OBUCHACHILO 31
31
Yakobo Yelukha okhurula khu Labani
1Yakobo yahulila abasiani ba Labani nibaboolanga bari, “Yakobo Yabukuule abindu bia papa wefwe biosi, ne okhurulila khubindu ebio, wayekholile omiyunda.” 2Khandi Yakobo nalola Labani nalamuchamile shinga olwa yali niyamuchama khale tawe. 3Kho OMWAMI Nyasaye naboolela Yakobo ari, “Kalukha mushialo shiabakuukabo nende abekhobo, nasi ndalaba halala ninawe.”
4Kho Yakobo naruma likhuwa mbu, Raeli nende Lea betse mushiayo. 5Yababoolela ari, “Endolanga mbu, papa wenywe shiashinjamile shinga olwa yali niyanjama tawe. Nebutswa Nyasaye wapapa wanje yabelenje halala ninasi. 6Inywe mumanyile obulayi shinga olwa ndakholeele Papa wenywe emilimo namaani kanje koosi. 7Nebutswa papa wenywe yangaatinjia butswa khandi yakalukhasiyenje omurungo kwanje akhandi ekhumi, nebutswa Nyasaye shiyamufuchilila mbu yasaalisie tawe. 8Buli olwa Papa wenywe yaboolanga mbu, ‘Ebiayo biamapalapala nebibio,’ ebiayo ebio biebulanga ebimeeme biamapalapala. Ne niyaboolanga mbu, ‘Ebiayo biamakondokondo nebibio,’ ebiayo ebio biebulanga abimeeme biamakondokondo. Khandi niyaboolanga mbu, ‘Ebiayo biemikhoosikhoosi nebibio,’ ebiayo ebio biebulanga ebimeeme biemikhoosikhoosi. 9Nolwa OMWAMI Nyasaye yabukula emiruko chia papa wenywe ario niyambelesia.
10“Mutsinyanga tsienetsio, ndaloora lilooro mbu, ndahenga mwikulu mana nindola tsimbusi tsikhole nitsilusinjia tsimbusi tsiali etsiobukondo bwamapalapala nende ebipala ebimali nende etsiamakondokondo. 11Omumalaika wa Nyasaye niyananga nibamboolela mwilooro ari, ‘Yakobo!’ Nasi ningalusia mbu, ‘Endiho!’ 12Kho naboola ari, ‘Chinguula tsimonitsio olole. Tsimbusi tsikhole tsiosi, etsiniinanga khu biayobio okhwilusia, netsiobukondo bwa nyakasanga, obwamapalapala nende etsiamakondokondo. Okhuba enduutsi aka Labani akhukholelanga iwe koosi. 13#Obucha. 28:18-22Nisie Nyasaye wakhuloleshela noli Betseli, ewa watsushilila khwichina amafura khulwa okhunzitsulila niunzitsubila eshiitsubo. Bulaano buukha orule mushialo shino, okalushe mushialo shia webulilwamwo.’ ”
14Mana Raeli nende Lea nibamuboolela bari, “Nefu khukhashilikhwo nomukabo kata obulaame munzu ya papa noho?” 15Papa akhuhengangakhwo shinga abacheni butswa. Yakhukusia ifwe mana khandi niyekhoonyela amapesa ka yarungwa olwa khwakulwa. 16Emiruko chia Nyasaye yarusia khu papa chino chiosi, nechiefwe nende abaana befwe. Ewe khola butswa shinga Nyasaye akhubooleele.
17Kho Yakobo niyekaasia, naniinia abaanabe nabakhasibe khungamia, 18ne nabukula emirukochie nende obuyinda bwa yali niyanyoola Mesopotamia, nakalukha ewa papawe, owali niyamenya Kanani. 19Labani yali natsiile okhuteta obwoya bwamakondike, ne olwa yali nabulaho ario, Raeli niyeba ebifwanani biabanyasaye ba papawe yenamilanga. 20Mana Yakobo naswekha butswa ne narula Labani Omwaramu nalamanyilekhwo tawe. 21Yakobo yabukula ebindubie biosi ne narula matetekhana niyelukha. Yatsia niyambukha omwalo kwa Yufurate ne natsiililila noluchendolwe nahenjile mushialo shia Giliadi eshilimwo ebikulu.
