1 TIMOTHI 3
3
Ki nongsharai ha ka Balang
1Kane ka ktien kaba shisha: Lada u briew u kwah ïa ka jinglong u nongsharai, u kwah ïa ka kam ka babha. 2#Tit. 1:6-9.Namar kata, ka dei ïa u nongsharai ban long uba khlem shah kynnoh pop, u tnga jong kawei ka tnga, uba leh adkar, uba shida jingmut, uba ïaid beit, uba khot ieit basa, uba nang hikai; 3u bym shait ïamai, u bymïashoh ïadat; hynrei, uba jemnud, u bymïania, u bymieit sbai; 4uba synshar bha ïa la ka jong ka ïing, uba sumar la ki khun ha ka jingkohnguh da ka jingshida baroh; 5(namar lada u briew um tip kumno ban synshar ïa la ka jong ka ïing, hato kumno un sumar ïa ka balang U Blei?) 6ym u synran ba dang shibit, ïoh ba ynda u la sngewmeng, un hap sha ka jingpynrem jong u Soitan. 7Nalor kane, ka dei ïa u ban ïoh ka jingphla babha na kiba nabar; ïoh ba un hap sha ka jingshah krenbeiñ bad ka jingriam u Soitan.
Kumno ka dei ïa ki tymmen basan ban long
8Kumjuh ka dei ïa ki tymmen basan ban long kiba shida, ym kiba ar kyntien, ym kiba shait dih Waiñ, ym kiba khwan myntoi; 9kiba bat ïa ka jingmaïan ka jingngeit ha ka jingïatiplem bakhuid. 10Bad to ai ruh ba yn tynjuh shuwa ïa kine; hadien kata, kin leh basan, lada ki long kiba khlem shah kynnoh pop. 11Kumjuh ruh ki kynthei#3:11 ki kynthei: Hangne ka kit jingmut ïa ki tnga jong ki Tymmen basan. kin long kiba shida, ym kiba kren siar, kiba leh adkar, kiba shisha ha kiei kiei baroh. 12To ai ba ki tymmen basan kin long ki tnga jong kawei ka tnga, kiba synshar bha ïa la ki khun bad ïa la ki jong ki ïing. 13Namar kita kiba la leh basan bha, ki pynïoh ha lade ïa ka kyrdan ka babha, bad ïa ka jingshlur bakhraw ha ka jingngeit kaba ha U Khrist Jisu.
Ka jingmaïan ka bakhraw
14Ïa kine kiei kiei ruh nga thoh ha me, la nga kyrmen ban wan shen ha me; 15hynrei, lada nga tud, ba men tip kumno ki briew ki dei ban leh ïa lade ha ka ïing U Blei, kaba long ka balang jong U Blei u ba-im, ka rijied bad ka nongrim ka jingshisha. 16Bad khlem ka jingïasaid, kaba khraw ka jingmaïan ka jong ka niam Blei:
Uta uba la paw ha ka doh,
ba la ksan ha U Mynsiem,
ba la ïohi da ki angel,
ba la ïalap hapdeng ki Jentil,
ba la ngeit ha ka pyrthei,
ba la pdiang haneng
ha ka burom.
Currently Selected:
1 TIMOTHI 3: KHB
Highlight
Share
Copy
Want to have your highlights saved across all your devices? Sign up or sign in
The Bible Society of India
