kumta, lada uei uei ruh u don ha U Khrist, u long u jingthaw bathymmai; kiei kiei ruh ki barim ki la duh noh, ha khmih kiei kiei baroh ki la jia long ki bathymmai. 18#1 Kor. 11:12; Kol. 1:20; Rom. 5:10.Te kiei kiei baroh ki long na U Blei, uba la pynïasuk noh ïa ngi ha lade hi da U Jisu Khrist, bad uba la aiti ha ngi ïa ka jingpyntrei ïa ka jingpynïasuk; 19kata ka long, ba U Blei u dang pynïasuk ïa ka pyrthei ha lade hi ha U Khrist, khlem da ñiew ha ki, ïa ki jingpalat jong ki; bad ba u la buhti ha ngi ïa ka ktien kane ka jingpynïasuk. 20#Eph. 6:20.Namar kata, ngi long ki nongkit-'tien syiem na ka bynta U Khrist, la kumba U Blei u kyrpad ïa phi da ngi; ngi duwai hir hir na ka bynta U Khrist: To long phi ïa kiba la pynïasuk bad U Blei. 21#Heb. 4:15; 7:25; 1 Pet. 2:22; 1 Ïoan. 3:5; Ki Kam. 3:14.Namar ïa uta u bym shym la tip ïa ka pop, u la pynlong ka pop na ka bynta jong ngi, khnang ba yn pynlong ïa ngi ka hok U Blei ha u.

Currently Selected:

2 KORINTH 5: KHB

Highlight

Copy