Labani alondachila khu Yakobo
22Olunyuma lwetsinyanga tsitaru, Labani yaboolelwa mbu, Yakobo yeluushe. 23Kho Labani nabukula abandu boluyia lwabwe okhulondachila khu Yakobo ahambi na hambi, khulwa tsinyanga musaafu. Mana namutiilila mushialo shiebikulu shia Giliadi. 24Nebutswa Nyasaye yaboolela Labani mumalooro mushilo shiene eshio ari, “Obe meeso, olaboolelakhwo Yakobo likhuwa lilayi kata libi tawe.” 25Mana Labani niyoola khu Yakobo. Naye Yakobo yali niyombaashe liheemalie mushialo shiebikulu shia Giliadi. 26Kho Labani namureeba ari, “Okhakholeele shiina shino, mbushiina niungaatia niwiyiba butswa niwilukha nabaana banje abakhaana shinga abanuulilwe mwihe? 27Mbushiina niwiyiba niwilukha mumaasiliisi ne nolamboolelakhwo ta? Niwakhambooleele, khwakhaseebulaane munjila yobusaangaafu nikhutsatsahalile. Khwakhembile tsinyimbo, nikhukhupa manyanga nende amatungu. 28Ne kata shiwakhafuchiliilekhwo okhufumbeelela abetsukhulu banje nibaaseebulanga? Okholile obubi muno. 29Endi nobunyali bwokhukhusaalisia. Nebutswa Nyasaye wa Papawo yayanganiye mushilo niyamboolela ari, obe meeso, oleshe olaboolelakhwo Yakobo likhuwa lilayi kata libii tawe. 30Bulano okalukhanga ewenywe shichila wikombanga muno okhulolakhwo abandu beinzu ya papawo. Ne kata noba nokalukha ewenywe, mbushiina niwiiba abanyasaye banje?”
31Naye Yakobo namukalusia namuboolela ari, “Ndiyibile nirula shichila ndariire mbu, wakhanuula abakhaanabo. 32Ne omundu yesi yesi nanyoolekha nali nabanyasayebo, alerwa. Manyiakhwo eshindushio shiosi shiosi eshiembukuule abeekho befwe bano bashilolekhwo.” Yakobo shiyali namanyile mbu, Raeli yebile abanyasaye ba samwana tawe.
33Mana Labani natsia niyenjila mwiheema lia Yakobo nende mwiheema lia Lea nende mumaheema kabakholi babwe babili abo, nebutswa shiyanyoolamwo eshindu tawe. Ne olwa yarula mwiheema lia Lea, yenjila mwiheema lia Raeli. 34Khane Raeli yali nabukuule abanyasaye abomunzu mwa Labani, nareere hasi weshisaala shieingamia ne niyekhaale khushisaala eshio. Labani nakhaabilisia mwiheema liosi, nebutswa nalanyoola eshindu tawe. 35Kho Raeli naboolela samwana ari, “Papa shiolaasinyishila mbu, shiekhusinjiliile tawe, okhuba endwala, shinga olwa kabetsanga nabakhasi buli mwesi nolwa kali kario ninasi inyanga yino.” Kho Labani nakhabilisia nebutswa shiyanyoola abanyasaye bomunzuwe tawe.
36Kho Yakobo nasinyikha muno, ne nachaaka okhureeba Labani noburuma ari, “Ekholile makhuwa shiina amabi? Nibwonooni shiina obuchilile niunondakhwo tsimbilo orio? 37Ebindu biomunzuyo biokhaabilenje biene bilena? Bireekhwo hano kho mbu, abandubo nende abanje balolekhwo mbu, isie ninawe, omubii niwiina. 38Khulwa emiyika amakhumi kabili chia ndamenya ninawe, amakondiko amasubeeni nende tsimbusitsio tsikhasi shitsiahuusakhwo, kata isie okhwirakhwo likondilio limiiku tawe. 39Shindakhureererakhwo eshiayo shiosi shiosi eshia isolo yiirire tawe. Eshieisolo yiirire, isie omwene ndakalusinjiaho eshindi. Walolanga mbu, ebiayobio biosi bili habwene. Ebiebungwa eshilo kata eshiteere, iwe shiwayenyanga okhumanya tawe. Elilio lialinji butswa okhulola mbu, enjelesiye ebiayo biosi. 40Khulweshio, omubasu kweshiteere kwandiitsanga nende omunyiri kweshilo nekhwayila ebiayobio, khandi ndafubanga tsindoolo, shindanyalilungwa okhukona tawe. 41Ndamenya munzumwo khulwemiyika amakhumi kabili, nekhwayila khulwemiyika ekhumi nende chine khulwa ikhwe yabakhaanabo babili. Khandi ndakhukholela emilimo khulwemiyika chisasaba khulwa okhwaya emirukochio. Nawe wakalukhasia omurungo kwanje akhandi ekhumi. 42Olaboolakhwo mbu, wahelesia Nyasaye wa papa wanje, Nyasaye wa Aburahamu nende Nyasaye wa Isaka oluyali nende okhumuria ta, shiwakhaaseebulekhwo nende eshindu shiosi shiosi tawe. Nyasaye yaluustsi okhunyakhana khwanje nende okhukhola khwa ndaakholile emilimo, niko akachilile nakhuhalabila eshilo shiabeele.”
