Lk. 1
1
1Khu mukoosi Teofilo:
Babaandu bakali bakholile kamaani khukhwemenieelesia kamakhuwa ke bibiindu bibiekholeekhe mwifwe. 2Baandika niko khwaboolelwa ne naabo ba babona bibiindu bino khukhwama mu khurakikha lundi ba baboola burume obwo. 3Omukoosi, sikila nameniesele elala kamakhuwa kano koosi khukhwama mu khurakikha khwako, nebaasiisie ndi buli bulayi khuandikile bulayi nga kali. 4Ese ndikho khuandikila ewe kano nio omanyile elala bung'ali bwa buli siindu nisio wekisiibwe.
Malaika aboolela Sakaria khusaalwa khwa Yoana omubatiisi
5Mu ndaalo nicho Herodi aba omwami owa Yuda, abao Omusaayi bali Sakaria, aba mulala khu basaayi ba Abicha, lisina lio mukhasi wewe liaba bali Lusabeti, aba owe luuya lwe basaayi. 6Bombi baaba baluungi mu moni cha Wele lundi bariira elala kamalaka ka Wele koosi ne lilakiilisia liako. 7Ne kakhali se babaakho ne omwana tawe, sikila Lusabeti aba omukuumba ne boombi baba bakofuule.
8Endaalo ndala Sakaria aba alikho akhola kimilimo kiewe nga Omusaayi mu Lukaangu, mu bwasio bwewe. 9Khuloondekhana ne kumwiima nikwo basaayi baloondanga, aroborwa ne kura khukhwosia bibiindu biiunya kumuuya kumulayi khu alutare. Nio engila mu Lukaangu lwo Mwami, 10ne babaandu babaandi baba balikho basaba enje siise sie khukhwosia bupaani.
11Malaika owo Mwami amubonekhela emile lubeka luseecha lwa alutare niio bupaani bwosibwanga. 12Nga Sakaria ne amubona, esiindukha mala aba ne buuri bukali. 13Ne malaika amuboolela ali, “Sakaria, okharia tawe! Wele auliile lisaba liowo, mala omukhasi wowo Lusabeti alakhusaalila omwana omusoleeli mala omutiuukhe oli Yoana. 14Okhabe ne khoyo ne busangaafu lundi babaandu babaandi bakali balisangaala khulwe khusaalwa khwewe! 15#Khub. 6.3 Aliba omundu omukali mu moni cho Mwami. Se alinywakho endali yosi yosi namwe siosi silulu tawe. Alichula Roho Omutakatifu ne akhasaalwa tawe, 16mala alikobosia ba Isiraeli bakali khu Mwami Wele wabwe. 17#Mal. 4.5-6 Akhanyoe ebweeni wo Mwami, aliba owe kamaani ne bunyali nga omung'oosi Elicha. Aliambaasia bapaapa ne babaana lundi alala; alikaluukhasia be sileka, bakobole khu ngila eye khukhwibaasia buluungi; alikhola babaandu bo Mwami bamwirekekhele.”
18Nio Sakaria aboolela malaika ali, “Ese ndamanya ndiena ndi kano kaliba kario? Ese ne omuloosi wase khwakofuule.”
19 #
Dan. 8.16; 9.21 Malaika akobosia ali, “Ese ndi Kaburieli, nimaanga ebweeni wa Wele, niye oundumire ndomalome ne nawe mala khuboolele kamakhuwa kamalayi kano. 20Ne kakhali ewe se wasuubiile burume bwase tawe, buliba bwa ng'ali mu siise silayi. Ne sikila se wasuubiile tawe, olaanda lulimi, khukhwola endaalo niyo nalaka ne khoole.”
21Mu siise esio babaandu ba baaba ne baliindiilile Sakaria bauka bali, siina sikila ne abukule siise sileeyi mu Lukaangu? 22Nga arura, aba aandile lulimi khulomaloma nabo tawe, mala bamanya bali abone kamalola mu Lukaangu. Sikila se anyala khulomaloma tawe, akeleka busa ne kamakhono.
