Mk. 16

Lilamukha lia Yesu

(Mat. 28.1-8; Lk. 24.1-12; Yn. 20.1-10)

1Oli Esabato yaawa, Maria Makatalena, Maria maawe owa Yakobo, ne Solome bakula kamafura kaunya bulayi khucha khuakha kumulaambo kwa Yesu. 2Enyanga ne esoa chumapili bacha khu siliindwa. 3Ne balikho ne bacha bareebana bali, “Naanu olakhupiringisilia libaale lirure emuliango we siliindwa?” (Liaba liboofu lukali.) 4Oli balola babona bali libaale liarusiibweyo. 5Nio bengila mu siliindwa babonamo omusoleeli ne ekhaale kumukhono kumuseecha, afwarire engubo ewaanga mala besiindukha.

6Omusoleeli chana ababoolela ali, “Mukhesiindukha tawe, manyile ndi mulikho muenja Yesu owe Nasareti, niye babambile. Se ali ano tawe, alamusiibwe! Lola ano niio baamureere. 7#Mat. 26.32; Mk. 14.28 Nono khemuche muboolele babeeka bewe, alala ne Petero yesi muli, ‘Alikho acha Kalilaya oleyo enywe ne mukholayo tawe’, ebweeneyo mulamubona nga nilwo amuboolela.”

8Nio barura mu ng'ani chimbilo sikila baba mu bireengo ne khukhwesiindukha mala khuboolelakho omundu yesi yesi tawe, sikila baba ne buuri bukali.

Limaliilisia likhale khu Lomo Endayi eya Mariko

16.9-20

Yesu abonekhela Maria Makatalena

(Mat. 28.9-10; Yn. 20.11-18)

[ 9Enyuma wa Yesu khulamukha khukhwama mu lifwa makhelebeende chumapili, anyoa abonekhela Maria Makatalena niye arusiamo bisieeno saba. 10Maria chana acha aboolela babaandu ba babechanga naye. Baba basooma ne khulila, 11nga baulila naboola ali Yesu ali omulamu lundi amubone, se bamusuubila tawe.

Yesu abonekhela babeeka babili

(Lk. 24.13-35)

12Enyuma wakano, Yesu abonekhela babeeka bewe babili mu ngila ekabukhane ne balikho ne bacha mu birekere. 13Bakobola baboolela babasiaabwe ne kakhali se babasuubila tawe.

Yesu abonekhela babeeka ekhumi na mulala

(Mat. 28.16-20; Lk. 24.36-49; Yn. 20.19-23; Bikh. 1.6-8)

14Khumaliilikha Yesu abonekhela babeeka bewe ekhumi na mulala nga baba ne balikho balia. Abayibila, sikila se baba ne lisuubila tawe, lundi sikila baba ne kimiooyo kimilume se basuubila abo ba bamubona enyuma we khulamukha tawe. 15#Bikh. 1.8 Ababoolela ali, “Cha mu sibala sioosi mala mwilwache Elomo Endayi khu buli mundu. 16Yesi yesi osuubila mala abatiisibwe alaonisibwa, ne oyo okhasuubila tawe, alakhalakilwa. 17Basuubili balaebwa bunyali bwe khukhola kamayia, bakharusie bisieeno mu lisina liase. Bakhalomalome mu ndimi chimbia, 18bakhatiila chindemu namwe banywa buchiba, se bakhanyoole butinyu bwosi bwosi tawe, balira kamakhono kabwe khu balwale mala baone.”

Yesu abukulwa khucha mwikulu

(Lk. 24.50-53; Bikh. 1.9-11)

19 # Bikh. 1.9-11 Enyuma wo Mwami Yesu khulomaloma ne nabo abukulwa aniina mwikulu mala ekhala kumukhono kumuseecha kwa Wele. 20Babeeka bewe bacha belwacha buli abuundu, mala Omwami akhola kimilimo nabo, ne khukhwekesia bali kamelwacho ke burume kabwe kali ka ng'ali khuloondekhana ne kamayia niko bakholanga.]#16.20 kamakaluukhasia malala ke khaale se kali ne chinyilili chino tawe.

Limaliilisia likhale liliindi

16.9-10

[ 9Bakhasi bacha khu Petero ne basaale bewe mala bababoolela mu bwimbi koosi niko baboolelwe. 10Enyuma wakano Yesu omwene arumikhira babeeka bewe khukhwama ebukwe khukhwola mumbo khulandisia burume bwewe butakatifu bwe buonia bwa mindali.]#16.10 Chibibilia chindala chili ne limaliilisia liliindi lino khutasa khu liindi lia 9-20.

Currently Selected:

Mk. 16: LUBUKUSU

Highlight

Copy