Lk. 2

Lisaalwa lia Yesu

(Mat. 1.18-25)

1Siise esio Omuruki Akosito arusia lilaka lie khubala babaandu mu bwami bwe Barumi bwoosi. 2Khuno nikhwo khukhwaba khubalwa khwe khunyoa. Kurenio niye owaba omuruki owa Siria. 3Khwako buli mulala acha khukhwiandikisia mu lukoba lwe wabwe.

4Yosefu aama mu lukoba lwa Nasareti mu Kalilaya acha mu lukoba lwe Betelehemu mu Buyuda, abuundu niio Omwami Daudi asaalwa. Yosefu aacha ebweeneyo sikila aba owe lisaaye lio mwami Daudi. 5Yosefu aacha khukhwiandikisia ne Maria niye aba naseleele, ne Maria aaba ali ne nda. 6Nga ne baba mu Betelehemu siise sia Maria sie khukhwirusiakho siola. 7Asaala omwana wewe omubele omusoleeli amura mu bikubo bie babaana mala amwalisia khu lwelo nilwo chikhaafu chaliilangakho, sikila se banyoola niio baulukhila munju eye bakeni tawe.

Babaayi ne malaika

8Babaayi babao mu sibala esio babayaanga kamatuuli kabwe akhaba siilo. 9Malaika owo Mwami ababonekhela, mala luyali lwo Mwami lwabakhosiakho. Baaba ne buuri bukali po, 10nio malaika ababoolela ali, “Mukharia tawe! Ndi ano ne Elomo Endayi khwinywe, ekhareere ekhoyo engali khu baandu boosi. 11Endaalo yino mu Lukoba lwa Daudi Kristo Omwami omuonia wefwe asaalilwe! 12Ne sino silaba simanyisio khwinywe: Mulanyoola omwana areerwe mu bikubo bie babaana mala bamwaliisie khu lwelo nilwo chikhaafu chililangakho.”

13Siise esio bamalaika be mwikulu bakali babonekha ne bafumia Wele bali:

14“Luyali lube khu Wele owe mwikulu oli angaaki lukali,

ne kumuleembe kube khu sibala khwaabo bamusiimisianga!”

15Nga malaika ne babarurao bakobola mwikulu, babaayi baboolana bali, “Khe khuche e Betelehemu khubone sisiindu sisiikholeekhe sino nisio Omwami Wele Omunyali Owa Bioosi akhubooleele efwe.”

16Khwako, bacha khangu banyoola Maria ne Yosefu, mala babona omwana ali khu lwelo nilwo chikhaafu chaliilangakho. 17Nga babaayi babona omwana baboolela basaasi niko malaika aaba nababooleele khu mwana. 18Boosi babaulila niko babaayi baloma, bauka. 19Maria abiikha kamakhuwa kano koosi mu mwoyo mala akebaasiakho lukali. 20Babaayi bakobolayo ne bafumia Wele khulwe bibiindu bioosi nibio baba ne baulile ne khubona, biaba busa nga malaika ne aaba nababooleele.

Yesu aebwa lisina

21 # Bal. 12.3; Lk. 1.31 Enyuma we lichuuma lilala nga siise ne sioola sie khukheba omwana bamutiuukha bali Yesu. Lisina nilio malaika aaboolela maawe nakhamuesia tawe.

Yesu ayilwa mu Lukaangu

22 # Bal. 12.6-8 Siise nisio Yosefu ne Maria bakhoyeele babe bakwalaafu khuloondekhana ne Lilaka lia Musa, sioola. Nio babukula omwana bamuyila Yerusalemu khumuana khu Mwami, 23#Khur. 13.2,12 nga liaandikwa mu Lilaka lio Mwami lili, “Buli omwana omubele omusoleeli aanwe khu Mwami.” 24Lundi bacha khuaana embosio eye kamauusi ke mundaa namwe kamabaya kabili khuloondekhana ne Lilaka lio Mwami.

