Mk. 15

Yesu ayiilwa ebweeni wa Pilato

(Mat. 27.1-2,11-14; Lk. 23.1-5; Yn. 18.28-38)

1Nga bwasia kumutikhinyi basaayi bakhulu, babemeelesi, baandiki nende be kumuse boosi bakaanana khangu mala bakhola etoloondo. Baboa Yesu kiminyololo mala bamuila khu Pilato. 2Pilato amureeba ali, “Ewe niye Omwami owe Bayaudi?”

Yesu akobosia ali, “Ewe walomile.”

3Basaayi bakhulu basitaka Yesu khu biindu bikali, 4nio Pilato amureeba lundi ali, “Se okobosiakhomo tawe? Rekeeresia kamasitako kano koosi.” 5Yesu khukobosiakhomo likhuwa tawe, mala Pilato auka lukali.

Yesu akhalakilwa khufwa

(Mat. 27.15-26; Lk. 23.13-25; Yn. 18.39—19.16)

6Buli mu Naikara eye Epasaka, Pilato aba ne kumwiima kwe khulekhuula omuboe mulala niye babaandu benyile. 7Siise sienesio omundu bali Baraba aba mu siboe ne babaandi ba baaba ne berire babaandu mu siayuumba. 8Babaandu bakali bebuusia mala barakikha khureeba Pilato nga kwaba kumwiima kwewe, 9abareeba ali, “Mwenya emulekhuulile Omwami owe Bayaudi?” 10Aamanya bulayi bwene ali basaayi bakhulu baba bamureerere Yesu sikila baba ne sikhalikhali.

11Basaayi bakhulu baachilisia babaandu basabe Pilato abalekhuulile Baraba, ne Yesu tawe. 12Nio Pilato abareeba ali, “Nono mwenya khole ndiena omundu niye mulaanga muli Omwami owe Bayaudi?” 13Bayokela bali, “Mubaambe!” 14Ne kakhali Pilato areeba ali, “Akholile libi siina?”

Baatasa khuyokela bali, “Mubaambe!” 15Sikila Pilato eenya khusangaasia babaandu, khwako aabalekhuulila Baraba, aapa Yesu kimisariti ne khumuaana abaambwe.

Basikari bakholeela Yesu siienyameno

(Mat. 27.27-31; Yn. 19.2-3)

16Nio basikari baayila Yesu mukari khu luuya lwe lichipi lio mwami mala baalaanga eng'etuuti yabwe yoosi baakaanane alala. 17Bafwara Yesu ekaanjo efwaana buseemwa, baaruka ekuutwa eye kamawa mala baamufwara khu murwe. 18Nio baarakikha khumukheesia bali, “Okhoya oyindile Omwami owe Bayaudi.” 19Baamupa esiimbo khumurwe, bamufuchakho kamare, basikama ne khumwinamila. 20Oli bamalile khumuchekheelela bario, bamufuula ekaanjo eyo mala bamufwara chingubo chewe ching'ene. Nio bamuila enje we lukoba khumubaamba.

Yesu abaambwa khu musalaba

(Mat. 27.32-44; Lk. 23.26-43; Yn. 19.17-27)

21 # Bar. 16.13 Nga baba ne balikho bacha bakaanana no mundu bali Simoni, owaba ne alikho echa mu lukoba khukhwama enje, mala basikari bamuyingilila asute kumusalaba kwa Yesu. (Simoni aba ama Kireni, lundi aba raraawe owa Alekisanda ne Rufo.) 22Baayila Yesu abuundu niio balaanga bali Kolikota liboola lili, “abuundu we siianga.” 23Abwenao bakhaka khumuelesia endali niyo batubanisie ne manemane, ne kakhali Yesu se anywa tawe. 24#Chiny. 22.18 Nio bamubaamba mala bakabana chingubo chewe mu khupa ekura khumanya naanu olabukula siina. 25Chaba chisa chitaru che kumutikhinyi nicho bamubambilakho. 26Kamaandiko ke kamasitako kaba bali, “Omwami owe Bayaudi.” 27Babaamba banuuli babili alala ne Yesu, mulala khu mukhono kwewe kumuseecha ne okundi kumukhasi. [ 28#Isa. 53.12 Mu ngila yino liiandiko liboola lili, “Aabalwa alala ne babooni” liechusibwa.]#15.28 Chibibilia chindala se chili ne lunyilili luno tawe.

