1 TIMOTHI 2

Ka jingkyntu bad ka jingpyni ban duwai

1Te nga kyntu nyngkong eh namar kata, ban pynlong ki jingkyrpad, ki jingduwai, ki jingïasaid, ki jingainguh, na ka bynta ki briew baroh; 2na ka bynta ki syiem bad ki bakhraw batri baroh; ba ngin ïoh im ka jingim kaba suk bad ba jar jar ha ka jingriewblei bad jingshida baroh. 3Kane ka long ka babha bad kaba pdiang hun ha khmat U Blei U Nongpynim jong ngi; 4uba mon ba ki briew baroh kin ïohlait im, bad ba kin poi sha ka jingtip ïa ka jingshisha. 5Namar don uwei U Blei, bad uwei u ksiang ruh hapdeng U Blei bad ki briew, U Khrist Jisu, uba u hi ruh u briew; 6uba la aiti ïa lade ban long ka jingsiewspah ïa baroh, ïa ka ban phla ha ki por kiba dei hi. 7#2 Tim. 1:11.Sha kaba la thung ïa nga u nongïalap bad u apostol (nga ong ïa kaba shisha ha U Khrist, ngam lamler keiñ), u nonghikai ïa ki Jentil ha ka jingngeit bad ka jingshisha.

8Nga kwah, namar kata, ïa ki rangbah ban duwai ha ka jaka baroh, da kaba rah ïa ki kti bakhuid khlem ka jingbitar bad ka jingïasaid. 9#1 Pet. 3:3.Kumjuh ruh, ba ki kynthei kin pynitynnad ïa lade ha ka jaiñkup ba don akor, lem bad ka jingshida bad ka jingsngew-adkar; ym da ka jingthain shñiuh, lane da ka ksiar, lane da ki paila, lane da ka jaiñkup bakordor; 10hynrei, (kaba dei keiñ ïa ki kynthei kiba pynpaw ïa ka jinglong riewblei) da ki jingleh babha. 11To ai ba ka kynthei kan nang ha kaba sngap jar da ka jingkohnguh baroh. 12Hynrei, ngam shah ïa ka kynthei ban hikai, lymne ban ïoh synshar halor u rangbah, hynrei, ban long ha kaba sngap jar. 13#Jen. 2:7,21-22.Namar ïa u Adam la thaw nyngkong, hadien kata, ïa ka Im. 14#Jen. 3:1-6.Bad ym shym la shukor ïa u Adam, hynrei, kata ka kynthei haba ka la shah shukor, ka la kyllon ha ka jingpalat. 15Hynrei, yn pynim ïa ka ha kaba kha khun, lada kin ïaineh ha ka jingngeit bad ka jingieit bad ka jingpynkhuid lem bad ka jingsngew-adkar.

Currently Selected:

1 TIMOTHI 2: KHB

Highlight

Copy