25Siise esio abao omundu owalaangwa Simioni, amenyanga mu Yerusalemu. Aba omundu omulayi owaria Wele, mala alindiililanga buonia bwa Isiraeli. Roho Omutakatifu aaba naye, 26mala aaba aamusuubisia ali khukhwola abone Masiiya owo Mwami owasuubisibwa nio afwe. 27Simioni arangirirwa ne Roho acha mu Lukaangu. Nga basaasi bareera omwana Yesu mu Lukaangu bamukholele niko Lilaka lienya, 28Simioni atiila omwana mu makhono kewe mala asiima Wele ali:

29“Ee Omwami ewe waliinda lisuubisia liowo,

nono onyala walekhuula omukholi wowo afwe ne kumuleembe.

30Naboone buonia bwowo ne chimoni chase,

31nibwo orekeekhe mu moni che babaandu boosi.

32 # Isa. 42.6; 49.6; 52.10 Buno buwaanga buumanyisia lilienya liowo khu Be Chikholo chichiindi,

mala bureere luyali khu baandu bowo Baisiraeli.”

33Raraawe ne maawe bauka bibiindu nibio Simioni aloma khu mwana. 34Nio Simioni ababiita chikhabi mala aboolela Maria, maawe owo mwana ali, “Omwana yuno aaroborwa ne Wele khulwe lilionakwa lie bakali, lundi khulwe buonia bwe bakali mu Isiraeli. Aliba simanyisio khukhwama khu Wele nisio bakali balilomakho kamabi 35mala alibuula kamebaasio kabwe ke mu mwoyo. Ne ewe okhabe ne bubeeleli bukali bukhuchuune mu mwoyo nga niye baunile embalu.”

36Abao omuloosi omung'oosi namulekhwa owalaangwa bali Ana, omukhaana owa Fanueli owe kholo eya Asieri. Amenya no museecha wewe kimiiko saba kiong'ene, 37siise sino aaba ne bukhulu bwe kimiiko kamakhumi munaane na kine. Se arurangakho mu Lukaangu tawe; asaayanga Wele siilo ne kumuusi, eyimananga khulia nasaba wele. 38Siise esio ne sisiene, ola mala apa orio khu Wele naloma kamakhuwa ko mwana khwaabo ba baalindiililanga Wele asikule Yerusalemu.

Khukobola e Nasareti

39 # Mat. 2.23 Nga Yosefu ne Maria ne bamala khukhola koosi kakenyekha kholoondekhana ne lilaka lio Mwami, bakobola engo wabwe mu lukoba lwa Nasareti mu Kalilaya. 40Omwana achoa mala aaba ne kamaani, limanya likali, ne chikhabi cha Wele.

Yesu mu Lukaangu nali musoleeli

41 # Khur. 12.1-27; Likh. 16.1-8 Buli mwiiko basaasi ba Yesu bachichanga Yerusalemu khulwa naikara eye Pasaka. 42Nga Yesu ne aba bukhulu bwe kimiiko ekhumi na kibili, bacha sia naikara nga buli lwoosi. 43Yaba oli naikara yawa, barakikha khukobola engo, ne Yesu arama mu Yerusalemu. Basaasi bewe se bamanya tawe; 44bebaasia bali Yesu alikho akeendela mu sipupu sie babaandu. Khwako bakeenda endaalo yoosi mala barakikha khu muyiima mu balebe ne mu basaale babwe. 45Se bamunyoola tawe, nio bakobola Yerusalemu khu muyiima. 46Oli endaalo ekhola khataru bamunyoola mu Lukaangu ekhaale ne Babekisia be Siyuda ne alikho abarekeeresia ne khubareeba kamareeba. 47Boosi babamuulila bauka likobosia liewe lie bukesi bukali. 48Basaasi bewe bauka nga bamubona, mala maawe amureeba ali, “Mwana wase, siina sikila ne okhukholela kano? Ese ne raraao abeele khweembeleele lukali mala khulakhuyiimanga ewe.”

49Abakobosia ali, “Siina sikila ne mu mbeenja? Se mu manyile muli khukhwola mbe munju eya Paapa wase tawe?” 50Ne kakhali se bamanyilisia niko aabakobosia tawe.

51Nio Yesu aakobola nabo e Nasareti, mala ebweeneyo Yesu aria basaasi bewe. Maawe aabiikha kamakhuwa kano koosi mu mwoyo kwewe. 52#1 Sam. 2.26; Chis. 3.4 Yesu achoa, aba ne limanya, asiimisia Wele ne babaandu.

Currently Selected:

Lk. 2: LUBUKUSU

Highlight

Copy