2 KORINTH 2

1Hynrei, nga la lah thmu ïa kane ha lade hi, ba ngan ym wan pat ha phi ha ka jingsngewsih. 2Namar lada nga pynsngewsih ma nga ïa phi, hato mano te u ban pynsngewbha ïa nga, lymda uta ïa uba la pynsngewsih da nga? 3Te nga la thoh ïa kata hi ha phi, ïoh ba haba nga wan, ngan ïoh ka jingsngewsih na kita na kiba ka dei ïa nga ban ïoh ka jingkmen; da kaba shaniah shaphang jong phi baroh, ba ka jingkmen jong nga ka long ka jong phi baroh ruh. 4Namar na ka jingsngewjynjar bakhraw bad ka jingkhuslai ka dohnud, nga la thoh ha phi da bun ki ummat, ym da lei lei ban pynsngewsih ïa phi, hynrei, ba phin ithuh ïa kata ka jingieit kaba nga don kyrhai eh ïa phi.

Ka jingmap ïa u nongleh palat

5Hynrei, lada uno uno ruh u la pynsngewsih, um shym la pynsngewsih tang ïa nga, hynrei, katto katne (ba ngan ym ban khia ïano ïano ruh) ïa phi baroh. 6Ka la biang ïa uta u briew kane ka jingpynshitom ïa kaba la leh da kita kiba bun. 7Ba da kumwei, ka la dei ïa phi ban map bad ban pyntngen ïa u, ïoh ba yn nguid noh khoit ïa uba kum uta da ka jingsngewsih kaba palat eh. 8Naba kumta, nga kyrpad ïa phi ban pynskhem ïa ka jingieit jong phi sha u. 9Namar ïa kane khnang nga la thoh ruh, ba ngan ïoh tip ïa ka jinglong ba la tynjuh jong phi, la phi long ne em kiba kohnguh ha kiei kiei baroh. 10Hynrei, ïa uba phi ïamap ïa kaei kaei ruh, nga ruh nga map; namar lada nga la map ma nga ruh kaei kaei ruh, ïa uba nga la map, na ka bynta jong phi nga la map ïa kata ha U Khrist; 11ba yn ym leh phon ïa ngi da u Soitan, namar ngim long ki bymtip ïa ki buit jong u!

Ka jingsngewbuhkhoh u Paul ha Troas

12 # Ki Kam. 16:8; 20:1. Hynrei, mynba nga la wan ha Troas na ka bynta ka gospel U Khrist, bad haba la plie ka jingkhang ïa nga ha U Trai, 13ngam shym ïoh suk ha la ka mynsiem, naba ngam shym shem ïa u Titos u parabangeit jong nga; hynrei, da kaba khublei ïa ki, nga la leit noh sha Makedonia.

Ka jingjop da U Khrist

14Hynrei, long ka jingnguh ïa U Blei, uba pynrisa ïa ngi ha la ka sngi ha U Khrist, bad uba pynpaw ïa ka jingiwbih ka jingtip jong u da ngi ha ka jaka baroh. 15Naba ngi long ka jingiwbih U Khrist ïa U Blei ha kita ïa kiba la pynim, bad ha kita kiba da jot noh; 16ha uwei ka jingiw ka jingïap ïa ka ban ïap, hynrei, ha uta uwei ka jingiw ka jingim ïa ka ban im. Te uei uba bit biang ïa kine kiei kiei ruh? 17Namar ngim long kum kita kiba bun, kiba pynkhleh ïa ka ktien U Blei; hynrei, kum na ka jingsngur, hynrei, kum na U Blei, ha khmat U Blei ngi kren ha U Khrist.

Currently Selected:

2 KORINTH 2: KHB

Highlight

Copy