23Nga bubwasio bwewe bwe khukhola mu Lukaangu bwawa, Sakaria akobola engo. 24Enyuma we siise esio, omukhasi wewe Lusabeti aesia mala khulwe kimieesi kiraano se aabonekhakho mu baandu tawe. 25Aloma ali, “Luno, Omwami Wele anjeetile ese; andusiisiekho chisoni nicho mbechanga nacho ebweeni we babaandu!”
Malaika aboolela Maria khusaalwa khwa Yesu
26Lusabeti nali ne nda kimieesi sita, Wele aruma malaika Kaburieli mu lukoba lwa Kalilaya lulaangwa Nasareti. 27#Mat. 1.18 Aba ne burume khu mukhaana owaba ne aseleelwe no mundu olaangwa bali Yosefu, owaba owe lisaaye lio mwami Daudi. Lisina lio mukhaana oyo liaba bali Maria. 28Malaika aacha niio ali mala aloma ali, “kumuleembe kube ne nawe! Omwami ali nawe mala aakhubiitile chikhabi chingali.”
29Ne kakhali Maria aayaaya lukali po nga ne aulila burume bubwareerwa ne malaika, mala auka nisio kamakhuwa kewe kaboola. 30Nio Malaika amuboolela ali, “Maria, okharia tawe, Wele ali ne kumwalaalo khwiwe. 31#Mat. 1.21 Olaesia mala osaale omwana omusoleeli, mala omutiuukhe oli Yesu. 32#2 Sam. 7.12,13,16; Isa. 9.7 Aliba omukali lundi alilaangwa Omwana owa Wele owe Angaaki Lukali, Omwami Wele akhamwamiie nga kukaawe Daudi ne aba, 33mala aliba omwami owe lisaaye lia Yakobo mindali na mindali, bubwami bwewe se buliwa tawe!”
34Maria aboolela malaika ali, “Ese ndi omukhaana owe yabwana. Khwako, kano kanyalikhana kariena?”
35Malaika akobosia ali, “Roho Omutakatifu alakhwichakho, mala bunyali bwa Wele owe Angaaki Lukali bulakhufuunikha nga sisiiniini, khulwe sifuno sino omwana oyo aliba omutakatifu mala alilaangwa Omwana owa Wele. 36Khebulila omulebe wowo Lusabeti niye balomanga bali omukuumba, luno ali ne nda eye kimieesi sita, akhaba nakofuule. 37#Lir. 18.14 Sikila se siliio sisiindu nisio Wele akhanyala khukhola tawe.”
38Nio Maria amukobosia ali, “Ese ndi omukholi owo Mwami, lekha kekholekhe nga ne olomile.” Malaika aacha.
Maria akeniia Lusabeti
39Siise esio Maria erekekha mala aacha khangu mu lukoba lwe mu sibala sie bikulu sie Buyuda. 40Acha engila munju eya Sakaria mala akheesia Lusabeti. 41Nga Lusabeti aulila kimileembe kia Maria, omwana esosia munda mwa Lusabeti. Lusabeti echusibwa Roho Omutakatifu 42mala aaloma mu mumilo kumukali ali, “Ewe wabiitwa chikhabi lukali khukhila bakhasi boosi, ne omwana niye olisaala aabiitwa chikhabi! 43Siina sikila sisiindu siboofu siri ne sinjekholekhakho, maawe owo Mwami wase angeniye ese? 44Sikila nga mbulile kimileembe kiowo, ne omwana esosia munda mwase ne busangaafu. 45Ali ne khabi oyo osuubila ali niko Omwami amuboolela kacha khwekholekha.”
Kumwenya kwa Maria kwe khufumia Wele
46 #
1 Sam. 2.1-10
Maria aloma ali,
“Kumwoyo kwase kufumia Omwami;
47kumwoyo kwase kwekhoya sikila Wele Omuonia wase
48 #
1 Sam. 1.11
sikila akhebuliile ese omukholi wewe oweboombia!
Khukhwama luno babaandu balandanga bali owabiitwa chikhabi.
49Sikila Wele Omunyali Owa Bioosi akholeele ese ke khuukia.
Lisina liewe lili litakatifu,
50khukhwama khu selukho khukhwola khu kiindi,
akholelanga siisa abo bamuria.
51Akololosianga kumukhono kwewe kwe kamaani,
mala asalanisia ba bebonia ne lirekekha liabwe lioosi.
