1 PETROS 4
4
Ka jingim ka bathymmai
1Namar kata, haba U Khrist u la shah shitom ha ka doh, te ma phi ruh, to phin kieng atiar ïa lade da kata kajuh ka jingmut; naba jar uba la shah shitom ha ka doh u la wai noh na ka pop; 2khnang ba ha kiba dang sah na ki sngi ka rta jong phi ha ka doh, phin ym im shuh ha ki jingkwah brai ki briew, hynrei, ha ka mon U Blei. 3Namar ka por kaba la leit noh, ka la biang ïa ka ban leh ïa ka jingkwah ki Jentil, bad ban ïaid ha ki jingleh kyr-eit, ha ki jingkwah brai, ha ki jingkyrni dih kyiad, ha ki jingïadih kyiad khynwin, ha ki jingïadih buaid, bad ha ki jingmane bleithaw basang eh: 4ha kaba ki ïasngewphylla, ki da krenbeiñ ruh, haba phim ïaphet shuh lem bad ki sha kata kajuh ka pung ktieh ahor ka jingleh sarong awria: 5ki ban sa ai jingkheiñ ha uta uba la kloi ban bishar ïa kiba im bad ïa ki baïap. 6Namar na ka bynta kane khnang la ïalap ïa ka gospel ha ki baïap ruh, ba yn ïoh bishar ïa ki shisha katba kum ki briew ha ka doh, hynrei, ba kin ïoh im katba kum U Blei ha ka mynsiem.
Ki sordar babha ka jingaiei U Blei
7Hynrei, kata ka bakut kiei kiei baroh ka la jan keiñ; namar kata, to phin khan adkar, bad to phin sharai shaphang ki jingduwai. 8#Pro. 10:12.Hynrei, nyngkong eh ïa kiei kiei baroh phin ïaibat ïa kata ka jingïa-ieit bashitrhem paralok hi; naba ka jingïa-ieit ka tap noh ïa bun byllien ki pop. 9To long kiba ïakhot ïing sngewbha paralok hi khlem jingkren khñium. 10Uwei pa uwei baroh kat kumba u la pdiang ïa ka jingai, kumta keiñ, un sam ïa kata, paralok hi, kum ki sordar babha ka jingaiei babun jaid U Blei. 11Lada uno uno ruh u kren, un kren keiñ kum ki jingong U Blei; lada uno uno ruh u leh basan, to un leh kum na ka bor ba ai U Blei: ba ha kiei kiei baroh yn ïoh pyndonburom ïa U Blei da U Jisu Khrist, ha uba long ka burom bad ka jingsynshar sha ki bymjukut ki bymjukut: Amen.
Kaba shah shitom kum u Khristan
12Ko hep ba-ieit, to wat sngewphylla phi ïa kata ka jingtynjuh ba-meh ding kaba ha phi, kaba jia ïa ka ban tynjuh ïa phi, kumba da jia kaba khyllah ha phi: 13hynrei, kat kumba phi ïoh bynta lem na kita ki jingshahshitom U Khrist, to kmen noh; ba ha kata ka jingpynpaw ïa ka burom jong u, phi ruh, phin ïoh kmen da ka jingkmen kaba khraw. 14#Isa. 11:2.Lada la krenbeiñ ïa phi namar ka kyrteng U Khrist, suk ma phi; naba U Mynsiem jong ka burom bad u jong U Blei u ïaishong ha phi: ha phang jong ki shisha la krenbeiñ ïa u, hynrei, ha phang jong phi la pyndonburom ïa u. 15Namar wat ai ba uno uno ruh na phi un shah shitom kum u nongpynïap briew, lane u nongtuh, lane u nongleh basniew, lane kum uba shait lorni leh lushia ïa ki kam kiwei: 16hynrei, lada uno uno ruh u shah shitom kum u Khristan, wat ai un sngewlehrain, hynrei, to un pyndonburom ïa U Blei ha kane ka kyrteng. 17Naba kata ka Ïa ka la jia ïa ka ban sdang ka jingbishar ha ka ïing ka jong U Blei; hynrei, lada ka sdang nyngkong ha ngi, kaei kan long ka bakut jong kita ki bymkohnguh ïa ka gospel U Blei? 18#Pro. 11:31.Te lada,
“Da kaba eh ba pynim
ïa u bahok,
hangno uta u bymriewblei
bad u bapop un paw?”
19Namar kata te, kita kiba da shah shitom katba kum ka mon U Blei, to kin aiti noh ïa la ki mynsiem ha kaba ïai-leh babha, ha U Nongthaw baïaineh.
Currently Selected:
1 PETROS 4: KHB
Highlight
Share
Copy
Want to have your highlights saved across all your devices? Sign up or sign in
The Bible Society of India
