SALMO 139
139
Tata Dios allita riksiwanchisapa.
1A, Tata Dios,
sukaman allita kawawashkanki
yachanaykipa allitachu manachu ruraykani nishpa.
Sukaman allita riksiwanki.
2Kan yachanki tukuy ima ruranaynita.
Kanmanta karupi kaptinipish
tukuy yuyanaynita yachanki.
3Maymanpish riptini
maypipish samaptini
tukuy ruranaynita yachanki.
4Manara nimata rimaptinira
kan yachanki imatami rimanayani nishpa.
5Allita chawpichawashpa kuydawanki.
Makikita ñukapi churanki yanapawanaykipa.
6Chaykunata yachashpayni
sukaman almirani.
Mana atipanichu entiendiyta
imashnami chashna kuydawanki nishpa.
7Chashna sukaman kuydawaptiki
mana atipanichu Espirituykimanta pakakuyta.
Ñawpaknikimanta mana atipanichu pakakuyta.
8Sieluman riptinipish
chaypimi kawawanki.
Wañudukuna rinankunaman riptinipish
chaypimi kawawanki.
9Inti llukshimunan partiman riptinipish
inti yaykunan partipi
manllayba kochaman riptinipish
chaypipish kawawanki.
10Tukuy maymanpish riptini tariwanki.
Alli ladu makikiwan apiwashpa purichiwanki.
11Yuyaptini tutami pakawanka nishpa
chaypipish tariwanki.
Diya tutayaptinpish chaypimi tariwanki.
12Sukaman tutayaptinpish
mana kanmanta atipanichu pakakuyta.
Tuta kaptinpish diyapishina kawakunki.
Tutapi diyapi chashnallami kawakunki.
13Kanmi mamaynipa wiksanpi rurawashkanki.
Tukuy kuerpuynita rurashkanki.
14Chaykunata yachashpa almirashpa alabayki.
Sukaman almirana layakunata rurashkanki.
Allita yachani tukuy layata rurashkaykita.
15Mamaynipa wiksanpi kuerpuyni wiñaptin
mana ni pi kawawaptinpish
kanmi kawawashkanki.
16Kuerpuyni wiñaykaptin kawawashkanki.
Libruykipi tukuy chaykunata killkashkanki.
Manara kawsaptinira yachashkanki
mashna diyakunatami kawsasha nishpa.
17A, Tata Dios,
favorninipa allimata yuyaykanki.
Yuyanaykikunaka sukaman mana yupaypa layami.
18Rurashkaykita yupanayashpayni
playatashina mana atipanichu yupayta.
Puñushkaynimanta atarishpayni kanllawan kani.
19A, Tata Dios,
tukuy sakra mana alli rurak runakunata kastigaysapa.
Chay wañuchiwanayak runakunata
ñukamanta anchuchiysapa.
20Washanchashuk runakunata
yankamanta chiknishuk runakunata kastigaysapa.
21A, Tata Dios,
chiknishuk runakunata chiknini.
Mana kasushunayak runakunata mana nimatashina kawanisapa.
22Tukuy shunku paykunata chikninisapa.
Chay chiknishuk runakunata yuyani
chikniwak runakuna kanankunata.
23A, Tata Dios,
allita kawaway yachanaykipa
allitachu manachu kuyayki nishpa.
Riksiway allitachu manachu yuyaykuni nishpa.
24Kawaway ichará mana allikunata ruraykani nishpa.
Chashna mana allita ruraptini
yanapaway allita rurashpa
alli ñannikita katinaynipa.
Currently Selected:
SALMO 139: qvs
Highlight
Share
Copy
Want to have your highlights saved across all your devices? Sign up or sign in
© 1992, 2008, Wycliffe Bible Translators, Inc. All rights reserved.