52 #
Ayu. 5.11; 12.19 Eekhisia babaami be bunyali
khukhwama khu ndebe chabwe che bubwami,
mala aniinia ba beboombia.
53Ekusia be njala ne bibiindu bilayi,
ne khulekha baiinda makhono mataaka.
54Aliinda lilakiilisia nilio aelesia bakuuka befwe,
lundi echile khuyeeta omukholi wewe Isiraeli.
55 #
Lir. 17.7
Akhebuliile khukholela siisa Aburahamu.
Ne khu lisaaye liewe lioosi mindali na mindali!”
56Maria amenya ne Lusabeti embi kimieesi kitaru mala
akobola engo wewe.
Lisaalwa lia Yoana Omubatiisi
57Siise sia Lusabeti sie khusaala omwana siola, mala asaala omwana omusoleeli. 58Baamenyile siimbi ne Lusabeti ne balebe bewe baulila nga Omwami ne abele omulayi khu Lusabeti, mala boosi bekhoya ne Lusabeti.
59 #
Bal. 12.3
Enyuma we lichuuma lilala, becha khu mukheba. Baaba balikho bacha khumutiuukha bali Sakaria lisina lia raraawe. 60Ne kakhali maawe aloma ali, “Tawe! Lisina liewe lilaba bali Yoana.”
61Baboolela Lusabeti bali, “Ewe se oli no mulebe we lisina elio tawe!” 62Nio bakeleka khu raraawe, khukhwenya khumanya lisina siina nilio enya atiuukhe omwana.
63Sakaria asaba sipao sie khuandikakho mala aandika ali, “Lisina liewe bali Yoana.” Boosi besiindukha. 64Abwene ne abwene Sakaria anyala khulomaloma mala arakikha khufumia Wele. 65Bamenyile siimbi naye boosi baba ne buuri, ne kamakhuwa kano kasalanila mu sibala sie bikulu sie Buyuda sioosi. 66Buli mundu owakaulilakho akebaasiakho ne khureeba ali, “Omwana yuno acha khuba naanu?” Sikila liamanyikhana busa bali bunyali bwo Omwami Owe Banamae bwaba khu niye.
Bung'oosi bwa Sakaria
67Sakaria, raraawe owa Yoana echusibwa ne Roho Omutakatifu, mala alomaloma burume bwa Wele ali:
68“Lekha khufumie Omwami Wele owa Isiraeli!
Echile khuyeeta babaandu bewe mala abakholile babe balekhuule.
69Akhuelesie efwe Omuonia owe kamaani,
owe lisaaye lio mukholi wewe Daudi.
70Aasuubisia khaale khubirira mu bang'oosi bewe batakatifu,
71ali alikhureesia efwe khukhwama khu basiku befwe.
Khukhwama khu bunyali bwabo boosi babakhubiila efwe.
72Aaloma ali alikholela siisa bakuuka befwe,
ne khukhebulila endakaano yewe endakatifu,
73ne lilichuba nilio echubila Aburahamu kuuka wefwe.
74Aasuubisia khukhureesia khukhwama khu basiku befwe.
Nio khumukholele kimilimo ne khukhali ne buuri tawe,
75mu butakatifu ne buluungi ebweeni wewe, chindaalo choosi che bulamu bwefwe.
76 #
Mal. 3.1
“Ne ewe, mwana wase, olilaangwa omung'oosi owa Wele owe Angaaki Lukali.
Olirangira ebweeni wo Mwami khumung'oonela engila,
77khuboolela babaandu bewe oli balaonisibwa,
sikila balabeelwa bubwoni bwabwe.
78Wele wefwe ali owe siisa lundi omuolu.
Alakhola buwaanga bwe buonia bukhubekho.
79 #
Isa. 9.2
Mala bukhosie khukhwama mwikulu,
khwaabo boosi bamenyile mu siilima sie sisiiniini sie lifwa,
khuluungisia likeenda liefwe mu ngila eye kumuleembe.”
80Omwana chana achoa mala akhula ne mu roho. Amenya mu sichiimi khukhwola khu ndaalo niyo abonekha khu baandu ba Isiraeli.
Currently Selected:
Lk. 1: LUBUKUSU
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
