OBUCHACHILO 30
30
1Olwa Raeli yalola mbu, shiyebulilangakhwo Yakobo omwana ta, yatiilila omukhaana wabwe imbalikha. Mana naboolela Yakobo ari, “Umbelesie abaana, nikalali kario ta, isie ndalafwa!” 2Mana Yakobo nasinyishila Raeli, ne namureeba ari “Nasi ekhali Nyasaye, owakhwikalila okhunyoola abaana?” 3Raeli naboolela Yakobo ari, “Bukula omukholi wanje uno Biliha, okone ninaye, yanzibulile abaana, siesi embekhwo nabaana okhubirira muye.” 4Kho Raeli nahelesia Yakobo omukholiwe Biliha mbu, abe omukhasi wa Yakobo. Mana Yakobo nakona ninaye. 5Biliha nahela inda ne niyebulila Yakobo omwana omusiani. 6Kho Raeli naboola ari, “Nyasaye yakhalachiile eshiina khandi ahuliile okhuhaaba khwanje, ne niyambelesia omwana omusiani.” Khulweshio, yamala akulishe omwana tsana eliira mbu, Dani. 7Omukholi wa Raeli nahela inda khandi, ne niyebulila Yakobo, omwana wakhabili omusiani. 8Kho Raeli naboola ari, “Ekhupaane nende omukhaana wefwe lihe liamaani mana nemuhula.” Kho Raeli nakulikha omwana oyo mbu, Nafutali.
9Olwa Lea yalola mbu, bulano aleshile okhwibula abaana, yabukula omukholiwe Zilipa, nahelesia Yakobo mbu, abe omukhasiwe. 10Mana Zilipa, omukholi wa Lea, niyebulila Yakobo omwana omusiani. 11Naye Lea naboola ari, “Endi neikhabi!” Kho nakulikha omwana oyo mbu, Gadi. 12Zilipa, omukholi wa Lea niyebulila Yakobo omwana omusiani wakhabili. 13Mana Lea naboola ari, “Esaangaalile muno! Shichila abakhasi balananganga mbu, omusaangaafu.” Kho Lea nakulikha omwana oyo mbu, Asheri.
14Mutsinyanga tsiokhuchesa ingano, Rubeni yatsia mumukunda nanyoolamwo tsinduli, etsilangwa mbu, Mandireki. Natsinoka ne nareerera Lea nyinamwana. Mana Raeli naboolela Lea ari, “Nochama, ekhusaaya mbu, umbelesiekhwo tsinduli tsiomusianiwo etsio.” 15Nebutswa Lea yamuyibila naboola ari, “Opaara mbu, okhuunuula omusaatsa ni likhuwa litiiti, khandi bulano wenyanga okhubukula tsinduli tsiomwana wanje omusiani?” Raeli namukalusia ari, “Noba niumbelesiakhwo tsinduli tsiomwanawo omusiani etsio, Yakobo alakona ninawe eshilo shieinyanga yino.”
16Olwa Yakobo yachelela okhurula mumukunda, Lea yatsia okhumwakaanila ne namuboolela ari, “Inyanga yino olakona ninasi, shichila ekhukulile tsinduli tsiomwana wanje omusiani.” Mana Yakobo nakona nende Lea eshilo eshio.
17Mana Nyasaye nahulila okhuhaaba khwa Lea, kho Lea nahela inda ne niyebulila Yakobo omwana owakharano omusiani. 18Lea naboola ari, “Nyasaye yambelesiye eshihaanwa eshilayi, shichila ndahelesia omusaatsa wanje omukholi wanje. Kho nakulikha omwana oyo mbu, Isakari.” 19Mana Lea nahela inda khandi ne niyebula omwana wakhasasaba omusiani. 20Ne Lea naboola ari, “Nyasaye yamanusiye eshihaanwa eshilayi, bulaano omusaatsa wanje alambelesia oluyali, shichila emwibuliile abaana abasiani basasaba.” Kho nakulikha omwana oyo mbu, Zebuluni. 21Olunyuma niyebula omwana omukhaana, ne namukulikha mbu, Dina.
22Mana Nyasaye niyetsulila Raeli, nafuchilila amasaayoke ne namwikula olubeleshelo okhwibula abaana. 23Raeli nahela inda ne niyebula omwana omusiani, kho naboola ari “Nyasaye yarusiyekhwo tsisoni.” 24Mana namukulikha mbu, Yosefu, naboola ari, “OMWAMI Nyasaye akhoya yameetakhwo omwana undi omusiani!”