Indakano ya Yakobo yakhola hakariwe nende Labani
43Labani nakalusia Yakobo namuboolela ari, “Abakhaana bano, nabanje. Ne abaana babwe bano, nabaana banje. Kata emiruko chino, nechianje. Ebindu ebioli ninabio bino, biosi nebianje. Nasi bulaano eshienyala okhukholela abakhaana banje kata abaana babwe nishiina? 44Yitsa khukasie indakano hakari wanje ninawe, eshilolelo hakari wanje ninawe.” 45Kho Yakobo nabukula lichina nalisimikha niliba shinga isiilo. 46Yakobo naboolela abeekhobe ari, “Mubunjelesie amachina,” nabo nibakhung'asia amachina nibakaasia eshituuli, ne nibaliila hamachina tsana ebiokhulia. 47Labani nakulikha eshituuli shiamachina eshio mbu, Jegari Sahadutsa#31:47 Jegari Sahadutsa: eshisina muluaramaraika mbu, eshituuli shiokhukhwitsusia. Nebutswa Yakobo yashikulikha mbu, Galeedi#31:47 Galeedi: eshisina muluheburania mbu, eshituuli shiokhukhwitsusia. 48Mana Labani naboola ari, “Eshibunjikho shino neshilolelo hakari wanje ninawe inyanga yino khu indakano ya khukaasiye.” Kho eshituuli shiamachina eshio nishikulikhwa mbu, Galeedi. 49Shiamala khandi shikulikhwe eliira lindi mbu, Mizipa#31:49 Mizipa: habundu aha okhuhenjela. shichila Labani yaboola ari, “OMWAMI Nyasaye akhoya yatsiililila okhukhuliinda kata nikhukabukhaane. 50Noba nosandia abaana banje abakhaana abo, noho kata okhuteeshia abakhasi bandi, kata omwene nindalamanya ta, witsulile mbu, Nyasaye niye omuloli wefwe fwesi.” 51Kho Labani naboolela Yakobo ari, “Orangaale olole eshibunjikho shiamachina shino nende omunaara kuno, ebia erecheeshe hakari wanje ninawe. 52Eshibunjikho shino nende omunaara kuno, bilaba eshilolelo shiokhumanyiasia mbu, shindiliburakhwo eshibuunjikhop shino ndetsa ewa oli, kata khandi wesi okhuruuma khumachina kano nende omunaara kuno okhwitsa ewa endi khulwa okhuusaalisia tawe. 53Nyasaye wa Aburahamu, Nyasaye wa Isaka, Nyasaye wa Nahori, Nyasaye wabakuuka babwe, niye omukhalachi weshiina hakari wefwe.” Mana Yakobo niyetsuba muliira lia Nyasaye, Nyasaye wa papawe Isaka yenamilanga, nasuubisia okhuliinda obusuubisie obwo. 54Kho Yakobo nahaanila Nyasaye omusango khushikulu, ne nalanga ebeekhobe mbu, balie eshiokhulia. Olwa bali nibamalile okhulia, batong'a khushikulu eshio eshilo eshio shiosi.
55Mumabwibwi eshialo nibwakhashia, Labani yabuukha nafumbeelela abakhaanabe nende abetsukhulube ne nabalaamila tsikhabi. Kho narulaho nakalukha ingowe.
Currently Selected:
OBUCHACHILO 31: OLUDC
Highlight
Share
Copy
Want to have your highlights saved across all your devices? Sign up or sign in