29 # Chiny. 22.7; Chiny. 109.25; Mk. 14.58; Yn. 2.19 Babaandu bababiranga khu ngila ne bekeselela Yesu chinjala ne baloma bali, “Yaa! Ewe owaloma oli onyala watechula Lukaangu mala olwombakhe lundi mu ndaalo chitaru! 30Nono yerusia khu musalaba mala weonie!”

31Mu ngila ng'eneyo basaayi bakhulu boosi ne baandiki bakhoma Yesu ne baloma bali, “Aonia babaandi mala se anyala eonia omwene tawe! 32Lekha khubone Masiiya Omwami owa Isiraeli, ekhe aasi khukhwama khu musalaba siise sino mala efwe khulamusuubila!”

Akhaba babili abo ba babaambwa ne Yesu boosi bamukhoma.

Lifwa lia Yesu

(Mat. 27.45-56; Lk. 23.44-49; Yn. 19.28-30)

33Oli choola chisa sita, sisiilima siaamba sibala sioosi khu saa chitaru. 34#Chiny. 22.1 Oli choola chisa tisa Yesu alila ne kumwoyo kwe angaaki ali, “Eloi Eloi lama sabakitani.” Nikhwo khuboola khuli, “Wele wase, Wele wase, siina ne undekhile?”

35Babaandu balala bamuulila nalila ario mala baloma bali, “Rekeeresia alikho alaanga Elicha.” 36#Chiny. 69.21 Mulala khwaabo atima asanya sisiaangu mu ndali ekhali endulu tawe, mala aboa khu luteeka emusia, atilila khu munwa kwa Yesu naboola ali, “Liinda, lekha khubone nga Elicha echa khumurusia khu musalaba.”

37Nio Yesu alila ne kumumilo kwe angaaki mala akwiisia kumwoyo.

38 # Khur. 26.31-33 Epasia yaba mu Lukaangu yatabukhamo khabili, khukhwama angaaki khukhwola aasi. 39Omusikaari owe liie owaba ne emile ebweeni we kumusalaba abona nga nilwo Yesu afwa mala aloma ali, “Ng'ali yuno abeele Omwana owa Wele.” 40#Lk. 8.2-3 Bakhasi balala babao, baloleleele khukhwama ataayi balala khwaabo baba Maria Makatalena, Solome ne Maria maawe owa Yakobo ne Yosefu. 41Baloondanga khu Yesu nga aba mu Kalilaya lundi bamuyeetanga. Bakhasi bakali abeele babechile e Yerusalemu ne naye boosi babao.

Lisiikhwa lia Yesu

(Mat. 27.57-61; Lk. 23.50-56; Yn. 19.38-42)

42Yaba bulikho bwilabula ne Yosefu owe Arimatea oola. Aba omundu mulala niye be kumuse baria. Alindiililanga khukhwicha khwe Bubwami bwa Wele. Yaba Endaalo eye khukhwerekekhera esabato, 43nio Yosefu anyindaalila acha khu Pilato mala asaba kumulaambo kwa Yesu. 44Pilato esiindukha khuulila ali Yesu aaba afwiile khale. Nio alaanga omusikaari owe liie amureeba ali, “Khukhwama nga Yesu afwiile siabirire siise sileeyi?” 45Enyuma wo musikaari khumuboolela, Pilato afukiilila Yosefu khubukula kumulaambo chana. 46Yosefu akula esuuka eya katani ekhisia kumulaambo aasi, akuulukusila mu suuka mala akura mu ng'ani yaba eyabeechwa mu lwanda. Nio apiringisia kubaale kuboofu akukhiikha emuliango we siliindwa. 47Maria Makatalena ne Maria maawe owa Yosefu baaba baloleleele babona niio ara kumulaambo kwa Yesu.

Currently Selected:

Mk. 15: LUBUKUSU

Highlight

Copy