Yakobo anyoola obuyinda
25Olwa Raeli yali niyebuule Yosefu, Yakobo yaboolela Labani ari, “Undekhuule engalushe ingo mushialo shiefwe. 26Umbelesie abakhasi banje nende abaana banje, abandanyoola shinga omurungo khulwa okhukhukholela iwe emilimo, enzie ninabo shichila omanyile mbu, ndakhukholela emilimo obulayi.” 27Nebutswa Labani yaboolela Yakobo ari, “Lekha siesi emboolekhwo. Ndamanyilisiye okhubirira mubulakusi bwanje mbu, OMWAMI Nyasaye yambelesiye tsikhabi okhulwa iwe. 28Boola omurungo kwosi kwosi okwa wenya, nasi ndalakhuhelesia.” 29Yakobo nakalusia naboola ari, “Iwe omanyile emilimo chiandakhukholela, khandi shinga olwa emirukochio chiayemeetile nendi omwayi wachio. 30Wali nende emiruko mitiiti ne okhurula ninditsa, chiameetekha muno. OMWAMI Nyasaye yakhumeeta tsikhabi tsinyinji hosi hosi aha ndatsitsanga. Nebutswa bulaano ebise biakhoola, ebia siesi ndenya mbu, nasi ekhaabekhwo ebianje omwene.”
31Kho Labani nareeba Yakobo ari, “Bulaano nekhakhurunje shiina?”
Naye Labani namukalusia naboola ari, “Shiolaarungakhwo eshindu tawe. Noba nofuchilila elia ndenya okhuboola lino, ndaleyama okhwaya nende okhuliinda emirukochio. 32Lekha enjende mubiayobio nindaahulamwo ebimeeme biamakondi, ebukondo obumali nende amakondi kamapalapala halala nende tsimbusi tsiamapalapala, bibe omurungo kwanje. 33Kho obwisikwa bwanje bwakhaloleshe habulafu, lwolichelela okhulola omurungo kwanje. Noba nolinyoolakhwo tsimbusi tsiosi tsiosi etsilali namapalapala noho amakondokondo, noho amakondi akalali akobukondo obumali ta, ebienebio bilibalwa mbu, biebwa.”
34Naye Labani nakalusia naboola ari, “Nobulayi, lekha kabe shinga lwoboolile.” 35Habula inyanga yeneyo, Labani yarusia tsimbusi tsikhole nende tsikhasi tsiosi, etsiali etsia amapalapala halala nende tsiamakondo kondo namakondi kebipala ebimali koosi nahelesia abasianibe. 36Mana narula nemiruko echio, nalekhana nende Yakobo natsia ehale oluchendo oluhela tsinyanga tsitaru. Naye Yakobo natsiililila okhwaya ebiayo bia Labani, ebiali nibitoonyile.
37Mana Yakobo nabukula tsisaala tsiemibinu nende etsiomuluusi nende etsiomusaala omuaramoni, natsikhobola mana emikhoosi emilafu nichilolekhakhwo. 38Yamala narechekha tsisaala tsia yali nakhoboole etsio imbeli webitoboonje biebiayo bianywelangamwo amaatsi. Ne okhuba mbu, tsimbusi tsikhole nende amakondi amamiiku bielusinjia ebiayo nibiakhetsa okhunywa amaatsi, 39ebiayo ebio bielusilibungwa embeli wetsisaala tsiali nitsirecheekhwe etsio, mana tsichila ebimeeme biebulungwa biba ebia osanga, ebiamapalapala nende ebiamakondo kondo. 40Mana Yakobo niyahukhasia ebimeeme biamakondi okhurula mu ebietsimbusi ne nahenjia ebiamakondi ebio elubeka wetsimbusi tsiosanga nende elubeka wamakondi akobukondo obumali ka Labani kali, nalakatsokasiakhwo nende aka Labani tawe. 41Olwa ebise biolanga ebia ebiayo ebinefu okhwilukha, Yakobo yarechekhanga tsisaala etsio embeli webitoboonje biamaatsi, ebia ebiayo ebio bianywelangamwo, mana ebiayo ebio bielukhanga nibili hakarikari wetsisaala etsio. 42Olwa ebiayo ebilali ebinefu ta bielushikhanga, Yakobo shiyarechekhanga tsisaala etsio tawe. Kachila Labani naba nende ebiayo, ebilali ebinefu ta naye Yakobo naba nende ebiayo ebianera. 43Yakobo yakholanga ario kho naba omuyinda muno. Kho naba nende ebiayo ebinji, abakholi abanji, tsingamia tsinyinji, nende tsisishili tsinyinji.
Currently Selected:
OBUCHACHILO 30: OLUDC
Highlight
Share
Copy
Want to have your highlights saved across all your devices? Sign up or sign in
